បន្ទាយមានជ័យ ៖ នៅព្រឹកថ្ងៃ២៤ ខែសីហា ឆ្នាំ២០១៨នេះ នៅសាលប្រជុំក្នុងសណ្ឋាគារព្រះច័ន្ទ ស្ថិត ក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យបានបើកសិក្ខាសាលាផ្សព្វផ្សាយស្តីពីការណែនាំអនុវត្តបទប្បញ្ញត្តិស្តីពីពន្ធលើប្រតិបត្តិការរុករកប្រេងកាតនៅតាមភូមិភាគ១ ខេត្តបន្ទាយមានជ័យ ដែលមានការចូលរួមលោក សុខ ឆៀង អនុនាយកដ្ឋាននីតិកម្ម គោលនយោបាយសារពើពន្ធ និងសហប្រតិបត្តិការពន្ធអន្តរជាតិ តំណាងដ៏ខ្ពង់ខ្ពស់របស់ ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកដ្ឋានពន្ធដារ លោកព្រឹម សាលី ប្រធានសាខាពន្ធដារខេត្តបន្ទាយមានជ័យ មន្ត្រីសាខាពន្ធដារ ចំនួន៥ខេត្ត រួមមាន ខេត្តសៀមរាប ឧត្តរមានជ័យ បាត់ដំបង ប៉ៃលិន និងខេត្តបន្ទាយមានជ័យ រួមទាំងអ្នកជាប់ពន្ធ ប្រមាណជាង១៥០នាក់បានចូលរួមក្នុង សិក្ខាសាលានេះផងដែរ។
លោកព្រឹម សាលី បានមានប្រសាសន៍ក្នុងពិធីសិក្ខាសាលានេះថា គឺមានគោលបំណងអ្នកជាប់ព័ន្ធឲ្យបានយល់ដឹងអំពីបទប្បញត្តិ ស្តីពីពន្ធលើប្រតិបត្តិការរុករកប្រេងកាតនិងធនធានរ៉ែដើម្បីយកទៅអនុវត្តឲ្យបានត្រឹមត្រូវ។
ក្នុងនោះ ក៏មានបទបង្ហាញអំពីបទប្បញត្តិស្តីពីពន្ធលើប្រតិបត្តិការប្រេងកាតនិងធនធានរ៉ែផងដែរដើម្បីសម្រេចក្នុងគោលបំណងអ្នកជាប់ពន្ធឲ្យបានយល់កាន់តែច្បាស់នោះលោកបានឲ្យអ្នកជាប់ពន្ធ ប្រមាណជាង១៥០នាក់លើកជាសំណួរនូវរាល់ចម្ងល់ដើម្បីឲ្យមន្ត្រីជំនាញអាចធ្វើការពន្យល់បញ្ជាក់កាន់តែច្បាស់ពីបទប្បញត្តិស្តីពីពន្ធលើប្រតិបត្តិការប្រេងកាតនិងធនធានរ៉ែធម្មជាតិនេះផងដែរ។
ក្នុងនោះលោក សុខ ឆៀងក៏បានមានប្រសាសន៍ដែរថា ក្នុងប្រទេសកម្ពុជាយើងសព្វថ្ងៃនេះសម្បូរទៅដោយធនធានធម្មជាតិហើយអ្នកជំនាញកំពុងទាញយកផលពីធម្មជាតិដូចជារ៉ែពីកំរិតតូចដល់កំរិតធំមកធ្វើអាជីវកម្ម ហើយចាំបាច់ត្រូវមានការគ្រប់គ្រងច្បាស់លាស់ ប្រមូលចំណូលចូលថវិកាជាតិដើម្បីអភិវឌ្ឍសេដ្ឋកិច្ចជាតិឲ្យកាន់តែរីកចម្រើននិងធានានិរន្តរភាពនៃចំណូល។លោកបានបញ្ជាក់ឲ្យឥដឹងទៀតថា ឆ្នាំ២០១៤ដល់ឆ្នាំ២០១៨នេះ រដ្ឋតម្រូវឲ្យមានការរៀបចំច្បាស់នូវបទប្បញត្តិស្តីពីពន្ធដារការធ្វើវិសោធនកម្ម និង កែសម្រួលច្បាប់ស្តីពីពន្ធលើប្រតិបត្តិការរុករកប្រេងកាតនិងធនធានរ៉ែគោលបំណងប្រមូលចំណូលព័ន្ធពីវិស័យប្រេងកាតនេះ ដើម្បីយកមកកសាងជាតិឲ្យកាន់តែមានការរីកចម្រើននៅលើតំបន់អាស៊ីយើងនេះ៕
Source: Kampuchea Thmey Daily
0 Comments