សៀមរាប ៖ កម្លាំងនគរបាលជំនាញក្រុងនិងខេត្ត បានសហការគ្នាចុះបង្ក្រាបទីតាំងលូចលេងល្បែងស៊ីសងខុសច្បាប់មួយកន្លែង និង ឈានដល់ឃាត់ខ្លួនម្ចាស់ផ្ទះម្នាក់និងក្រុមអ្នកញៀនល្បែង៣នាក់ទៀត យកមកសួរនាំនៅស្នងការនគរបាលខេត្ត ចំណែក៣នាក់ ជាអ្នកលេង ត្រូវធ្វើកិច្ចសន្យាឲ្យត្រឡប់ទៅផ្ទះវិញ។
ហេតុការណ៍ឃាត់ខ្លួនជនសង្ស័យទាំង៤នាក់ ធ្វើឡើងនៅវេលាម៉ោង១៦និង៣០នាទីល្ងាច ថ្ងៃទី២៤ ខែសីហា ឆ្នាំ២០១៨ ស្ថិតនៅចំណុចផ្សារភ្នំក្រោម ក្នុងភូមិភ្នំក្រោម សង្កាត់សៀមរាប ក្រុង សៀមរាប។
លោកឧត្តមសេនីយ៍ត្រី ភឹង ចន្តារ៉េត ស្នងការរងទទួលផែនកណ្តាលព្រហ្មទណ្ឌនគរបាលខេត្តសៀមរាបបានឲ្យដឹងថា កម្លាំងព្រហ្មទណ្ឌក្រុង សៀមរាប សហការជាមួយកម្លាំងព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប បានចុះបង្ក្រាប ករណីលេងល្បែងស៊ីសងខុសច្បាប់(ខ្លាឃ្លោក) ស្ថិតនៅចំណុចផ្សារភ្នំក្រោម ក្នុងភូមិភ្នំក្រោម សង្កាត់សៀមរាប ក្រុង/ខេត្តសៀមរាប។ នៅក្នុងប្រតិបត្តិការនោះ សមត្ថកិច្ចដកហូតវត្ថុតាង រួមទាំងឃាត់ខ្លួនជនសង្ស័យចំនួន០៤នាក់ យកមកសួរនាំនៅស្នងការនគរបាលខេត្ត។
លោកបន្តថា ជនសង្ស័យទី១/ឈ្មោះ អេង ចំរើន ភេទប្រុសអាយុ៣៥ឆ្នាំ (ជាអ្នកបើក និងជាមេល្បែងខ្លាឃ្លោក) រស់នៅភូមិភ្នំក្រោម សង្កាត់សៀមរាបក្រុង,ខេត្តសៀមរាប ទី២/ឈ្មោះ ស៊ីន រុន ភេទប្រុស អាយុ២៦ឆ្នាំ នៅភូមិជុំគ្នា(ជាអ្នកលេងល្បែង) ទី៣/ឈ្មោះ សំ ធី ភេទប្រុសអាយុ៤៨ឆ្នាំ រស់នៅភូមិ៣ សង្កាត់ចុងឃ្នៀស(ជាអ្នកលេងល្បែង) និង ទី៤/ឈ្មោះ លួន ណេត ភេទស្រី អាយុ៤៥ឆ្នាំរស់នៅភូមិពោធិបន្ទាយជ័យ សង្កាត់សៀមរាប(ជាអ្នកលេងល្បែង)។
ក្រោយពីនាំខ្លួនជនសង្ស័យខាងលើមកសួរនាំពួកគេបានសារភាពថា ពិតជាបានលេងល្បែងស៊ីសងខុសច្បាប់ពិតប្រាកដមែន។ រីឯ ឈ្មោះ អេង ចំរើន ដែលជាម្ចាស់ផ្ទះ(ជាអ្នកបើកឲ្យចូលលេង ផងនោះ ដែលសមត្ថកិច្ចយើងធ្លាប់ចុះបង្ក្រាបម្តង ហើយ ព្រមទាំងបានធ្វើកិច្ចសន្យាបញ្ឈប់បើកលេងល្បែងស៊ីសងខុសច្បាប់ផងដែរ តែជនសង្ស័យរូបនេះមិនរាងចាលនោះទេ។
ប្រភពបានបញ្ជាក់បន្ថែមថា ចំពោះជនសង្ស័យ ឈ្មោះ អេង ចំរើន ភេទប្រុស អាយុ៣៥ឆ្នាំ រស់នៅភូមិកើតហេតុខាងលើ ត្រូវបានកម្លាំងជំនាញ សូមគោលការណ៍ថ្នាក់លើ ដើម្បីឃាត់ខ្លួន រួចបញ្ជូនទៅតុលាការចាត់ការតាមផ្លូវច្បាប់ ចំណែក ជនសង្ស័យចំនួន០៣នាក់ ជាអ្នកលេង មានឈ្មោះ សំ ធី .ឈ្មោះ ស៊ីន រុន .ឈ្មោះ លួន ណេត ត្រូវបានកម្លាំងជំនាញអនុញ្ញាតិឲ្យមានអ្នកសុំធានាខ្លួនបណ្តោះអាសន្នត្រឡប់ទៅផ្ទះវិញ។
បច្ចុប្បន្នកម្លាំងជំនាញ រៀបចំកសាងសំណុំរឿងបញ្ជូនខ្លួនម្ចាស់ទីតាំងទៅតុលាការខេត្ត ដើម្បីចាត់ការទៅតាមផ្លូវច្បាប់៕
Source: Kampuchea Thmey Daily
0 Comments