បាត់ដំបង ៖ យុវជនម្នាក់ ដែលត្រូវ បានសមត្ថកិច្ច ស្រុករតនៈមណ្ឌល ចោទ ថា ជាជនជាប់ពាក់ព័ន្ធ នឹងករណីចែកចាយគ្រឿងញៀន បានវ័ណ្ឌក ដើរខ្ចីបុលគេ ពីរនាក់ឪពុកដើម្បីរកប្រាក់មកបង់ឲ្យសមត្ថកិច្ច ជាថ្នូរនិងការបញ្ចប់រឿង កុំឲ្យមានការពាក់ព័ន្ធក្នុងរឿងគ្រឿងញៀន តទៅទៀត បន្ទាប់ពីយុវជនរូបនេះ ត្រូវបានជនសង្ស័យសុំដោយសារតាមរយៈម៉ូតូ ដោយមិនដឹងខ្លួន។
គួររំលឹកដែរថា កាលពីវេលាម៉ោង៦និង១៥នាទីល្ងាច ថ្ងៃទី២០ខែសីហា ឆ្នាំ២០១៨ ត្រង់ចំណុច ខាងក្រោយទំនប់ពហុបំនង សេកសក ស្ថិតក្នុងភូមិ សេកសក ឃុំផ្លូវមាស ស្រុករតនៈមណ្ឌល ខេត្តបាត់ដំបង គឺ សមត្ថកិច្ចជំនាញ នៃអធិការដ្ឋាន នគរបាល ស្រុករតនៈមណ្ឌល បានធ្វើការឃាត់ខ្លួនជនសង្ស័យបានម្នាក់ ក្នុងចំណោមគ្នីគ្នា ២ នាក់ គឺឈ្មោះ ឈឿន ឈុនហៀក ហៅដួង ភេទប្រុស អាយុ២៣ឆ្នាំ រស់នៅត្រង់ចំណុចខាងលើ ដោយនៅពេលនោះដែរ សមត្ថកិច្ចបានរកឃើញថ្នាំញៀនប្រភេទម៉ាទឹកកចំនួន ៣១ កូនថង់ ស្មើនឹងទម្ងន់ ៦,៥២ ក្រាម និងទូរស័ព្ទដៃ ២ គ្រឿង ។ បច្ចុប្បន្នជនសង្ស័យ រួមនិងថ្នាំញៀន ត្រូវបានបញ្ជូនទៅកាន់ការិយាល័យជំនាញ នៃស្នងការដ្ឋាន នគរបាលខេត្តបាត់ដំបង ហើយ ក្នុងការចាត់វិធានការ តាមផ្លូវច្បាប់ ដោយឡែកម្នាក់ទៀតដែលជាអ្នកបើកបរម៉ូតូបានបើករត់គេចបាត់ស្រមោល។
ក្រោយពីទទួលបានផែនការរបស់លោក អធិការ សន និល រួចមក នៅល្ងាចថ្ងៃទី ២២ ខែ ឆ្នាំ ដដែល កម្លាំងប៉ុស្តិ៍ នគរបាលរដ្ឋបាល ផ្លូវមាស បានចុះទៅដល់ផ្ទះរបស់យុវជនម្នាក់ឈ្មោះ រុន រ៉ា អាយុ២៦ឆ្នាំ រស់នៅភូមិអូរត្រែង ឃុំផ្លូវមាស ក្នុងគោលបំណងនាំខ្លួនយកមកសាកសួរ ឬក៏អាចមានវិធីសាស្ត្រអ្វីផ្សេង ប៉ុន្តែនៅពេលនោះដែរ គឺកម្លាំងមិនបានជួបនិងយុវជនរូបនេះទេ បានគ្រាន់តែផ្តាំឲ្យផ្ញើតែប៉ុណ្ណោះ។
តាមសម្តីរបស់លោក លី រុន ដែលត្រូវជាឪពុក និងត្រូវជាជនរងគ្រោះដែលត្រូវសមត្ថកិច្ចជម្រិតទាប្រាក់ បានលើកឡើងប្រាប់អ្នកសារព័ត៌មាន នាព្រឹកថ្ងៃទី២៥ ខែសីហា ឆ្នាំ២០១៨ នេះថា នៅព្រឹកថ្ងៃទី២៣ រូបលោក ជាមួយនឹងភរិយា បានធ្វើដំណើរទៅកាន់ប៉ុស្តិ៍ដើម្បីចង់ដឹង ប៉ុន្តែត្រូវបានកម្លាំងប៉ុស្តិ៍បញ្ជាឲ្យយកកូនប្រុសឈ្មោះ លី រុន ទៅដើម្បីសាកសួរ។
ទីបំផុត ក្រោយពេលដែលលោកបាននាំកូនប្រុសទៅដល់ គេក៏បញ្ជូនទៅកាន់អធិការដ្ឋាន នគរបាលស្រុករតនៈមណ្ឌល ដោយគេឲ្យកូនប្រុសទៅបន្ទប់ផ្សេង ឯរូបលោក ត្រូវបានមន្ត្រីប៉ូលិសមួយរូប និយាយភាសា សម្របសម្រួល ដោយបានសង្កត់ថា បើមិនឆាប់គិតគូរទេ ប្រយ័ត្នគេបញ្ជូនកូនប្រុសទៅតុលាការ ព្រោះមានគេឆ្លើយដាក់ ពាក់ព័ន្ធនឹងករណី កាន់កាប់ រក្សាទុក ដោយខុសច្បាប់ នូវសារធាតុញៀន។
លោកបានបន្តថា នៅពេលនោះគឺម៉ោង ៩ ព្រឹក ដែលសមត្ថកិច្ចទាមទារប្រាក់ចំនួន ១៥០០ដុល្លារ ជាថ្នូរនៃការបញ្ចប់រឿង ដើម្បីឲ្យកូនប្រុស ត្រឡប់ទៅផ្ទះវិញ ប៉ុន្តែក្រោយមកក៏ត្រូវគ្នាត្រឹមទឹកប្រាក់ ១២០០ ដុល្លារតែប៉ុណ្ណោះ។ ដោយសារលោកមានការភិតភ័យ និងបារម្ភចំពោះកូនប្រុសផង លោកសុខចិត្តដើរខ្ចីបុលគេយកមកប្រគល់ឲ្យសមត្ថកិច្ចគ្រប់ចំនួន នៅព្រឹកនោះ ហើយនៅក្នុងអធិការដ្ឋាន នោះតែម្តង ដោយអារម្មណ៍របស់លោកចង់ឲ្យស្ថាប័នជំនាញ ជួយស្វះស្វែងរកយុត្តិធម៌ដែរ ប៉ុន្តែលោកត្រូវផ្អាកទៅវិញ ខ្លាចការរស់នៅរាល់ថ្ងៃមិនមានសុវត្ថិភាព ហើយខ្លាចរឿងកាន់តែធំឡើងៗ ។
ដោយឡែកសម្រាប់កូនប្រុសឈ្មោះ លី រុន បានរៀបរាប់ថា នៅមុនពេលចាប់ខ្លួនឈ្មោះឈឿន ឈុនហៀក ហៅដួង គឺខ្លួនបានចុះទៅស្រែដើម្បីដលរដាក់បង្កៃត្រី ហើយក៏បានផ្ញើម៉ូតូទុកនៅនឹងខ្ទមស្រែរបស់ជនសង្ស័យរូបនេះ។ លុះពេលឡើងពីដាក់បង្កៃត្រីវិញក៏ត្រូវបានជនសង្ស័យខាងលើ សុំដោយសារតាមរយៈម៉ូតូរបស់ខ្លួន ហើយក៏ត្រូវប៉ូលីសចាប់តែម្តង ដោយខ្លួនមិនដឹងរឿងអ្វីបន្តិចទាល់តែសោះ។
ជុំវិញបញ្ហាជម្រិតយកប្រាក់ពីជនស្លូតត្រង់នេះដែរ នៅថ្ងៃទី ២៥ ខែសីហា ឆ្នាំ២០១៨ វេលាម៉ោង ១០ ព្រឹក តាមរយៈទូរស័ព្ទ លោក សន និល អធិការ នគរបាលស្រុករតនៈមណ្ឌល បានគូសបញ្ជាក់យ៉ាងច្បាស់ថា តាមពិត លុយមិនបាន១២០០ ដុល្លារទេគឺកូនចៅប្រាប់ថា បានតែជាង ៣ លាន រៀល តែប៉ុណ្ណោះ។
បន្ទាប់ពីលោកបានទទួលស្គាល់ការពិតថា ពិតជាបានយកលុយពីជនរងគ្រោះមែននោះលោកបានសម្តែងនូវប្រតិកម្មយ៉ាងខ្លាំង ក្រោយពីរឿងនេះត្រូវបានបែកធ្លាយដល់សារព័ត៌មានហើយលោកបានប្រកាសថា លោកនឹងបញ្ជាកម្លាំងឲ្យចុះទៅចាប់ខ្លួនយុវជនរូបនោះមកវិញដើម្បីបញ្ជូនទៅតុលាការ។
ប្រការដែលលោក សន និល ប្រើភាសាបែបនេះ តើលោកសមជាសមត្ថកិច្ចដែរ ឬ ទេ ឬមួយក៏ព្រោះតែរឿងពុករលួយត្រូវបានបែកធ្លាយ ទើបលោកបញ្ចេញចរិតសងសឹក ?
បញ្ហានេះ គួរតែលោកស្នងការ ឬក៏ស្ថាប័ន ពាក់ព័ន្ធ ពិនិត្យឡើងវិញ ព្រោះកន្លងមកដូចជាករណីបង្ក្រាបល្បែងអាប៉ោងមួយកន្លែងនៅក្នុងស្រុករតនៈមណ្ឌល លោក អធិការបានស្រែកយ៉ាងពេញៗមាត់ ព្រមទាំងបានបង្ហោះនៅក្នុងបណ្តាញសង្គមថែមទៀតថា លោកមិនដែលបានប៉ះលុយមួយកាក់ មួយសេន ពីល្បែង ឬក៏គ្រឿងញៀនណាមួយឡើយ ចុះហេតុអ្វីបានជាធ្លាយរឿងរ៉ាវមក ពាក់ព័ន្ធនិងលុយរាប់លានរៀលទៅវិញ?
បើយោងតាមប្រភពក្រៅផ្លូវការបានបង្ហើបថា ឃ្លីបវីដេអូមួយខ្សែ ដែលលោកអធិការបានបង្ហោះ ស្តីពីការបង្ក្រាបល្បែងអាប៉ោងនោះ ទំនងជាបង្ក្រាបក្នុងអំឡុងខែមុន ហើយនៅក្នុងរឿងនេះដែរ ម្តាយ និងកូនស្រី ដែលជាអ្នកញៀនអាប៉ោង គឺត្រូវបានលោកអធិការតម្រូវឲ្យធ្វើកិច្ចសន្យាដើម្បីឲ្យត្រឡប់ទៅផ្ទះវិញ ប៉ុន្តែត្រូវបង់ប្រាក់ពិន័យចំនួន ៣ លានរៀល ទីបំផុត នៅថ្ងៃនោះដែរ ទឹកប្រាក់ត្រូវធ្លាក់មកនៅត្រឹមតែ ១ លានរៀលវិញ បន្ទាប់ពីមានការអន្តរាគមន៍ពីមន្ត្រីប៉ូលីសមួយរូប នៅក្នុងស្នងការដ្ឋាន នគរបាលខេត្ត។
នៅព្រឹកនោះដែរ លោកឧត្តមសេនីយ៍ត្រី កុយ ហៀង ស្នងការរង ទទួលផែន ប្រឆាំងបទល្មើស បានសង្កត់ធ្ងន់ថា ក្នុងនាមជាសមត្ថកិច្ច និងជានគរបាលយុត្តិធម៌ បើឃាត់បានជនសង្ស័យ ត្រូវអនុវត្តតាមនីតិវិធី ដោយឡែកចំពោះរឿងយកប្រាក់ពីជនរងគ្រោះ កុំថាឡើយជាង ៣ លាន ទោះជាមួយពាន់រៀលក៏ដោយ ក៏វាខុសពីគោលការ នគរបាលបាត់ទៅហើយ ដូច្នេះលោកមិនគាំទ្រជាដាច់ខាត អំពីចំណាត់ការបែបនេះ៕
Source: Kampuchea Thmey Daily
0 Comments