តាកែវ ៖ ជនសង្ស័យក្នុងបទល្មើសប្រព្រឹត្តអំពើចោរកម្មយ៉ាងសកម្មម្នាក់ ត្រូវបានកម្លាំងប៉ូលិសជំនាញខណ្ឌចំការមន រាជធានីភ្នំពេញចាប់ខ្លួនបាន និងបញ្ជូនមកឲ្យបង្ហាញទីតាំងលាក់ទុកវត្ថុតាងដែលបានធ្វើកន្លងមកនៅស្រុកសំរោង ខេត្តតាកែវ។
ការចាប់បាន និងបញ្ជូនខ្លួនឲ្យបង្ហាញទីតាំងនេះ ធ្វើឡើងនៅព្រឹកថ្ងៃទី០៥ ខែសីហា ឆ្នាំ២០១៨ ដោយមានការបញ្ជាពីលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ និងមានការអនុញ្ញាតពីលោក ជីវ ចាន់ដារ៉ា ព្រះរាជអាជ្ញាអមសាលាដំបូងខេត្តតាកែវ និងលោកវរសេនីយ៍ឯក មឿន សារុន អធិការនគរបាលស្រុកសំរោង។
ជនសង្ស័យ ដែលសមត្ថកិច្ចនាំយកមកបង្ហាញទីតាំង ដែលជាផ្ទះរបស់ខ្លួននេះ មានឈ្មោះ សន សំអាត ភេទប្រុស អាយុ៤០ឆ្នាំ មុខរបរមិនពិតប្រាកដ រស់នៅភូមិពេជឥន្ទ្រា ឃុំបឹងត្រាញ់ខាងជើង ស្រុកសំរោង ខេត្តតាកែវ។
ករណីនេះលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវបានប្រាប់ថា កាលពីយប់ថ្ងៃទី០៣ ខែសីហា ឆ្នាំ២០១៨ នៅចំណុចស្ដុបផ្សារដើមគរកម្លាំងសមត្ថកិច្ចនគរបាលខណ្ឌចំការមនចាប់បានជនសង្ស័យខាងលើក្នុងសកម្មភាពមិនប្រក្រតី ដែលសង្ស័យជាក្រុមចោរប្លន់។
ក្រោយការចាប់ខ្លួនប៉ូលិសខណ្ឌចំការមនបានសហការមកកម្លាំងជំនាញនៃស្នងការនគរបាលខេត្តតាកែវរហូតទទួលបានការអនុញ្ញាតពីលោកព្រះរាជអាជ្ញាចុះទៅឆែកឆេរផ្ទះជនសង្ស័យតែម្តង។ ក្នុងផ្ទះជនសង្ស័យកម្លាំងប៉ូលិសបានរកឃើញវត្ថុតាងមាន ខ្នងកង់ម៉ូតូចំនួន០១ កញ្ចក់ម៉ូតូចំនួន១០គូរ និងសោសម្រាប់ដោះម៉ូតូមួយចំនួនទៀតផងដែរ។
បច្ចុប្បន្នក្រោយពីកម្លាំងជំនាញចុះប្រតិបត្តិការត្រួតពិនិត្យ និងចាប់យកវត្ថុតាងខាងលើហើយនោះជនសង្ស័យត្រូវបានបញ្ជូនទៅអធិការដ្ឋាននគរបាលខណ្ឌចំការមនវិញដើម្បីចាត់ការតាមនីតិវិធី៕
Source: Kampuchea Thmey Daily
0 Comments