ភ្នំពេញ ៖ ប្រជាពលរដ្ឋរស់នៅក្នុងសង្កាត់ព្រែកថ្មី កាលពីព្រឹកថ្ងៃទី១១ ខែសីហាកន្លងទៅនេះ បានចេញមកស្វាគមន៍លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅ ដោយសារតែពួកគាត់មានក្តីរំភើបរីករាយពេលដែលលោកអភិបាលខណ្ឌបានដាក់ម៉ាស៊ីនបូមទឹកខ្នាតធំយកទៅបូមទឹកចេញពីចំណុចដែលរងការលិចលង់នាពេលថ្មីៗនេះ។
ប្រជាពលរដ្ឋបានប្រាប់អ្នកសារព័ត៌មានកម្ពុជាថ្មីថា ពួកគាត់មានក្តីរំភើបរីករាយពេលដែលបានឃើញលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានយកម៉ាស៊ីនបូមទឹកខ្នាតធំទៅដាក់បូមទឹកចេញពីចំណុចដែលរងការលិចលង់ដីចំការនិងផ្ទះសម្បែងរបស់ប្រជាពលរដ្ឋ។
ប្រជាពលរដ្ឋបានបន្តថា ឆ្នាំ២០១៨នេះ គឺទឹកជំនន់បានជន់ឡើងដូចកាលពីឆ្នាំ២០១៣កន្លងមកអញ្ចឹង។ ខណៈពេលដែលទឹកកំពុងជន់លិចមកក្នុងភូមិធ្វើឲ្យបងប្អូនប្រជាពលរដ្ឋមានក្តីព្រួយបារម្ភព្រោះឲ្យតែពេលទឹកជំនន់លិចលង់ម្តងៗគឺប្រជាពលរដ្ឋម្នាក់មានកង្វល់ខ្លាំងទៅលើកូនចៅដែលងាយនិងរងគ្រោះដោយសារលង់ទឹកស្លាប់ពេលអាណាព្យាបាលរវល់កិច្ចការប្រចាំថ្ងៃ។
ប៉ុន្តែក្តីបារម្ភបានចេញផុតពីក្នុងខ្លួន ព្រោះតែបើកភ្នែកឡើងស្រាប់តែស្នូរសម្លេងម៉ាស៊ីនបូមទឹកខ្នាតធំកំពុងតែបញ្ឆេះបូមទឹកចេញពីក្នុងភូមិយ៉ាងលឿនហើយបានស្រកសឹងថាមិនជឿ។
ប្រជាពលរដ្ឋបានបញ្ជាក់ថា សកម្មភាពរបស់អាជ្ញាធរខណ្ឌច្បារអំពៅដែលចុះមកជួយប្រជាពលរដ្ឋដែលកំពុងជួបការលំបាកដោយសាររងការលិចលង់ផ្ទះសម្បែងបានសំដែងនូវក្តីរំភើបរីករាយគ្រប់ៗគ្នាហើយសន្យាជួយតបស្នងសងគុណពេលដែលអាជ្ញាធរសំណូមពរមកពួកគាត់។
អ្វីដែលធ្វើឲ្យបងប្អូនប្រជាពលរដ្ឋសប្បាយរីករាយនិងមានភាពកក់ក្តៅនោះគឺលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅនិងមន្ត្រីក្រោមឱវាទបានចុះទៅជួបសំណេះសំណាលជាមួយប្រជាពលរដ្ឋក្នុងទឹកមុខស្រស់ស្រាយរាក់ទាក់ព្រមទាំងផ្តល់ថវិកាជូនដល់លោកតាលោកយាយនិងជនពិការថែមទៀតផង។
សកម្មភាពរបស់មន្ត្រីថ្នាក់ក្រោមចុះជួយប្រជាពលរដ្ឋដែលកំពុងជួបការលំបាកបែបនេះគឺជាការចង់បានពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាលសម្តេចតែងជំរុញឲ្យមន្ត្រីអាជ្ញាធរគ្រប់ជាន់ថ្នាក់ត្រូវចាត់ប្រជាពលរដ្ឋជាចៅហ្វាយនាយទើបនាំមកនូវការគាំទ្រពីសំណាក់ប្រជាពលរដ្ឋតបមកវិញ៕
Source: Kampuchea Thmey Daily
0 Comments