មេដឹកនាំ​ក្រុម​ហា​ម៉ាស​ជួបប្រជុំគ្នា​នៅ​ហ្គា​ហ្សា​ចំពេល​មាន​របាយការណ៍​ស្តី​ពីបទ​ឈប់​បាញ់​ជាមួយ​អ៊ីស្រាអែល

ក្រុមមន្ត្រី​បាន​និយាយថា មេដឹកនាំ​ចលនា​ឥស្លាម​ប៉ា​ឡេ​ស្ទី​ន​ហា​ម៉ាស ​បាន​កោះប្រជុំ​នៅ​យប់​ថ្ងៃ​សុក្រ​សម្រាប់​កិច្ចប្រជុំ​ដ៏​កម្រ​មួយ​ចំ​ពេល​មានការ​រំពឹង​ទុក​ពី​បទ​ឈប់​បាញ់​រយៈពេល​យូរ​រវាង​មេដឹកនាំ​តំបន់​ហ្គា​ហ្សា​ស្ទ្រី​ប ​និង​អ៊ីស្រាអែល។

កិច្ចប្រជុំ​នេះ​បាន​កើតឡើង​ចំពេល​ដែល​ជនជាតិ​ប៉ា​ឡេ​ស្ទី​ន​ម្នាក់​ត្រូវបាន​បាញ់សម្លាប់​ដោយ​កងកម្លាំង​អ៊ីស្រាអែល​នៅក្នុង​ការប៉ះទង្គិច​គ្នា​តាម​បណ្តោយ​ព្រំដែន ហ្គា​ហ្សា​-​អ៊ីស្រាអែល​។​
​
មុនពេល​នៃ​ការជួប​ជុំគ្នា​នេះ លោក Hassam Badran ដែលជា​សមាជិក​នៃ​បក្សពួក​នយោបាយ​របស់​ក្រុម​ហា​ម៉ា​សបាន​និយាយ​នៅក្នុង​អំឡុង​សុន្ទរកថា​មួយ​នៅតាម​ព្រំដែន​ថា មេដឹកនាំ​នឹង​ជំរុញ​ឲ្យ​មាន​សកម្មភាព​នយោបាយ​ដើម្បី​បំបែក​ការហ៊ុមព័ទ្ធ​លើ​តំបន់​ហ្គា​ហ្សា​។​
​
ប្រភព​ជាន់ខ្ពស់​របស់​ក្រុម​ហា​ម៉ា​សបាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះថា កិច្ចប្រជុំ​ពេល​ល្ងាច​មួយ​នេះ​ត្រូវបាន​ដឹកនាំ​ដោយ​មេដឹកនាំ​របស់​ចលនា​នេះ​គឺ​លោក Ismail Haniya ។​
​
ប្រភព​ដដែល​បាន​និយាយថា សមាជិក​ទាំងឡាយ​នឹង​ពិភាក្សា​អំពី​បញ្ហាសំខាន់ៗ​មួយចំនួន​ដូចជា​សំណើ​របស់​អេ​ហ្ស៊ី​ប​និង​ប្រេសិត​អង្គការសហប្រជាជាតិ​លោក Nickolay Mladenov អំពី​បទ​ឈប់​បាញ់​មួយ​និង​ដក​ការរារាំង​របស់​អ៊ីស្រាអែល​ដែល​បានដាក់​លើ​តំបន់​ហ្គា​ហ្សា​ជាដើម​។​
​
ពួកគេ​បាន​បន្ថែមថា កិច្ចប្រជុំ​នេះ​បាន​ក្លាយជា​លើកទីមួយ​ដោយ​ការិយាល័យ​នយោបាយ​របស់​ក្រុម​ហា​ម៉ាស​ដែល​បាន​ប្រព្រឹត្ត​ធ្វើឡើង​នៅ​តំបន់​ហ្គា​ហ្សា​។​
​
កាលពី​ថ្ងៃ​ព្រហស្បតិ៍ ប្រទេស​អ៊ីស្រាអែល​បានដាក់​ការរារាំង​ឡើងវិញ​លើ​ការផ្គត់ផ្គង់​ប្រេង​ទៅកាន់​តំបន់​នេះ​ដើម្បី​ជាការ​ឆ្លើយតប​ទៅនឹង​ការលេចចេញ​ជាថ្មី​នូវ​ការ​បង្ហោះ​ខ្លែង​ដុត​ភ្លើង​ឆ្លងកាត់​ព្រំដែន​។​
​
នាយករដ្ឋមន្ត្រី​អ៊ីស្រាអែល​លោក Benjamin Netanyahu កាលពី​ថ្ងៃ​ព្រហស្បតិ៍​បាន​ពន្យារពេល​ដំណើរ​ទស្សនកិច្ច​តាម​ការគ្រោងទុក​មួយ​ទៅ​ប្រទេស​កូ​ឡុំ​ប៊ី​ស្របពេល​មានការ​សន្និដ្ឋានថា កិច្ចព្រមព្រៀង​ឈប់​បាញ់​មួយ​អាច​ត្រូវ​បានសម្រេច​ក្នុង​រយៈពេល​ប៉ុន្មាន​ថ្ងៃនេះ​។​

​យោងតាម​ក្រុម​ហា​ម៉ាស​និង​មន្ត្រី​អង្គការសហប្រជាជាតិ​បាន​ឲ្យ​ដឹងថា កិច្ចព្រមព្រៀង​បែបនេះ​នឹង​បញ្ចប់​ការប្រយុទ្ធ​គ្នា​ជា​យូរ​មកហើយ​រវាង​អ៊ីស្រាអែល​និង​ហា​ម៉ាស​ជា​ថ្នូរ​នឹង​ការបន្ធូរបន្ថយ នូវ​ការរាំងស្ទះ​សេដ្ឋកិច្ច​លើ​តំបន់​ហ្គា​ហ្សា​។​
​
កិច្ចព្រមព្រៀង​មួយ​អាច​អនុញ្ញាត​ឲ្យ​ម្ចាស់ជំនួយ​អន្តរជាតិ​ផ្តល់​មូលនិធិ​ដល់​កម្មវិធី​ជាច្រើន​រាប់បញ្ចូល​ទាំង​ការធ្វើ​ឲ្យ​ប្រសើរឡើង​នូវ​បណ្តាញ​អគ្គិសនី​និង​បណ្តាញទឹក​នៅ​ហ្គា​ហ្សា​ផងដែរ​។​
​
ប្រព័ន្ធ​ផ្សព្វផ្សាយ​អ៊ីស្រាអែល​បាន​រាយការណ៍​ថា កិច្ចព្រមព្រៀង​នេះ​ក៏​អាច​គ្របដណ្តប់​លើ​ការដោះដូរ​អ្នកទោស​ជាមួយ​ក្រុម​ហា​ម៉ាស​ផងដែរ​។​
​
គួរ​បញ្ជាក់ថា ជនជាតិ​ប៉ា​ឡេ​ស្ទី​ន​យ៉ាងតិច​១៥៨​នាក់​ត្រូវបាន​សម្លាប់​នៅក្នុង​បាតុកម្ម​តាម​ព្រំដែន​ដែល​បានចាប់ផ្តើម​នៅ​ចុង​ខែមីនា​ខណៈដែល​ទាហាន​អ៊ីស្រាអែល​ម្នាក់​ត្រូវបាន​បាញ់សម្លាប់​៕ AFP

​

Source: Kampuchea Thmey Daily