ស្ថានកុងស៊ុលអូស្ត្រាលីក្នុងទីក្រុង Surabaya នៃប្រទេសឥណ្ឌូនេស៊ីបានបង្កើនវិធានការសន្តិសុខនៅថ្ងៃព្រហស្បតិ៍បន្ទាប់ពីមានការបង្ហោះក្នុងប្រព័ន្ធផ្សព្វផ្សាយសង្គមមួយដែលបានជំរុញឲ្យពួកសកម្មប្រយុទ្ធ “សម្លាប់” មន្ត្រីរបស់ខ្លួននៅទីនោះ។
ក្រសួងការបរទេសរបស់ប្រទេសនេះបានធ្វើបច្ចុប្បន្នភាពនៃការផ្តល់ប្រឹក្សាយោបល់ធ្វើដំណើររបស់ខ្លួននៅថ្ងៃព្រហស្បតិ៍ដោយកត់សម្គាល់ថា ក្រុមមន្ត្រីអូស្ត្រាលីនៅ Surabaya នឹងមិនចូលរួមក្នុងព្រឹត្តិការណ៍មួយនៅសាកលវិទ្យាល័យ Airlangga ក្នុងទីក្រុងនេះទេដោយសារតែមានការព្រួយបារម្ភខ្ពស់ផ្នែកសន្តិសុខ។
ប្រភពសន្តិសុខចំនួនពីរនៅក្នុងប្រទេសឥណ្ឌូនេស៊ីដែលនិយាយក្នុងលក្ខខណ្ឌមិនបញ្ចេញឈ្មោះបានឲ្យដឹងថា ការគំរាមកំហែងផ្នែកសន្តិសុខដែលកើនឡើងយ៉ាងខ្លាំងនេះគឺទាក់ទងទៅនឹងការបង្ហោះក្នុងប្រព័ន្ធផ្សព្វផ្សាយសង្គមដែលបានជំរុញឲ្យប្រជាជនឥណ្ឌូនេស៊ីនៅទីក្រុង Surabaya និងខេត្តជ្វាភាគខាងកើត “សម្លាប់មន្ត្រីអូស្ត្រាលីទាំងនេះ”។
សារមួយដែលត្រូវបានត្រួតពិនិត្យដោយរ៉យទ័រនិងបានបញ្ជាក់ដោយមន្ត្រីថាជាប្រភពនៃការព្រួយបារម្ភបាននិយាយថា “ប្រទេសអូស្ត្រាលីគឺជាសមាជិកនៃក្រុមចម្រុះអន្តរជាតិប្រឆាំងនឹងក្រុមរដ្ឋឥស្លាមដែលបានសម្លាប់រង្គាលប្រជាជនមូស្លីមរាប់ពាន់នាក់។ សងសឹកឈាមរបស់ប្រជាជនមូស្លីម”។
ប្រភពសន្តិសុខមួយនៅក្នុងប្រទេសឥណ្ឌូនេស៊ីបាននិយាយថា ការបង្ហោះនៅលើកម្មវិធី Telegram នេះដែលក្រោយមកបានរីករាលដាលទៅប្រព័ន្ធផ្សព្វផ្សាយសង្គមផ្សេងៗទៀតគឺហាក់ដូចជាមានប្រភពដើមនៅក្នុងប្រទេសហូឡង់។
ប្រទេសអូស្ត្រាលីបានបើកស្ថានកុងស៊ុលនៅទីក្រុង Surabaya ដែលជាទីក្រុងធំបំផុតលំដាប់ទី ២របស់ឥណ្ឌូនេស៊ីកាលពីដើមខែនេះ។
កាលពីខែឧសភា ការបំផ្ទុះគ្រាប់បែកអត្តឃាតជាបន្តបន្ទាប់នៅ Surabaya សម្លាប់មនុស្សប្រហែល៣០នាក់រួមទាំងអ្នកវាយប្រហារផងដែរ។ ក្រុមរដ្ឋឥស្លាមបានប្រកាសទទួលខុសត្រូវចំពោះការវាយប្រហារនោះដែលជាការវាយប្រហារដ៏អាក្រក់បំផុតនៅក្នុងប្រទេសឥណ្ឌូនេស៊ីក្នុងរយៈពេលជាងមួយទសវត្សរ៍មកនេះ។
ចាប់តាំងពីពេលនោះមក ប៉ូលិសឥណ្ឌូនេស៊ីបានឃុំខ្លួនសកម្មប្រយុទ្ធសង្ស័យចំនួន២៥០នាក់និងបានសម្លាប់២១នាក់ផ្សេងទៀត៕ REUTERS
Source: Kampuchea Thmey Daily
0 Comments