សៀមរាប ៖ ប្រពលរដ្ឋរួមនិងអាជីវករផ្សារដំដែក បាននាំគ្នាដេញចាប់ជនសង្ស័យម្នាក់ប្រគល់ឲ្យប៉ូលិសនិងស្វាគមន៍ម្នាក់មួយដៃជើងទុកជាការហាត់ប្រាណ ខណៈជននោះឆ្មក់កាច់សោរកម៉ូតូក្នុងផ្សារនេះទាំងព្រឹក។
ហេតុការណ៍កើតឡើងនៅម៉ោង៦និង៣០នាទី ថ្ងៃទី២៥ ខែសីហាឆ្នាំ២០១៨នៅក្នុងផ្សារលំនៅភូមិ ដំដែកលើ ឃុំដំដែក ស្រុកសូទ្រនិគម ខេត្តសៀមរាប។
លោកឧត្តមសេនីយ៍ត្រី ភឹង ចន្តារ៉េត ស្នងការរងទទួលផែនកណ្តាលព្រហ្មទណ្ឌនគរបាលខេត្តសៀមរាបបានឲ្យដឹងថា ក្រោយពីទទួលបានសេចក្តីរាយការណ៍ពីពលរដ្ឋកម្លាំងនគរបាលមូលដ្ឋាននៃស្រុកសូទ្រនិគម បានចុះទៅដល់គោលដៅភ្លាមៗផងដែរ។
លោកបន្តថា ជនរងគ្រោះ ឈ្មោះ ឈិន មុំ ភេទស្រី អាយុ៥៤ឆ្នាំ ទីលំនៅភូមិ ដំដែកលើ ឃុំដំដែក ស្រុកសូទ្រនិគម ខេត្តសៀមរាប មុខរបរលក់ដូរ។ ចំណែកជនសង្ស័យឈ្មោះ ឆែម ម៉ៅ ហៅគក់ ភេទប្រុស អាយុ៣៩ឆ្នាំ ទីលំនៅភូមិ គោកតាងួន ឃុំ ត្រពាំងឫស្សី ស្រុកកំពង់ស្វាយ ខេត្តកំពង់ធំ។
លោកបន្តថា មុនពេលកើតហេតុជនរងគ្រោះបានជិះម៉ូតូម៉ាកហុងដាឌ្រីម ០១៨ ពណ៌ខ្មៅមិនទាន់ធ្វើស្លាកលេខ លេខម៉ាស៊ីន5310008 មកផ្សារដំដែក ហើយបានទុកផ្ញើនិងគេរួចដើរចូលផ្សារ។ ក្រោយមកជនសង្ស័យខាងលើបានដើរចូលទៅតម្រង់ម៉ូតូ ហើយកាច់សោរកតែម្តង។ ពេលនោះអ្នកជិតខាងឃើញទាន់ក៏ស្រែកឆោឡោឡើង នាំគ្នាចាប់ជាប់តែម្តង។
ពេលចាប់បានម៉ូតូ កាច់បែកគ្រាប់សោហើយ។ ជនសង្ស័យបច្ចុប្បន្ននេះកំពុងឃាត់និងសួរនៅកន្លែងអធិការដ្ឋានក្រោយពេលសួរចម្លើយ។ ជននេះបានសារភាពថា ខ្លួនពិតជាបានប្រព្រឹត្តប្រាកដមែន។ វត្ថុតាង ដកហូតបាន មានដែកសម្រាប់កាច់សោរកម៉ូតូរាងអក្សរអិល ចំនួនមួយ។
បច្ចុប្បន្នកម្លាំងនគរបាលជំនាញកំពុងរៀបចំសំណុំរឿងដើម្បីបញ្ជូនខ្លួនជនសង្ស័យខាងលើនេះទៅតុលាការ៕
Source: Kampuchea Thmey Daily
0 Comments