កំពង់ចាម ៖ នៅថ្ងៃទី២៣ ខែសីហា ឆ្នាំ២០១៨នេះ ទឹកទន្លេមេគង្គក្នុងខេត្តកំពង់ចាម មានកម្ពស់១៥.៤៨ម៉ែត្រ ដែលខ្ពស់លើសជិត០.៣ម នៃកម្រិតប្រកាសអាសន្នដែលមានកម្ពស់ត្រឹម១៥.២០ម៉ែត្រ។
ដោយមានការព្រួយបារម្ភចំពោះគ្រោះមហន្តរាយ ដោយសារទឹកជំនន់ នៅពេលនេះ លោក គួច ចំរើន អភិបាលនៃគណៈអភិបាលខេត្តកំពង់ចាម បានអញ្ជើញចុះពិនិត្យស្ថានភាពទឹកជាប្រចាំ ព្រមទាំងបានចាត់តាំងឲ្យមន្ត្រីជំនាញ ចុះធ្វើការបិទសន្ទះទ្វារទឹក និងរៀបចំស្ថានីយបូមទឹក ចំនួន២កន្លែង ក្រុងកំពង់ចាម គឺ១កន្លែងនៅមាត់ទន្លេសង្កាត់កំពង់ចាម និងមួយកន្លែងទៀតនៅទំនប់ព្រែកដើមចាន់ សង្កាត់សំបួរមាសក្រុងកំពង់ចាម ដើម្បីធ្វើការបូមទឹកលូ បញ្ជូនទៅទន្លេ ការពារកុំឲ្យទឹកលិចក្រុងកំពង់ចាម។
លោកគួច ចំរើន បានអំពាវនាវដល់បងប្អូនប្រជាពលរដ្ឋ ដែលរងគ្រោះដោយទឹកជំនន់ អោយបង្កើនការប្រុងប្រយ័ត្នខ្ពស់ ការពារថែរក្សា កូនចៅរបស់ខ្លួន កុំអោយចុះលេងទឹក និងការពារសត្វអាសិរពិស ដែលវារ រត់គេចពីជម្រករបស់វាត្រូវទឹកលិច ហើយមកសំងំលាក់ខ្លួននៅជិតយើងរង់ចាំឱកាសនឹងសម្លាប់យើង។
គណៈកម្មាធិការគ្រប់គ្រងគ្រោះមហន្តរាយ ខេត្តកំពង់ចាម បានឲ្យដឹងថា ចាប់ពីទឹកទន្លេមេគង្គចាប់ផ្ដើមហក់ឡើង រហូតមកដល់ពេលនេះ គឺមានមនុស្សចំនួន៤៤នាក់ បានរងរបួសដោយសត្វអាសិរពិស និង១៥នាក់ បានលង់ទឹកស្លាប់ ក្នុងនោះក៏មានកុមារ៥នាក់ទៀតផង។
ស្រុកដែលរងការខូចខាតដោយសារទឹកជំនន់ទន្លេមេគង្គ នៅខេត្តកំពង់ចាម គឺមានចំនួន៩ស្រុក ក្នុងនោះមានចំនួន៥៣ឃុំ ស្មើនឹង២៦៨ភូមិ ដែលមានប្រជាពលរដ្ឋចំនួន៣០.៤១២គ្រួសារ ក្នុងនោះក៏មានការលិចផ្ទះសម្បែងចំនួន២២.៨៩៥ខ្នង និង រុះរើផ្ទុះ៥២ខ្នង ព្រមទាំងលិចវត្ត និងវិហារអិស្លាម ចំនួន៥១កន្លែង សាលារៀន៦៤កន្លែង មណ្ឌលសុភាព០៥កន្លែង។
ចំពោះដំណាំកសិផល ដែលត្រូវរងការលិចលង់ មានស្រូវ ពោត និងដំណាំផ្សេងៗត្រូវខូចខាតមានចំនួន ២. ៨៨៤ហិកតា។
ច្រាំងទន្លេបាក់៧. ៧៣៦ម៉ែត្រ ក្នុងនោះមានផ្លូវក្រាលក្រួសក្រហម ប្រវែង១៦៣. ១៦៦ម៉ែត្រ ផ្លូវកៅស៊ូប្រវែង១. ៣៥០ម៉ែត្រ លិចស្ពាន១៧កន្លែងនិងលិចទំនប់ប្រវែង៣៩. ១៣៧ម៉ែត្រ៕
Source: Kampuchea Thmey Daily
0 Comments