នាយករដ្ឋមន្ត្រីអូស្ត្រាលីលោក Malcolm Turnbull បានប្តេជ្ញាមិនចុះចាញ់គូប្រជែងឡើយនៅថ្ងៃព្រហស្បតិ៍ ស្របពេលប្រឈមមុខនឹងការប្រកួតប្រជែងអំពីភាពជាអ្នកដឹកនាំ ប៉ុន្តែបាននិយាយថា លោកនឹងចាកចេញពីឆាកនយោបាយប្រសិនបើគណបក្សរបស់លោកលែងគាំទ្រលោក។
អតីតរដ្ឋមន្ត្រីក្រសួងមហាផ្ទៃលោក Peter Dutton ដែលក៏ជាអតីតមន្ត្រីប៉ូលិសនិងអ្នកអភិរក្សស្ដាំនិយមផងដែរនោះបាននិយាយថា លោកមានទំនុកចិត្តថា ឥឡូវនេះ លោកមានចំនួនគាំទ្រគ្រប់គ្រាន់ដើម្បីទម្លាក់លោក Turnbull ។
ស្របពេលរដ្ឋមន្ត្រីជាន់ខ្ពស់មួយចំនួនបានលាឈប់នោះ ការក្តោបក្តាប់អំណាចរយៈពេលជិត ៣ឆ្នាំរបស់លោក Turnbull កំពុងចុះខ្សោយបើទោះបីជាគេចផុតពីការបោះឆ្នោតលើភាពជាអ្នកដឹកនាំរបស់លោកដោយទទួលបានជ័យជំនះជាមួយនឹងសំឡេង៤៨ទល់នឹង៣៥ក៏ដោយ។
លោកបាននិយាយថា លោក Dutton មិនទាន់បង្ហាញនៅឡើយទេថា គាត់មានការគាំទ្រសំឡេងភាគច្រើនពីគណបក្សសេរីនិយមដែលតម្រូវឲ្យគាត់បង្ខំឲ្យមានកិច្ចប្រជុំមួយទៀតដើម្បីរៀបចំការបោះឆ្នោតជាលើកទីពីរមុនការបោះឆ្នោតថ្នាក់ជាតិនៅពាក់កណ្តាលឆ្នាំក្រោយ។
ប្រសិនបើញត្តិនេះមកដល់បង្ហាញពីរឿងនេះមែននោះ ការប្រជុំនឹងត្រូវធ្វើឡើងនៅពេលថ្ងៃត្រង់ថ្ងៃសុក្រហើយលោក Turnbull នឹងមិនឈរជាបេក្ខជនទេហើយនឹងចាកចេញពីសភា។
លោក Turnbull បានចោទប្រកាន់លោក Dutton និងក្រុមអ្នកគាំទ្ររបស់គាត់ពីការបំភិតបំភ័យខណៈវិបត្តិបានកើតឡើងយ៉ាងឆាប់រហ័ស។ លោកបាននិយាយថា “អ្វីដែលបានចាប់ផ្តើមគឺជាដំណើរការបំភិតបំភ័យបញ្ចុះបញ្ចូលប្រជាជនថា មធ្យោបាយតែមួយគត់ដើម្បីបញ្ចប់បញ្ហាគឺការចុះចាញ់គាត់។ ខ្ញុំមិនជឿលើរឿងនោះទេ ខ្ញុំមិនដែលធ្វើបែបនេះទេ ខ្ញុំមិនដែលធ្វើបាបអ្នកដទៃទេតែអ្នកអាចស្រមៃពីសម្ពាធដែលបានដាក់លើមនុស្សម្នាក់”។
លោក Dutton បានប្រាប់ក្រុមអ្នកយកព័ត៌មានថា លោកបានណែនាំលោក Turnbull តាមទូរស័ព្ទថា “វាគឺជាការវិនិច្ឆ័យរបស់ខ្ញុំដែលសំឡេងភាគច្រើននៃបន្ទប់គណបក្សមិនគាំទ្រដល់ភាពជាអ្នកដឹកនាំរបស់គាត់ទៀតទេ”។
នៅក្នុងបញ្ហាដ៏ធំមួយ រដ្ឋមន្ត្រីក្រសួងហិរញ្ញវត្ថុដ៏មានឥទ្ធិពលរបស់លោក Turnbull គឺលោក Mathias Cormann រួមជាមួយរដ្ឋមន្ត្រីការងារនិងអប់រំបាននិយាយថា លោកលែងគាំទ្រទៀតហើយ។
ពួកគេបានចូលរួមជាមួយរដ្ឋមន្ត្រីផ្សេងទៀតយ៉ាងតិច១០នាក់ដែលបានលាលែងពីតំណែងឬស្នើសុំលាលែង៕ AFP
Source: Kampuchea Thmey Daily
0 Comments