វិសាខា និង​ភ្នំពេញ​ក្រោ​ន សុទ្ធតែ​ឈ្នះ​ដូចគ្នា​តែ​ប៉ូលីស​ស្មើ​ជាមួយ​សូល​ទី​ឡូ​អង្គរ

ក្រុមបាល់ទាត់​ចំណូល​ថ្មី និង​ក្រុម​ជើងឯក​៦​សម័យកាល​ភ្នំពេញ​ក្រោ​ន សុទ្ធតែ​រកបាន​ជ័យជម្នះ​ដូចគ្នា ខណៈ​ក្រុម​អគ្គស្នងការដ្ឋាន​នគរ​បាល​ជាតិ (​ប៉ូលីស​) បាន​ប្រកួត​ស្មើគ្នា​ជាមួយ​ក្រុម​សូល​ទី​ឡូ​អង្គរ នៅក្នុង​សប្ដាហ៍​ទី​១៦ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) នៅ​ល្ងាច​ថ្ងៃ​សៅរ៍ ទី​៤​ខែសីហា ឆ្នាំ​២០១៨​។

ក្រុម​វិសាខា បាន​យកឈ្នះ​លើ​ក្រុម​វេ​ស្ទើ​ន​ភ្នំពេញ ដោយ​លទ្ធផល ៥​ទល់​០ លើ​ទីលាន​កីឡដ្ឋាន​កងយោធពល​ខេមរភូមិន្ទ (​ស្តា​ត​ចាស់​)​។ ប្រធាន​ក្រុម ទៀង ទី​នី រកបាន​គ្រាប់​បាល់​ឲ្យ​វិសាខា នាំមុខ​មុន​នៅ​នាទី​ទី​១៥ ហើយ​កីឡាករ​កូរ៉េខាងជើង​Kim Kyong-hun រកបាន​គ្រាប់​បាល់​ទី​២​នៅ​នាទី​២៦​មុន​ចប់​តង់​ទី​១​។ កីឡាករ Kim Kyong-hun បា​នរក​គ្រាប់​បាល់​បន្ថែម​១​គ្រាប់​ទៀត​នៅ​នាទី​៥១ ស្របពេល​មិត្ត​រួម​ជាតិ​Pak Song-chol​បាន​បន្ថែម​គ្រាប់​បាល់​ទី​៤​នៅ​នាទី​៥៧ និង​១​គ្រាប់​ចុងក្រោយ​រកបាន​ដោយ កែវ សុខ​ផេង នៅ​នាទី​៦៤​។



ចំណែក​ក្រុម​ភ្នំពេញ​ក្រោ​ន វិញ​បាន​យកឈ្នះ​លើ​ក្រុម​ភ្ញៀវ​ព្រះខ័ន​រាជ​ស្វាយរៀង ដោយ​លទ្ធផល​២​ទល់​១ លើ​ទីលាន​កីឡដ្ឋាន RSN Stadium របស់ខ្លួន​។ កីឡាករ​Harley Willard របស់​ព្រះខ័ន​រាជ​ស្វាយរៀង បា​នរក​គ្រាប់​បាល់​នាំមុខ​១​គ្រាប់​នៅ​នាទី​៥៩ ខណៈ​កីឡាករ​Valci Júnior បា​នរក​គ្រាប់​បាល់​ឲ្យ​ភ្នំពេញ​ក្រោ​ន តាម​ស្មើ​១​ទល់​១ នៅ​នាទី​៧៩ និង​កីឡាករ Sunny Jane រកបាន​គ្រាប់​បាល់​ជ័យជម្នះ​នៅ​នាទី​៨៧​មុន​ចប់​ការប្រកួត​។



ងាក​មក​មើល​ក្រុម​អគ្គស្នងការដ្ឋាន​នគរ​បាល​ជាតិ វិញ​បាន​ចែក​គ្នា​ម្នាក់​១​ពិន្ទុ​ជាមួយ​ក្រុម​សូល​ទី​ឡូ​អង្គរ ក្រោយ​ប្រកួត​ស្មើគ្នា​១​ទល់​១ លើ​ទីលាន​ពហុ​កីឡដ្ឋាន​ជាតិ​។ កីឡាករ​Yuta Kikuchi បា​នរក​គ្រាប់​បាល់​ឱ្យ​ក្រុម​សូល​ទី​ឡូ​អង្គរ នាំមុខ​មុន​១​គ្រាប់​សិន​នៅ​នាទី​៤៥ និង​កីឡាករ​Oladipupo Abiodun បាន​គ្រាប់​បាល់​តាម​ស្មើ​វិញ​នៅ​នាទី​៧០​។

ពានរង្វាន់​លី​គ​កំពូល​កម្ពុជា រដូវ​កាល​នេះ​ប្រើប្រាស់​រូបមន្ត​ប្រកួត​សន្សំ​ពិន្ទុ​វិលជុំ​ចំនួន​២​ជើងមាន​២២​សប្ដាហ៍​ដើម្បី​ស្វែងរក​ក្រុម​ខ្លាំង​ ដែល​មាន​ពិន្ទុ​ច្រើនជាងគេ​ដណ្តើម​ជើងឯក​ប្រចាំឆ្នាំ​។ ការប្រកួត​ចាប់ផ្តើម​ពីថ្ងៃ​ទី​៣​ខែមីនា ដល់​ថ្ងៃទី​៣០​ខែកញ្ញា ឆ្នាំ​២០១៨ ដែលមាន​សមាជិក​ចំនួន​១២​ក្រុម​។ ក្រុម​ជើងឯក​នឹង​ទទួលបាន​កៅអី​ទៅ​ចូលរួម​ប្រកួត​ក្នុង​ពានរង្វាន់ AFC Cup 2019, ពានរង្វាន់ Mekong Club Championship ជាដើម​។



ចំណែក​ប្រកួត​ផ្សេងទៀត​ប្រចាំ​សប្ដាហ៍​ទី​១៦ នេះ​បន្ត​ធ្វើឡើង​នៅ​ថ្ងៃអាទិត្យ ទី​៥ ខែសីហា នេះ​ដោយ​ក្រុម​អគ្គីសនី​កម្ពុជា ប៉ះ​ក្រុម​អង្គ​រថា​យ​ហ្គឺ​រ វេលា​ម៉ោង​៣​រសៀល​លើ​ទីលាន​កីឡដ្ឋាន​អគ្គីសនី​កម្ពុជា មាន​ផ្សាយ​ផ្ទាល់​តាម​ហ្វេ​ស​ប៊ុ​ក CNCC ខណៈ​ក្រុម​អាស៊ី​អឺរ៉ុប ជួប​ក្រុម​ណាហ្គា​វើ​ល វេលា​ម៉ោង​៣​រសៀល​ដែរ​លើ​ទីលាន​កីឡដ្ឋាន AEU Sport Park (​ម្តុំ​អរិយ​ក្សត្រ​)៕

   

Source: Kampuchea Thmey Daily