កណ្តាល ៖ កម្មករសំណង់២នាក់ ម្នាក់ផ្នែកបាញ់ថ្នាំជញ្ជាំង ឯម្នាក់ទៀតខាងបូមទឹក ត្រូវភ្លើងចរន្តអគ្គិសនីផ្តាច់យកជីវិតមួយប៉ប្រិចភ្នែកនៅព្រឹកថ្ងៃតែមួយ ដោយទីតាំងកើតហេតុផ្សេងពីគ្នា។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានឲ្យដឹងថា ជនរងគ្រោះឈ្មោះ មានឈ្មោះហៅក្រៅ តូ ភេទប្រុស អាយុប្រហែល១៨ឆ្នាំ មុខរបរកម្មករសំណង់ កំពស់១.៦៥សម ស្រុកកំណើតខេត្ត ព្រៃវែងបានបាត់បង់ជីវិតដោយត្រូវឆក់ចរន្តភ្លើងអគ្គិសនី ឆក់នៅចំណុចផ្ទះកំពុងធ្វើការជួសជុល ភូមិព្រែកសំរោង សង្កាត់តាខ្មៅ ក្រុងតាខ្មៅ វេលាម៉ោង៩និង០០នាទី ថ្ងៃទី៣ខែសីហា ឆ្នាំ២០១៨។
តាមការបំភ្លឺរបស់សាក្សីឈ្មោះ ហ៊ាល វុទ្ធី ភេទប្រុស មុខរបរជាងភ្លើង បានឲ្យដឹងថា នៅវេលាម៉ោង៧និង៤០នាទី ឃើញជនរងគ្រោះបាញ់ថ្នាំនៅជញ្ជាំង ក៏បានឡើងទៅដាក់កុងតាក់នៅខាងលើផ្ទះក៏លឺសូសំលេងស្រែកហៅថា «ជួយផង»ពេលនោះខ្លួន បានអើតចេញពីបង្អួត ឃើញជនរងគ្រោះឆក់និងម៉ូទ័របាញ់ថ្នាំ ហើយក៏ចុះមកក្រោម បានដកខ្សែភ្លើងចេញនិងហៅម្ចាស់ផ្ទះឲ្យជួយ រឹតទ្រូងធ្វើ ចលនានិង យកជនរងគ្រោះកប់ខ្សាច់។
បន្ទាប់មក បានតេហៅឡានពេទ្យ ពេលនោះឡានពេទ្យមកដល់ បានប្រាប់ថា ជនរងគ្រោះបានស្លាប់បាត់ទៅហើយ។ ក៏បានរាយការណ៍ជូនសមត្ថកិច្ចចុះធ្វើការពិនិត្យ។
តាមការពិនិត្យរបស់សមត្ថកិច្ច នគរបាលផ្នែកពិនិត្យវិភាគកន្លែងកើតហេតុក្រុងតាខ្មៅ ព្រមទាំងអាជ្ញាធរ លោកគ្រូពេទ្យអនុមន្ទីរពេទ្យជ័យជំនះ បានសន្និដ្ឋានថា ជនរងគ្រោះពិតជាបានស្លាប់ដោយសារ ឆក់ចរន្តអគ្គិសនី(ឆក់បណ្តាលឲ្យស្លាប់)ពិតប្រាកដមែន។
ដោយឡែក នៅចំណុចការដ្ឋានវាយយកថ្មភ្នំខ្សាក(ក្រុមហ៊ុនហុងហ្វុង) ស្ថិតនៅ ភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាលលោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនរងគ្រោះឈ្មោះ វី សែ ហៅ ត្រេន ភេទប្រុស អាយុ ២៥ ឆ្នាំ ជនជាតិខ្មែរ មានមុខរបរកម្មករបូមទឹក (វាយយកថ្មភ្នំខ្សាក)មានទីលំនៅភូមិជន្លង់ម្លូរ ឃុំរំដួល ស្រុកភ្នំស្រួច ខេត្តកំពង់ស្ពឺក៏ត្រូវបានចរន្តភ្លើង(ម៉ូទ័របូមទឹក)ឆក់ស្លាប់ នៅវេលាម៉ោង១០និង៣០នាទីព្រឹក ថ្ងៃទី៣ ខែសីហា ឆ្នាំ២០១៨។
លោកអធិការបញ្ជាក់ថា នៅថ្ងៃខែឆ្នាំ វេលាកើតហេតុខាងលើមានឈ្មោះ វី សែ ហៅត្រេន បានបូមទឹកចេញពីរណ្ដៅត្បាល់កិនថ្មទី២ ពេលនោះមេការចិន ឈ្មោះ ហុង វៃហ្វុង ដើរពិនិត្យការងារកិនថ្មបានឃើញ ដាច់ចរន្តអគ្គិសនីក៏បានពិនិត្យឃើញឈ្មោះ វី សែ ហៅត្រេន ដេកផ្កាប់មុខនៅក្នុងរណ្តៅខាងលើ( ទឹកត្រឹមពាក់ កណ្តាលភ្លៅ) ពេលនោះឈ្មោះហុង វៃហ្វុង បានហៅកម្មករ ជួយលើកជនរងគ្រោះឡើងគោក រួចដឹកឈ្មោះ វី សែ ហៅត្រេនតាមរថយន្តមកពេទ្យបង្អែកស្រុកស្អាង ប៉ុន្តែឈ្មោះវី សែ ហៅត្រេនបានដាច់ខ្យល់ស្លាប់ ពេលដល់មន្ទីរពេទ្យ។
ការពិនិត្យសាកសពរបស់នគរបាលស្រុកស្អាងនិងគ្រូពេទ្យស្រុកឃើញថា ជនរងគ្រោះ មានស្នាមរលាត់កូនជើងខាងឆ្វេង០១កន្លែង ស្នាមរលាត់ខ្នង០១កន្លែង និង មានស្នាមជាំម្រាមដៃខាងឆ្វេង១កន្លែង។
ក្រៅពីនេះពុំមានស្លាកស្នាមអ្វី គួរឲ្យកត់សម្គាល់ឡើយ។ យោងការពិនិត្យកន្លែងកើតហេតុនិងតាមការបំភ្លឺរបស់ឈ្មោះហុង វៃហ្វុង សាកសពឈ្មោះ វី សែ ហៅត្រេន ពិតជាស្លាប់ដោយសារឆក់ចរន្តអគ្គិសនី(ម៉ូទ័របូមទឹក) ដែលនៅក្នុងរណ្តៅទឹកមែន៕
Source: Kampuchea Thmey Daily
0 Comments