សម្តេចតេជោ ហ៊ុន សែន ថ្លែងការពារ ម៉េង កែវពេជ្ជតា ក្រោយមានការកាត់តវីដេអូរិះគន់ថាមើលងាយប្រជាជនខ្មែរ

ភ្នំពេញ ៖ ស្របពេលដែលថ្មីៗនេះ មានការលើកឡើង និងរិះគន់មិនសំចៃមាត់មកលើតារាចម្រៀងសំឡេងពីរោះរណ្ដំចិត្តអ្នកនាង ម៉េង កែវពេជ្ជតា ពីសំណាក់ក្រុមសកម្មជនរបស់អតីតគណបក្សប្រឆាំងតាមរយៈការកាត់តវីដេអូអំឡុងពេលនាងកំពុង Live ដោយយកទៅធ្វើជាប្រធានបទលើកការចោទប្រកាន់ថា អ្នកចម្រៀងអ្នកនាង ម៉េង កែវពេជ្ជតា បានប្រើសម្តីមើលងាយនិងប្រមាថប្រជាជនខ្មែរនោះ ពេលនេះត្រូវបានសម្តេចតេជោ ហ៊ុន សែន ថ្លែងការពារ និងចាត់ទុកថាជាការបង្កើតរឿងដើម្បីធ្វើឲ្យខ្មែរស្អប់ខ្មែរគ្នាឯង។

ថ្លែងនាឱកាសអញ្ជើញចុះជួបសំណេះសំណាលសួរសុខទុក្ខជាមួយកម្មករ-កម្មការិនីមកពីតាមរោងចក្រសហគ្រាសនានានៅម្តុំលូប្រាំ ស្ថិតក្នុងខណ្ឌមានជ័យរាជធានីភ្នំពេញកាលពីថ្ងៃទី០២ខែសីហា ឆ្នាំ២០១៨ សម្តេចតេជោ ហ៊ុន សែន បានមានប្រសាសន៍ថា «រឿងនេះខ្ញុំបានមើលដោយពិតប្រាកដវាមិនគួរកើតទេរឿងហ្នឹង គ្រាន់តែតារាចម្រៀងម្នាក់ដែលល្បីឈ្មោះ(ម៉េង កែវពេជ្ជតា) …ពេលដែលកូនLiveនៅតាមហ្វេសប៊ុកនោះ ពុកមើលផ្ទាល់តែម្តង..មើលផ្ទាល់…»។

សម្តេចបានមានប្រសាសន៍ទៀតថា «ពេលហ្នឹងគ្នាទើបមកពីហែគណបក្សនៅឯខត្តត្បូងឃ្មុំ…មកដល់ផ្ទះឡាយវីដេអូ ក្នុងពេលដែលពាក់អាវគណបក្ស ហើយមានក្រមាបង់ក និងមានទាំងស្លាកគណបក្សទៀត…ឥឡូវនេះ គេកាត់តការLiveនោះទៅជារឿងថា ម៉េង កែវពេជ្ជតា មើលងាយប្រជាជនខ្មែរថាល្ងង់ថាក្រ ក៏ប៉ុន្តែបើឃ្លីបនោះ គឺខ្ញុំតាមដានមើលដឹង ព្រោះថ្ងៃនោះ គឺជាថ្ងៃបិទយុទ្ធនាការ ព្រោះមុននឹងទៅហាត់ប្រាណ ខ្ញុំបានមើលការឡាយផ្ទាល់…វាចូលមកជេរៗបង្ហិនបង្ហោចតែម្ដងតែ ម៉េង កែវពេជ្ជតា បាននិយាយទៅវិញថានិយាយបែបហ្នឹងមិនមែនឆ្កួតទេល្ងង់…បានសេចក្តីថាឆ្កួតក៏មិនឆ្កួត មិនមែនជាការឆ្កួតទេគឺល្ងង់តែម្តង…»។

សម្តេចតេជោ ហ៊ុន សែន បានមានប្រសាសន៍លើកឡើងទៀតថា «វាយកទៅកាត់តភ្លាមៗបង្កើតបានជារឿងថ្មីមួយទៀតធ្វើឲ្យគេស្អប់មកលើសិល្បករ-សិល្បការិនីរបស់យើង គ្រាន់តែរឿងប៉ុណ្ណឹងវាអាចបង្កើតទៅជាព្រឹត្តិការណ៍មួយធ្វើឲ្យអាប់ឱនកិត្តិយសអ្នកសិល្បៈ….គ្រាន់តែសិល្បករ-សិល្បការិនីប្រើសិទ្ធិខាងនយោបាយ….អ្នកណាគាំទ្រខាងគេ គេថាស្នេហាជាតិ អ្នកគាំទ្រគណបក្សប្រជាជនគេថាក្បត់ជាតិទាំងអស់»។

សម្តេចតេជោ ហ៊ុន សែន មានប្រសាសន៍បញ្ជាក់ទៀតថា «ប្រយ័ត្នក្មួយៗអ្នកដែលមិនបានដឹងរឿងទៅជឿឃ្លីបវីដេអូដែលគេកាត់ថា ម៉េង កែវពេជ្ជតា មើលងាយប្រជាជនខ្មែរថាល្ងង់ ថាក្រ ត្រូវយកឃ្លីបដើមយកមកចូលមកជេរតែម្ដងដល់ឯណេះក៏ប្រើសិទ្ធិតបតនៅក្នុងការពន្យល់ត្រឡប់ទៅវិញអំពីសិទ្ធិនយោបាយ ហើយក៏មានប្រើពាក្យថា មិនមែនឆ្កួតទេ គឺល្ងង់ តែមិនមែនចោទទៅលើប្រជាជនកម្ពុជាល្ងង់ទេគឺចោទទៅលើមួយក្រុមហ្នឹង..ដែលមានមនុស្សល្ងង់ធន់ៗហ្នឹង…។នេះក៏សូមយកពេលហ្នឹងបញ្ជាក់រឿងហ្នឹងព្រោះគណបក្សប្រជាជនក៏ត្រូវមានការទទួលខុសត្រូវចំពោះសមាជិក សមាជិកានិងអ្នកគាំទ្ររបស់ខ្លួនដែរ មិនត្រូវទុកឲ្យគេប្រមាថឡើយ»។

សូមបញ្ជាក់ថា កំពូលតារាចម្រៀងមនោសញ្ចេតនាអ្នកនាងម៉េង កែវពេជ្ជតា កាលពីប៉ុន្មានថ្ងៃមុននេះត្រូវបានក្រុមអ្នកគាំទ្រគណបក្សប្រឆាំង និងបុគ្គលខិលខូចមួយចំនួនតូច បានធ្វើការកាត់តវីដេអូរបស់នាងយកទៅធ្វើការរិះគន់ និងជេរប្រមាថធ្ងន់ធ្ងរនាំឲ្យប៉ះពាល់យ៉ាងខ្លាំងលើកិត្តិយស និងសេចក្តីថ្លៃថ្នូរ។ មិនតែប៉ុណ្ណោះក៏មានខ្លះទៀត បានឆ្លៀតយកបញ្ហានេះទៅភ្ជាប់នឹងរឿងសិល្បៈដែលធ្វើឲ្យមហាជនមួយចំនួនមានការយល់ច្រឡំមកលើរូបនាងផងដែរ៕