ឃាត់​ខ្លួន​ជនជាតិ​ចិន​ម្នាក់ រួម​ទាំង​គ្រឿងញៀន​ជិត​១០០​គីឡូក្រាម បង្កប់​ជាមួយ​ចំណី​សត្វ ផ្ញើ​ពី​អាល្លឺម៉ង់ ​តាម​ប្រៃសណីយ៍​កម្ពុជា

ភ្នំពេញ ​៖ ថ្នាំញៀន​លាក់​បង្កប់​ជាមួយ​ចំណី​សត្វ ផ្ញើ​មកពី​ប្រទេស​អាល្លឺម៉ង់ តាម​ប្រៃសណីយ៍​កម្ពុជា ត្រូវ​កម្លាំង​សមត្ថកិច្ច​បង្ក្រាប​បាន​ជិត​១០០​គីឡូក្រាម និង​ចាប់ខ្លួន​ជនជាតិ​ចិន​ម្នាក់។

តាម​ប្រភព​ព័ត៌មាន​ពី​សមត្ថកិច្ច​ បាន​អោយ​ដឹង​នៅ​ថ្ងៃទី​១១ ខែសីហា ឆ្នាំ​២០១៨​ថា ប្រតិបត្តិការ​បង្ក្រាប​ការ​លាក់​បង្កប់​គ្រឿងញៀន ផ្ញើ​មកពី​ប្រទេស​អាល្លឺម៉ង់​នេះ បាន​ធ្វើ​ឡើង​ដោយ ​មាន​កិច្ចសហការ​គ្នា​រវាង កម្លាំង​ជំនាញ​នៃ​នាយកដ្ឋាន​សន្តិសុខ​ផ្ទៃក្នុង​ ជាមួយ​កម្លាំង​ចម្រុះ​ប្រចាំការ​នៅ​ប្រៃសណីយ៍​កម្ពុជា ដឹកនាំ​សម្របសម្រួល​ពី​លោក រៀល សុ​ភិន ព្រះរាជអាជ្ញា​រង​ នៅ​ថ្ងៃទី​០៧ ខែសីហា ឆ្នាំ​២០១៨។

ប្រភព​ព័ត៌មាន​ដដែល​បាន​បញ្ជាក់​ថា ក្នុង​ការ​បង្ក្រាប​ករណី​ដឹកជញ្ជូន​គ្រឿងញៀន​តាម​ប្រៃសណីយ៍ ផ្ញើ​ចេញពី​ប្រទេស​អាល្លឺម៉ង់ មក​ប្រទេស​កម្ពុជា ដោយ​លាក់​បង្កប់​ជាមួយ​ចំណី​សត្វ នៅ​ចំណុច​ប្រៃសណីយ៍​កម្ពុជា ផ្លូវ​លេខ​១០២ សង្កាត់​វត្តភ្នំ ខណ្ឌដូនពេញ លទ្ធផល​ ឃាត់ខ្លួន​ជនជាតិ​ចិន​ម្នាក់ ឈ្មោះ YAO ZEYE ភេទ​ប្រុស អាយុ​៣៣​ឆ្នាំ និង​រឹបអូស​វត្ថុតាង គ្រឿងញៀន​ប្រភេទ​ថ្នាំ​គ្រាប់ (Logo LV) អ៊ិ​ច​ស្តា​ស៊ី (MDMA) ទម្ងន់​សរុប​ទម្ងន់​សរុប ​98kg 043.55g។

ក្រោយ​ឃាត់ខ្លួន​ជនសង្ស័យ ត្រូវ​បាន​នគរបាល​បញ្ជូន​ទៅ​ការិយាល័យ​ជំនាញ ​ដើម្បី​ធ្វើការ​សួរនាំ និង​កសាង​សំណុំរឿង​ចាត់ការ​បន្ត​តាម​នីតិវិធី៕



Source: Kampuchea Thmey Daily