កោះ​តៃវ៉ាន់​ប្រារព្ធ​ខួប​៦០​ឆ្នាំ​ចាប់តាំងពី​ការវាយប្រហារ​របស់​ចិន ​ខណៈ​ភាព​តានតឹង​កើនឡើង

ប្រធានាធិបតី​តៃវ៉ាន់​លោកស្រី Tsai Ing-wen បាន​អំពាវនាវ​ឲ្យ​មាន​សាមគ្គីភាព​និង​បាន​សន្យា​មិន​ឱនក្បាល​ចំពោះ​ការដាក់​សម្ពាធ​ពី​ទីក្រុង​ប៉េកាំង​ឡើយ​កាលពី​ថ្ងៃ​ព្រហស្បតិ៍​ ខណៈ​ពេល​កោះ​នេះ​បាន​ប្រារព្ធ​ខួប​លើក​ទី​៦០​នៃ​ការវាយប្រហារ​សម្លាប់​ម​នុស្ស​ដោយ​កាំភ្លើង​ធំ​របស់​ចិន។

ខួប​នៃ​ការវាយប្រហារ​លើ​កោះ Kinmen ដែល​គេ​ស្គាល់​ថា “823 bombardment” បាន​កើតឡើង​ចំពេល​ដែល​ប្រទេស​ចិន​បង្កើន​ការគាបសង្កត់​ទៅលើ​តៃវ៉ាន់​ដែល​ខ្លួន​មើលឃើញថា​ជា​ផ្នែក​មួយ​នៃ​ទឹកដី​របស់ខ្លួន​ដែល​នឹងត្រូវ​បង្រួបបង្រួម​។​
​
កងទ័ព​រំដោះប្រជាជន​ចិន​បាន​បាញ់​គ្រាប់ផ្លោង​ចំនួន​៤៧០,០០០​គ្រាប់​ដាក់​កោះ Kinmen និង​កោះ​ក្បែរៗ​នោះ​ក្នុង​ឆ្នាំ​១៩៥៨​ដោយបាន​សម្លាប់​ទាហាន​និង​ជន​ស៊ីវិល​ចំនួន​៦១៨​នាក់​ក្នុងការ​វាយប្រហារ​មួយ​ដែល​អូសបន្លាយ​ពេល​៤៤​ថ្ងៃ​។​
​
លោកស្រី Tsai បាន​និយាយ​នៅលើ​ទំព័រ Facebook របស់លោក​ស្រី​ថា “​នៅពេល​យើង​ចងចាំ​អំពី '823 bombardment' នៅ​៦០​ឆ្នាំក្រោយ យើង​នឹងមិន​បំភ្លេច​ពី​ស្មារតី​សាមគ្គីភាព​នោះទេ​”​។​
​
លោកស្រី​បាន​បន្ថែមថា “​នៅពេល​យើង​ប្រឈមមុខ​នឹង​សម្ពាធ​ការទូត យើង​នឹងមិន​ភ្លេច​ទេ​ថា ប្រទេស​របស់​យើង​រឹងមាំ​កម្រិតណា​នៅពេលដែល​ពួកយើង​រួបរួមគ្នា​”​។​
​
ភាព​តានតឹង​ជាមួយ​ក្រុង​ប៉េកាំង​កាន់តែ​អាក្រក់​ទៅៗ​នៅក្រោម​ការ​កាន់តំណែង​របស់លោក​ស្រី Tsai ដោយសារតែ​លោកស្រី​បដិសេធ​ទទួលស្គាល់ថា កោះ​តៃវ៉ាន់​គឺជា​ផ្នែក​មួយ​នៃ​គោលការណ៍ “​ចិន​តែមួយ​”​។​
​
ជាការ​ឆ្លើយតប ប្រទេស​ចិន​បាន​បង្កើន​សមយុទ្ធ​យោធា​និង​ឆក់យក​សម្ព័ន្ធមិត្ត​ការទូត​ផ្លូវការ​របស់​កោះ​តៃវ៉ាន់​។ អែល​សាល់​វ៉ា​ឌ័​រ​បាន​ក្លាយជា​ប្រទេស​ទី​៣​ក្នុងឆ្នាំនេះ​ដែល​ផ្លាស់ប្តូរ​ទំនាក់ទំនង​ពី​ទីក្រុង​តៃប៉ិ​ទៅរក​ទីក្រុង​ប៉េកាំង​កាលពី​ថ្ងៃ​អង្គារ​។​
​
ក្នុង​ពិធី​ខួប​ដែល​ប្រា​ព្ធ​ធ្វើឡើង​នៅលើ​កោះ Kinmen, រដ្ឋមន្ត្រី​ក្រសួងការពារជាតិ​កោះ​តៃវ៉ាន់​លោក Yen De-fa បាន​និយាយថា កងទ័ព​តៃវ៉ាន់​នៅថ្ងៃនេះ​ត្រូវតែ “​ត្រៀមខ្លួន​ប្រយុទ្ធ​” ជាថ្មី​ម្តងទៀត​ស្របពេល​ប្រឈមមុខ​នឹង​អ្វីដែល​លោក​បាន​ពណ៌នា​ថា ជាការ​គំរាមកំហែង​ផ្នែក​យោធា​កាន់តែខ្លាំង​ឡើង​ពី​សំណាក់​ប្រទេស​ចិន​៕ AFP

​

Source: Kampuchea Thmey Daily