ក្រុមបឹងកេត ក្នុងនាមជាក្រុមកំពូលតារាងនៃពានរង្វាន់លីគកំពូលកម្ពុជា (Metfone Cambodian League 2018) ត្រូវប្រកួតមិត្តភាពអន្តរជាតិជាមួយក្រុមJFL Selection (Japan Football League ហៅកាត់ថា JFL) មកពីប្រទេសជប៉ុន នៅល្ងាចថ្ងៃអាទិត្យ ទី៥ខែសីហា ឆ្នាំ២០១៨ នេះលើទីលានពហុកីឡដ្ឋានជាតិ ក្នុងរាជធានីភ្នំពេញ។ ការប្រកួតនេះចាប់ផ្តើមពីម៉ោង៥ល្ងាចតទៅព្រមទាំងបើកឲ្យមហាជនចូលទស្សនាដោយសេរីផងដែរ។
លោក ហៅ សុជាតិ គ្រូបង្វឹករបស់ក្រុមបឹងកេត បានលើកឡើងមុនការប្រកួតមកដល់ថា «យើងនឹងបែងចែកកីឡាករជា២ក្រុម ដោយក្រុម A គឺភាគច្រើនជាអ្នកលេងជម្រើសដំបូង និង ក្រុម B លាយជាមួយយុវជន ហើយពួកគេនឹងលេងមួយក្រុមមួយវគ្គ។ យើងរីករាយក្នុងការទទួលភ្ញៀវនៅប្រកួតនេះព្រោះជាការផ្លាស់ប្ដូរបទពិសោធន៍ ជាមួយក្រុមប្រកបដោយស្តង់ដារមួយ»។
លោក Katsumasa Terouch គ្រូបង្វឹករបស់ក្រុម JFL បានលើកឡើងអំពីព័ត៌មានមួយចំនួនរបស់ក្រុមលោកថា «ឆ្នាំនេះគឺជាខួប ២០ឆ្នាំ នៃការបង្កើតក្រុម Japan Football League ដូច្នេះសហព័ន្ធកីឡាបាល់ទាត់ជប៉ុន ក៏ដូចជាក្រុមការងាររបស់ JFL បានពិភាក្សាគ្នា បានឯកភាពជ្រើសរើសក្រុមមួយចំនួន នៅកម្ពុជា ដើម្បីធ្វើការប្រកួតមិត្តភាពនិងអបអរសាទរខួប ២០ឆ្នាំរបស់ JFL តែម្ដង ដែលតំណាងដោយក្រុមកីឡាករជម្រើសលីគទី៤ របស់ជប៉ុន»។
ក្រុម JFL បានធ្វើដំណើរមកដល់ប្រទេសកម្ពុជាមួយរយៈហើយ ដោយបានប្រកួតឈ្នះលើក្រុមជម្រើសជាតិក្រោមអាយុ១៩ឆ្នាំរបស់កម្ពុជា (U19) ដោយលទ្ធផល៤ទល់០ នៅល្ងាចថ្ងៃសុក្រ សប្ដាហ៍នេះលើទីលានពហុកីឡដ្ឋានជាតិដូចគ្នា។ គោលដៅមកប្រទេសកម្ពុជាលើកដំបូងនេះក្រុមJFL បានណាត់ក្រុមកំពូលតារាងលីគកំពូលកម្ពុជា និងក្រុម U19កម្ពុជា ប្រកួតមិត្តភាពមុនត្រឡប់ទៅមាតុភូមិវិញ៕
Source: Kampuchea Thmey Daily
0 Comments