ភ្នំពេញ ៖ លោកសុខ ពេញវុធ អភិបាលនៃគណៈអភិបាលខណ្ឌដូនពេញនៅព្រឹកថ្ងៃ សៅរ៍ ០៨រោច ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ០៤ ខែសីហា ឆ្នាំ២០១៨នេះបានរៀបចំពិធីសំណេះសំណាល និងថ្លែងអំណរគុណ ទៅដល់កម្លាំងប្រជាការពារខណ្ឌដូនពេញ ដែលបានខិតខំបំពេញការងារបានយ៉ាងល្អប្រសើរ ក្នុងការចូលរួមថែរក្សាការពារសន្តិសុខ សណ្តាប់ធ្នាប់សាធារណៈ ការងារអនាម័យបរិស្ថាន ការងារបង្ការពន្លត់អគ្គិភ័យ និងការងារសំខាន់ផ្សេងៗទៀតនៅក្នុងមូលដ្ឋានខណ្ឌ។
ក្នុងពិធីនោះដែរមានការអញ្ជើញចូលរួមពី លោក លោកស្រីអភិបាលរងខណ្ឌ លោកនាយករងរដ្ឋបាល លោកប្រធាន-អនុប្រធានការិយាល័យ និងមន្ត្រីពាក់ព័ន្ធដទៃទៀត រួមទាំងកម្លាំងប្រជាការពារសរុបចំនួន ៨៨រូប។ ជាមួយគ្នានោះ លោកអភិបាលក៏បានថ្លែងអំណរគុណដល់ប្រជាការពារទាំងអស់ ដែលបានខិតខំបំពេញការងារបានយ៉ាងល្អប្រសើរធ្វើឲ្យរដ្ឋបាលខណ្ឌរីកចម្រើនទៅមុខទៀតព្រមទាំងឧបត្ថម្ភ ថវិកាទៅដល់កងកម្លាំងប្រជាការពារទាំងអស់ដែលជាការលើកទឹកចិត្តទៅដល់កងកម្លាំង ដោយប្រធានផ្នែកប្រជាការពារទទួលបានការឧបត្ថម្ភថវិកាចំនួន ២០០,០០០៛ អនុប្រធានផ្នែកទទួលបាន ១០០,០០០៛ , ប្រធានគោលដៅទទួលបាន ៦០,០០០៛ , អនុប្រធានគោលដៅទទួលបាន ៥០,០០០៛ និងប្រជាការពារទាំងអស់ទទួលបាន ៤០,០០០៛ ក្នុងម្នាក់ៗ សរុបថវិកាទាំងអស់ចំនួន ៤,០០០,០០០៛ ។
លោកអភិបាលខណ្ឌដូនពេញ ក៏បានជំរុញឲ្យកម្លាំងទាំងអស់ ត្រូវខិតខំជួយឲ្យអស់ពីកម្លាំងកាយចិត្តបន្តទៀត ធ្វើយ៉ាងណាជួយបម្រើការងារក្នុងមូលដ្ឋានខណ្ឌដូនពេញឲ្យកាន់តែប្រសើរថែមទៀត៕
Source: Kampuchea Thmey Daily
0 Comments