ប្រទេសកូរ៉េខាងត្បូងបានឲ្យដឹងកាលពីថ្ងៃចន្ទថា ខ្លួនអាចនឹងពន្យាពេលការបើកការិយាល័យទំនាក់ទំនងមួយនៅក្នុងប្រទេសកូរ៉េខាងជើងបន្ទាប់ពីដំណើរទស្សនកិច្ចរបស់រដ្ឋមន្ត្រីក្រសួងការបរទេសអាមេរិកលោក Mike Pompeo ទៅកាន់ក្រុងព្យុងយ៉ាងត្រូវបានលុបចោលភ្លាមៗដោយលោក ដូណាល់ ត្រាំ។
កាលពីថ្ងៃសុក្រលោក ត្រាំ បានលុបចោលដំណើរទស្សនកិច្ចនេះដោយស្តីបន្ទោសពីកង្វះវឌ្ឍនភាពក្នុងកិច្ចខិតខំប្រឹងប្រែងរំសាយអាវុធនុយក្លេអ៊ែរចាប់តាំងពីកិច្ចប្រជុំកំពូលជាប្រវត្តិសាស្ត្រជាមួយមេដឹកនាំកូរ៉េខាងជើងលោកគីមជុងអ៊ុននៅក្នុងខែមិថុនា។
ការលុបចោលភ្លាមៗនេះបានធ្វើឲ្យកកស្ទះផែនការរបស់ក្រុងសេអ៊ូលក្នុងការបើកការិយាល័យទំនាក់ទំនងមួយនៅកូរ៉េខាងជើងបន្ទាប់ពីមានការវិវត្តផ្នែកការទូតយ៉ាងឆាប់រហ័សលើឧបទ្វីបកូរ៉េ។
អ្នកនាំពាក្យប្រធានាធិបតីកូរ៉េខាងត្បូងលោក Kim Eui-kyeom បានប្រាប់ក្រុមអ្នកយកព័ត៌មានថា “ខ្ញុំមិនអាចនិយាយថាវានឹងមិនមានផលប៉ះពាល់អ្វីទេ”។ លោកបានបន្ថែមថា “យើងកំពុងពិចារណាបើកការិយាល័យទំនាក់ទំនងនេះជាផ្នែកមួយនៃព្រឹត្តិការណ៍ដ៏រលូនរួមទាំងដំណើរទស្សនកិច្ចរបស់លោក Pompeo ទៅកាន់ប្រទេសកូរ៉េខាងជើងនិងកិច្ចប្រជុំកំពូលអន្តរកូរ៉េផងដែរប៉ុន្តែវាចាំបាច់ត្រូវពិនិត្យឡើងវិញចាប់តាំងពីស្ថានភាពថ្មីមួយបានកើតឡើង”។
ការបង្កើតការិយាល័យទំនាក់ទំនងអន្តរកូរ៉េត្រូវបានព្រមព្រៀងគ្នារវាងលោកប្រធានាធិបតីកូរ៉េខាងត្បូង មូន ចេអ៊ីន និងលោក គីម របស់ប្រទេសកូរ៉េខាងជើងនៅឯកិច្ចប្រជុំកំពូលរបស់ពួកគេក្នុងខែមេសា។
លោក មូន បានគាំទ្រការចូលរួមជាមួយកូរ៉េខាងជើងហើយបានជំរុញឲ្យមានការបន្តកិច្ចសហប្រតិបត្តិការឆ្លងកាត់ព្រំដែនឡើងវិញ។
មេដឹកនាំកូរ៉េខាងត្បូងរូបនេះគ្រោង នឹងធ្វើទស្សនកិច្ចទីក្រុងព្យុងយ៉ាងនៅខែក្រោយសម្រាប់អ្វីដែលជាជំនួបលើកទី៣របស់លោកជាមួយលោកគីមក្នុងឆ្នាំនេះ។
ប៉ុន្តែការិយាល័យដែលមានទីតាំងនៅទីក្រុង Kaesong របស់កូរ៉េខាងជើង បានលើកឡើងពីការព្រួយបារម្ភថា ការផ្ទេរសម្ភារៈនៅទីនោះអាចរំលោភលើការដាក់ទណ្ឌកម្មរបស់អង្គការសហប្រជាជាតិប្រឆាំងនឹងប្រទេសកូរ៉េខាងជើង។
ទោះបីជាយ៉ាងណាក៏ដោយ ក្រសួងបង្រួបបង្រួមរបស់ក្រុងសេអ៊ូលកាលពីថ្ងៃចន្ទបានច្រានចោលការចោទប្រកាន់នេះដោយនិយាយថា ទំនិញទាំងអស់ត្រូវបានផ្ទេរដើម្បីកសាង និងដំណើរការការិយាល័យនិងមិនមែនសម្រាប់ផលប្រយោជន៍សេដ្ឋកិច្ចរបស់កូរ៉េខាងជើងនោះទេ៕ AFP
Source: Kampuchea Thmey Daily
0 Comments