កីឡាករ Samuel Gbenga Ajayi ដែលជាខ្សែបម្រើប្រយុទ្ធប្រចាំក្រុមជើងឯកឆ្នាំចាស់បឹងកេត អាចត្រឡប់មកជួយក្រុមបានវិញហើយ ក្រោយសម្រាកព្យាបាលរបួសអស់មួយរយៈ ខណៈលោក ហៅ សុជាតិ ដែលជាគ្រូបង្វឹកក្រុមមួយនេះរីករាយនឹងដំណឹងល្អ ប៉ុន្តែលោកបានមើលឃើញពីបញ្ហាប្រឈមពេលក្រុមត្រូវប្រកួតនៅល្ងាចថ្ងៃអាទិត្យ ទី២៦ខែសីហា ឆ្នាំ២០១៨នេះ។
លោក ហៅ សុជាតិ បានបញ្ជាក់ថា Gbenga អាចវិលត្រឡប់មកជួយក្រុមបានវិញហើយក្រោយខកខានក្នុងជំនួបសំខាន់ៗពីរប្រកួតទល់នឹង វិសាខា និង ណាហ្គាវើល បន្ទាប់ពីកីឡាកររូបនេះទទួលរងរបួសក្នុងអំឡុងការប្រកួតទល់នឹងក្រុមក្រសួងការពារជាតិ។ កីឡាករម្ចាស់អាវលេខ៩៩រូបនេះជាតួសំខាន់នាពេលកន្លងមកក្នុងការបញ្ជូនបាល់ឱ្យមិត្តរួមក្រុមបំប៉ោងសំណាញ់ទីគូប្រកួត។
តាមពិតកាលពីរដូវកាលឆ្នាំ២០១៧ កន្លងទៅកីឡាករGbenga បានចាកចេញពីបឹងកេត ឆ្ពោះទៅកាន់ក្រុមអាស៊ីអឺរ៉ុប ពាក់កណ្ដាលរដូវកាលមុនចេញទៅចូលរួមជាមួយបឹងកេត វិញ។ កីឡាកររូបនេះបានធ្វើដំណើរមកកាន់ប្រទេសកម្ពុជា វិញកាលពីឆ្នាំ២០១៥។ មុនមកកាន់តំបន់អាស៊ី រូបគេខ្សែប្រយុទ្ធដ៏ឆ្នើមដែលធ្លាប់ប្រកបអាជីពនៅក្លិបNiger Tornadoes ក្នុងប្រទេសកំណើតរបស់ខ្លួនចន្លោះឆ្នាំ២០០២ ដល់២០០៥ ហើយនៅឆ្នាំ២០០៦ ដល់២០០៨ រូបគេបានធ្វើដំណើរមកប្រទេសកម្ពុជា ដោយចូលរួមជាមួយក្រុមភ្នំពេញក្រោន ខណៈចន្លោះឆ្នាំ២០០៨ ដល់២០១២ រូបគេបានទៅបន្តអាជីពរបស់ខ្លួននៅលីគកំពូលប្រទេសថៃ ជាមួយក្លិប Bangkok Glass មុនចេញទៅចូលរួមជាមួយក្លិប Choburi FC នៅឆ្នាំ២០១៣-២០១៤ ហើយរដូវកាលបន្ទាប់កីឡាករវ័យ៣០ឆ្នាំរូបនេះ បានចូលរួមជាមួយក្លិបរបស់ថៃ មួយទៀតគឺ Samut Sngkhram មុនត្រឡប់មកប្រទេសកម្ពុជា វិញដោយចូលរួមជាមួយបឹងកេតអង្គរ នៅឆ្នាំ២០១៥ ដល់២០១៦ កន្លងទៅនេះ។
ក្រុមបឹងកេត ត្រូវប៉ះម្ចាស់ផ្ទះព្រះខ័នរាជស្វាយរៀង លើទីលានកីឡដ្ឋានស្វាយរៀង នៅវេលាម៉ោង៦ល្ងាចថ្ងៃអាទិត្យ ទី២៦ ខែសីហា ឆ្នាំ២០១៨ ក្នុងសប្ដាហ៍ទី១៩ នៃពានរង្វាន់លីគកំពូលកម្ពុជា (Metfone Cambodian League 2018) ខណៈការប្រកួតនេះមានផ្សាយផ្ទាល់តាមប៉ុស្តិ៍ BTV News ផងដែរ។ កាលពីជើងទី១ដែលប្រកួតនៅខែឧសភា កន្លងទៅក្រុមបឹងកេត ធ្លាប់បានយកឈ្នះលើក្រុមព្រះខ័នរាជស្វាយរៀង ម្តងហើយក្នុងលទ្ធភល៣ទល់១។
យ៉ាងណាក៏ដោយគ្រូបង្វឹកដែលឈ្នះពានរង្វាន់គ្រូល្អប្រចាំលីគកំពូលរដូវកាល២០១៧រូបនេះក៏បានបង្ហាញពីទស្សនៈរបស់ខ្លួនមុនពេលប្រកួតនៅល្ងាចថ្ងៃអាទិត្យនេះមកដល់ថា ការយក៣ពិន្ទុចេញពីកីឡដ្ឋានស្វាយរៀងគឺមិនងាយស្រួលនោះទេ តែលោកសង្ឃឹមថាកូនរបស់លោកនឹងធ្វើបានល្អ ដើម្បីយកកៅអីកំពូលតារាងមកវិញ៕
Source: Kampuchea Thmey Daily
0 Comments