អគ្គីសនី​កម្ពុជា ប៉ះ​វេ​ស្ទើ​ន ខណៈ​អង្គ​រថា​យ​ហ្គឺ​រ ជួប​អាស៊ី​អឺរ៉ុប និង​ព្រះខ័ន​រាជ​ស្វាយរៀង ទទួល​បឹងកេត ល្ងាច​ថ្ងៃអាទិត្យ​នេះ

​ក្រុមបាល់ទាត់​អគ្គីសនី​កម្ពុជា ត្រូវ​ប៉ះ​ក្រុម​វេ​ស្ទើ​ន​ភ្នំពេញ ខណៈ​ក្រុម​អង្គ​រថា​យ​ហ្គឺ​រ ត្រូវ​ជួប​ក្រុម​អាស៊ី​អឺរ៉ុប និង​ក្រុម​ព្រះខ័ន​រាជ​ស្វាយរៀង ទទួល​ក្រុម​បឹងកេត នៅ​ល្ងាច​ថ្ងៃអាទិត្យ ទី​២៦ ខែសីហា ឆ្នាំ​២០១៨ ក្នុង​សប្ដាហ៍​ទី​១៩ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) លើ​ទីលាន​ផ្សេងៗ​គ្នា​។



*​អគ្គីសនី​កម្ពុជា ប៉ះ​វេ​ស្ទើ​ន​ភ្នំពេញ
ក្រុមបាល់ទាត់​អគ្គីសនី​កម្ពុជា ត្រូវ​ប៉ះ​ក្រុម​វេ​ស្ទើ​ន​ភ្នំពេញ នៅ​ម៉ោង​៣​រសៀល លើ​ទីលាន​កីឡដ្ឋាន​អគ្គីសនី​កម្ពុជា ព្រមទាំង​មាន​ផ្សាយ​ផ្ទាល់​តាម​ហ្វេ​ស​ប៊ុ​ក CNCC​។ ក្រុម​អគ្គីសនី​កម្ពុជា មិនទាន់​គេចផុត​ពី​តំបន់​បាត​តារាង​នៅឡើយ​នោះទេ ក្រោយ​ប្រកួត​ឈ្នះ​បាន​១​លើក ស្មើគ្នា​៣​លើក និង​ចាញ់​១៤​លើក​ក្នុង​ប្រកួត​កន្លងមក​។ លោក ប្រាក់ វុទ្ធី គ្រូបង្វឹក​របស់​ក្រុម​នេះ​បាន​ដាក់​គោលដៅ​រក្សាខ្លួន​ឲ្យ​ល្អ និង ប្រឹង​ដើម្បី​បាន​ចំណាត់​ល្អ​ជាង​រដូវ​កាល​ចាស់ នៅក្នុង​ពានរង្វាន់​លី​គ​កំពូល​កម្ពុជា ខណៈ​ក្រុម​នេះ​ទើបតែ​ខកចិត្ត​ក្រោយ​ធ្លាក់​ចេញពី​ពានរង្វាន់​សម្តេច​តេ​ជោ ហ៊ុន សែន ត្រឹម​វគ្គ​១៦​ក្រុម​ចុងក្រោយ​។



ក្រុម​វេ​ស្ទើ​ន​ភ្នំពេញ ទើបតែ​រកបាន​ពិន្ទុ​លើកដំបូង កាល​ពី​ពេល​ថ្មីៗ​ក្រោយ​ឆ្លងកាត់​១៨​ប្រកួត​មកនេះ​។ ក្រុម​នេះ​កំពុង​ដឹកនាំ​ដោយ​គ្រូបង្វឹក​ជនជាតិ​ម៉ាឡេស៊ី លោក FIZOL BIN A.RAZAK​។ ឆ្លងកាត់​ការប្រកួត​មួយរយៈ​ពេលនេះ​មក​លោក​បាន​មើលឃើញ​ពី​កម្រិត​ប្រកួតប្រជែង​និង​តម្រូវការ​ទាមទារ​នៅក្នុង​លី​គ​កម្ពុជា ដែលជា​បទពិសោធ​ល្អ​សម្រាប់​កីឡាករ​ក្មេងៗ​របស់លោក​ក៏ដូចជា​សម្រាប់​លោក​ផ្ទាល់​ផងដែរ​។



*​អង្គ​រថា​យ​ហ្គឺ​រ ប៉ះ​អាស៊ី​អឺរ៉ុប
ក្រុម​អង្គ​រថា​យ​ហ្គឺ​រ ប៉ះ​ត្រូវ​ប៉ះ​ក្រុម​អាស៊ី​អឺរ៉ុប នៅវេលា​ម៉ោង​៣និង៣០​នាទី​រសៀល​លើ​ទីលាន​កីឡដ្ឋាន​ខេត្តសៀមរាប ហើយ​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ក​របស់​រស្មី​កម្ពុជា​។ ក្រុម​អង្គ​រថា​យ​ហ្គឺ​រ ឆ្លងកាត់​ប្រកួត​១៨​លើក​មក ឈ្នះ​បាន​៦ លើក​ស្មើគ្នា​បាន​៤​លើក និង​ចាញ់​៨​លើក​មាន​២២​ពិន្ទុ​។ ក្រុម​នេះ​កំពុងតែ​ដឹកនាំ​ដោយ​លោក Oriol Mahedano ដែលជា​គ្រូបង្វឹក​សញ្ជាតិ​អេ​ស្ប៉ា​ញ កាន់​អាជ្ញាប័ណ្ណ​គ្រូបង្វឹក​កម្រិត UEFA A licence ដែលមាន​សមាជិក​២៥​នាក់​។ លោក Akihiro Kato ដែលជា​ប្រធាន​ក្លិប​បានដាក់​គោលដៅ​យក​កៅអី​នៅ​តំបន់​ក្រុម​ខ្លាំង​ទាំង​៤​ប្រចាំ​រដូវ​កាល (Top4) នៅ​ឆ្នាំនេះ ខណៈ​នៅ​ឆ្នាំ​២០២០ ក្លិប​ចង់​ប្រជែង​យក​ជើងឯក​។



ដោយឡែក​សម្រាប់​ក្រុម​អាស៊ី​អឺរ៉ុប វិញ​កំពុងតែ​ស្រោចស្រង់​កីឡដ្ឋាន AEU Sport Park របស់ខ្លួន​ដោយសារតែ​ទឹកជំនន់​បណ្តាលឱ្យ​បាក់​ទំនប់​ហើយ​ទឹក​ហូរ​ចូល​ពេញ​បរិវេណ​កីឡដ្ឋាន​។ ក្រុម​អាស៊ី​អឺរ៉ុប កំពុង​ដឹកនាំ​ដោយ​លោក សុក វាសនា ពេលនេះ​កំពុង​ឈរ​ចំណាត់ថ្នាក់​លេខ​៩ បណ្តោះអាសន្ន​ក្នុង​តារាង​រួម​ដែលមាន​ក្រុម​ចំនួន​១២ ក្រោយ​ប្រកួត​បាន​១៨​លើក ឈ្នះ​បាន​៦​លើក ស្មើគ្នា​៤​លើក និង​ចាញ់​៨​លើក មាន​២២​ពិន្ទុ​ក្នុង​ដៃ​។ ខ្សែប្រយុទ្ធ​កា​ម៉េ​រូ​ន Befolo Mbarga Privat ជា​កីឡាករ​ឆ្នើម​ម្នាក់​ក្នុង​ក្រុម​ក្រោយ​រក​គ្រាប់​បាន​២០​គ្រាប់​ម្នាក់ឯង​កន្លងមក​នេះ​។

*​ព្រះខ័ន​រាជ​ស្វាយរៀង ទទួល​បឹងកេត
ក្រុមព្រះ​ខ័ន​រាជ​ស្វាយរៀង ត្រូវ​ជួប​ក្រុម​បឹងកេត នៅ​ម៉ោង​៦​ល្ងាច​លើ​ទីលាន​កីឡដ្ឋាន​ខេត្តស្វាយរៀង ដែល​មាន​ផ្សាយ​ផ្ទាល់​តាម​ប៉ុស្តិ៍ BTV News​។ ក្រុមព្រះ​ខ័ន​រាជ​ស្វាយរៀង មួយ​រយៈ​ចុងក្រោយ​នេះ​ហាក់​ជួប​បញ្ហា​រឿង​កីឡាករ​របួស​និង​កីឡាករ​សំខាន់ៗ​ជាប់​ពិន័យ​ពី​សំណាក់​គណៈកម្មការ​វិន័យ​របស់​សហព័ន្ធ​កីឡាបាល់ទាត់​កម្ពុជា​។ លោក Conor Nestor គ្រូ​បង្គោល​ក្លិប​ព្រះខ័ន​រាជ​ស្វាយរៀង សរសើរ​កូនក្រុម​ក្នុង​ប្រកួត​ចុងក្រោយ​ដែល​ធ្វើ​បាន​ល្អ​។ យ៉ាងណា​លោក​បាន​ដោះដូរ​កីឡាករ​គួរ​ឲ្យ​ភ្ញាក់​ផ្អើល​មួយ​ដើម្បី​ត្រៀម​ជើង​ទី​២​នេះ​។ ក្រុមព្រះ​ខ័ន​រាជ​ស្វាយរៀង កំពុងតែ​ឈរ​ចំណាត់ថ្នាក់​លេខ​៦​បណ្តោះអាសន្ន​ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៧​លើក​ស្មើគ្នា​៣​លើក​និង​ចាញ់​៨​លើក​។



ចំណែក​ក្រុម​បឹងកេត កំពុងតែ​ឈរ​លេខ​២​ក្នុង​តារាង ក្រោយ​ឆ្លងកាត់​១៨​ប្រកួត​មកនេះ​ឈ្នះ​រហូតដល់​១៣​ប្រកួត ស្មើគ្នា​៣​ប្រកួត​និង​ចាញ់​២​ប្រកួត​មាន​៤២​ពិន្ទុ​។ លោក ហៅ សុជាតិ ដែលជា​គ្រូបង្វឹក​កំពុងតែ​ឈឺក្បាល​រឿង​កីឡាករ​របួស ខណៈ​រូបលោក​ត្រូវ​ពិន័យ​មិន​ឱ្យចូល​ទីលាន​រយៈពេល​១​ខែ​ទៀតផង​។ មិនតែប៉ុណ្ណោះ​លោក​បាន​សម្លឹង​ឃើញ​ក្រុម​ណាហ្គា​វើ​ល និង​វិសាខា ជា​គូប្រជែង​មិនអាច​មើលរំលង​បាន​ក្នុង​ការដណ្តើម​ជើងឯក​នៅ​ឆ្នាំនេះ​៕

     

Source: Kampuchea Thmey Daily