រដ្ឋបាល​រាជធានី​ ចុះហត្ថលេខា​លើ​អនុសារណៈ​នៃ​ការយោគយល់​គ្នា​ជាមួយ​ធនាគារ​អេស៊ីលីដា ភីអិលស៊ី សម្រាប់​ប្រតិបត្តិការ​បង់​​កម្រៃ​សេវា​ដឹកជញ្ជូន​សាធារណៈ​រថយន្តក្រុង​និង​កាណូត​

​ភ្នំពេញ​៖ ដើម្បី​បង្កើន​នូវ​ភាពងាយស្រួល​លើ​ការគ្រប់គ្រង​ចំណូល និង​ទិន្នន័យ​អ្នកដំណើរ​តាម​រថយន្តក្រុង និង​កាណូត និង​ដើម្បី​ផ្តល់​ភាពងាយស្រួល​ដល់​អ្នកដំណើ​រ​ក្នុង​ការបង់​កម្រៃ​សេវា​ដឹកជញ្ជូន​សាធារណៈ​រថយន្តក្រុង និង​កាណូត បាន​យ៉ាង​ឆាប់រហ័ស និង​មាន​សុវត្ថិភាព​ខ្ពស់ ក៏ដូចជា​ជួយ​សម្រួល​ដល់​ការធ្វើដំណើរ​របស់​បង​ប្អូន​ប្រជាពលរដ្ឋ រដ្ឋបាល​រាជធានី​ភ្នំពេញ​បាន​ចុះហត្ថលេខា​លើ​អនុសារណៈ​នៃ​ការយោគយល់​គ្នា​រវាង​រដ្ឋាករ​ស្វយ័ត​ដឹកជញ្ជូន​សាធារណៈ រថយន្តក្រុង​រាជធានី (City Bus) និង​ធនាគារ​អេស៊ីលីដា ភីអិលស៊ី​លើ​ការប្រើប្រាស់​សេវា​អេស៊ីលីដា​យូ​នី​ធី​ទាន់​ចិត្ត​( QR Code )​សម្រាប់​ប្រតិបត្តិ​ការបង់កម្រៃសេវា​ដឹកជញ្ជូន​សា​ធារ​ណៈ​រថយន្តក្រុង​និង​កាណូត ដែល​ពិធី​នេះ​ធ្វើឡើង​កាលពី​រសៀល​ថ្ងៃទី​២៣ សីហា ២០១៨ ក្រោម​អធិបតីភាព លោក​ឃួ​ង ស្រេង​អភិបាល​រាជធានី​ភ្នំពេញ​។​

លោក អ៊ា​ន សុ​ឃីម អភិបាល​រដ្ឋាករ​ស្វយ័ត​ដឹកជញ្ជូន​សាធារណៈ​រថយន្តក្រុង រាជធានី​ភ្នំពេញ បាន​ថ្លែងថា ការប្រើប្រាស់​សេវា​អេស៊ីលីដា ឃ្យូ​អរ​កូដ នេះ គឺមាន​ភាពងាយស្រួល សម្រាប់​ការគ្រប់គ្រង​ចំណូល និង​ទិន្នន័យ​អ្នកដំណើរ​តាម​រថយន្តក្រុង និង​កាណូត និង​ផ្តល់​ភាពងាយស្រួល​ដល់​អ្នកដំណើ​រ​ក្នុង​ការបង់​កម្រៃ​សេវា​ដឹកជញ្ជូន​សាធារណៈ​រថយន្តក្រុង និង​កាណូត បាន​យ៉ាង​ឆាប់រហ័ស និង​មាន​សុវត្ថិភាព​ខ្ពស់ ដែល​បាន​ជួយ​សម្រួល​ដល់​ការធ្វើដំណើរ​របស់​បង​ប្អូន​ប្រជាពលរដ្ឋ កាត់បន្ថយ​ការចំណាយ ចំណេញ​ពេលវេលា មាន​សុវត្ថិភាព និង​មាន​ផាសុកភាព ចូលរួម​កាត់បន្ថយ​ការ​កកស្ទះ​ចរាចរណ៍ គ្រោះថ្នាក់​ចរាចរណ៍ ស្របតាម​គោលនយោបាយ និង​អនុសាសន៍ ដ៏​ខ្ពង់ខ្ពស់ របស់​រាជរដ្ឋាភិបាល​កម្ពុជា ដែល​មាន សម្តេច​អគ្គមហាសេនាបតី​តេ​ជោ ហ៊ុន សែន ជា​ប្រមុខ​ដឹកនាំ។

លោក​បន្តទៀតថា រដ្ឋាករ​ស្វយ័ត​ដឹកជញ្ជូន​សាធារណៈ​រថយន្តក្រុង រាជធានី​ភ្នំពេញ មាន​សេវា​ដឹកជញ្ជូន​រថយន្តក្រុង​សាធារណៈ​ចំនួន​៨​ខ្សែ ដែលមាន​រថយន្ត ១៥៥​គ្រឿង កំពុង​ទទួល​បានការ​ពេញនិយម​ពី​សំណាក់​ប្រជាពលរដ្ឋ ក្នុងការ​ប្រើប្រាស់​រថយន្ត​ក្រុង​កាន់តែច្រើន​ដែល​មាន​ចំនួន​អ្នកធ្វើដំណើរ​ពី ២​ម៉ឺន ទៅ​២​ម៉ឺន​១​ពាន់​នាក់ ក្នុង​មួយថ្ងៃ។ រដ្ឋាករ​ស្វយ័ត​ដឹកជញ្ជូន​សាធារណៈ​រថយន្តក្រុង រាជធានី​ភ្នំពេញ ក៏មាន​សេវា​ដឹកជញ្ជូន​ផ្លូវទឹក​ចំនួន​១ ខ្សែ ពី​ស្ថានីយ​ឬ​ស្សី​កែវ ទៅ​ស្ថានីយ​តាខ្មៅ​ផងដែរ​។​
លោក​បណ្ឌិត អ៊ិន ចាន់នី ប្រធាន​នាយក​ប្រតិបត្តិ ធនាគារ អេស៊ីលីដា ភីអិលស៊ី មានប្រសាសន៍ថា ការ ជ្រើសរើស ធនាគារ អេស៊ីលីដា ភីអិលស៊ី ជា​ដៃគូ​សហ​ប្រតិ​ប​ត្ដិ​ការ​ក្នុង​ការបង់​កម្រៃ​សេវា​ដឹកជញ្ជូន​សាធារណៈ​រថយន្តក្រុង និង កាណូត តាមរយៈ​សេវា​អេស៊ីលីដា​យូ​នី​ធី​ទាន់​ចិត្ត (ACLEDA Unity ToanChet)​នេះ អ្នកដំណើរ​អាច​ទូទាត់​កម្រៃ​ដឹកជញ្ជូន រថយន្តក្រុង និង​កាណូត បាន​ភ្លាមៗ ដោយ​ស្វ័យប្រវត្តិ តាមរយៈ​ស្លាក​សញ្ញា អេស៊ីលីដា ឃ្យូ​អរ​កូដ ដែលមាន​បិទ​នៅលើ​រថយន្តក្រុង និង​កាណូត ។​

លោក​បន្តថា សេវា​អេស៊ីលីដា​យូ​នី​ធី​ទាន់​ចិត្ត (ACLEDA Unity ToanChet) របស់​ធនាគារ អេស៊ីលីដា ភីអិលស៊ី ជា​សេវា​ធនាគារ​តាមរយៈ​ទូរស័ព្ទ​ចល័ត ដែល​ដំណើរការ​ដោយ​ប្រព័ន្ធ Android និង iOS ដើម្បី​ទូទាត់ និង​ទិញ​ទំនិញ គ្រប់​ទីកន្លែង​តាមរយៈ​ស្លាក​សញ្ញា អេស៊ីលីដា ឃ្យូ​អរ​កូដ ប្រកបដោយ​ភាព​ងាយស្រួល រហ័ស​ទាន់​ចិត្ត និង​មាន​សុវត្ថិភាព​ខ្ពស់។

លោក​បាន​បញ្ជាក់​អោយដឹង​ផងដែរ​ថា គិត​មក​ត្រឹម​ថ្ងៃនេះ មាន​អ្នក​ចុះឈ្មោះ​ប្រើប្រាស់​សេវា​អេស៊ីលីដា​យូ​នី​ធី​ទាន់​ចិត្ត (ACLEDA Unity ToanChet) ជា​លក្ខណៈ​បុគ្គល មាន​ចំនួន ៦២៤.៦៨៤ និង​ជា​ដៃគូ​មាន​ចំនួន ៧.០២៤។

ធនាគារ អេស៊ីលីដា ភីអិលស៊ី មាន​ក្រុមហ៊ុន​បុត្រ​សម្ព័ន្ធ​ចំនួន​ប្រាំ គឺ​ធនាគារ អេស៊ីលីដា ឡាវ លី​មី​ធី​ត អេស៊ីលីដា ស៊ី​ឃ្យួ​រឹ​ធី ភីអិលស៊ី វិទ្យាស្ថាន ពាណិជ្ជ​សាស្ត្រ អេស៊ីលីដា ស្ថាប័ន​មីក្រូហិរញ្ញវត្ថុ អេស៊ីលីដា មី​យ៉ាន់​ម៉ា និង​អេស៊ីលីដា ប្រូ​ភើ​ធី អិ​ល​ធី​ឌី ព្រមទាំង​មាន​ការិយាល័យ​តំណាង​នៅ​សាធារណរដ្ឋ សហភាព​មី​យ៉ាន់​ម៉ា។ ធនាគារ អេស៊ីលីដា ភីអិលស៊ី មានទ្រព្យ​សកម្ម​សរុប​ចំនួន​ជាង ៥,៤៣ ពាន់​លាន​ដុល្លារ​អាមេរិក សមតុល្យ​ឥណទាន​សរុប​ចំនួន ៣,២៥​ពាន់​លាន​ដុល្លារ អាមេរិក និង​ប្រាក់​បញ្ញើ​សន្សំ​សរុប​ចំនួន ៣,៤៨ ពាន់​លាន​ដុល្លារ​អាមេរិក និង​មាន​អតិថិជន​ប្រមាណ​ជាង ២,៥ លាន​នាក់ គិត​ត្រឹម​ដំណាច់ខែ​កក្កដា ឆ្នាំ​២០១៨ នេះ។

លោក​ឃួ​ង ស្រេង​អភិបាល​រាជធានី​ភ្នំពេញ បាន​មានប្រសាសន៍ថា ការបង្កើតអោយមាន​កា​រ​ប្រើប្រាស់​សេវា​អេស៊ីលីដា​យូ​នី​ធី​ទាន់​ចិត្ត​( QR Code )​នេះ​ធ្វើឡើង​ដើម្បី​សម្រួលការ​លំបាក​របស់​បងប្អូន​ប្រជាពលរដ្ឋ អោយបាន​រហ័ស​ទាន់​ចិត្ត​លើ​ការបង់​កម្រៃ​សេវា​ដឹកជញ្ជូន​សា​ធារ​រណៈ​រថយន្តក្រុង​និង​កាណូត ខណៈដែល បច្ចុប្បន្ន​នេះ​មាន​រថយន្តក្រុង​ចំនួន ១៥៥​គ្រឿង បាន​និង​កំពុង​រត់​លើផ្លូវ​ចំនួន ៨​ខ្សែ មាន​ចំនួន​អ្នកធ្វើដំណើរ​ពី ២​ម៉ឺន ទៅ​២​ម៉ឺន​១​ពាន់​នាក់ ក្នុង​មួយថ្ងៃ ហើយ​ជា​គម្រោង​រដ្ឋបាល​រាជធានី​នឹង​បន្ថែមចំនួន​ខ្សែ​រត់​ថែមទៀត​។​

លោក​ឃួ​ង ស្រេង​បាន​បញ្ជាក់ថា ការបង្កើតអោយមាន​កា​រ​ប្រើប្រាស់​សេវា​អេស៊ីលីដា​យូ​នី​ធី​ទាន់​ចិត្ត​( QR Code )​សម្រាប់​ប្រតិបត្តិ​ការបង់​កម្រៃ​សេវា​ដឹកជញ្ជូន​សា​ធារណៈ​រថយន្តក្រុង​និង​កាណូត​នេះ វា​នឹង​កាត់បន្ថយ​កម្លាំង​កម្មពល​កម្ម កាត់បន្ថយ​បុគ្គលិក​ច្រើន ហើយ​ការ គ្រប់​គ្រង់​ចំណូល ក៏​មិនបាន​បាត់បង់​ប្រាក់​ផងដែរ​។​ប៉ុន្តែ​ទោះជា​យ៉ាងណាក្តី លោក​ឃួ​ង ស្រេង​បញ្ជាក់ថា និយាយ​បែបនេះ មិនមែន​ចោទ បុគ្គលិក​ដែល​ធ្លាប់​បំពេញការងារ​នេះ​កន្លងមក​ធ្វើអោយ​បាត់​ឬ​លួច​លុយ​នោះទេ នេះ​ដោយសារតែ​បច្ចេកវិទ្យា​ទំនើប ដែល​ទៀមទា​អោយ​យើង​ប្រើប្រាស់​សេវា​នេះ​។ ក្រៅពីនេះ​លោក​ឃួ​ង ស្រេង​ក៏បាន​ណែនាំ​អោយ​លោក អ៊ា​ន សុ​ឃីម មើល​បុគ្គលិក ពេល​កាត់បន្ថយ​នេះ​ត្រូវ​សម្រួល​ពួកគាត់​ទៅធ្វើ​កន្លែង​ណាមួយ ដោយ​ត្រូវធ្វើ​របាយការណ៍​មក​រដ្ឋបាល​រាជធានី​ភ្នំពេញ ពោលគឺ​ធ្វើយ៉ាងណា​កុំអោយ​ពួកគាត់​មាន​សន្តិ​អារម្មណ៍ ភណ្ឌ​ច្រឡំ ដោយ​នេះ​ជា​ជំហាន​អភិវឌ្ឍន​ដែល​ត្រូវ​ប្រើប្រាស់​បច្ចេកទេស​ទំនើប​ហើយ​។

លោក​ក៏បាន​ធ្វើការ​ណែនាំ​អោយរ​ដ្ឋា​ករ​ស្វយ័ត​ដឹកជញ្ជូន​សាធារណៈ​រថយន្តក្រុង រាជធានី​ភ្នំពេញ និង​ធនាគារ​ត្រូវអនុវត្ត នៃ​ការចុះហត្ថលេខា​នេះ​អោយ​បានល្អ ពិនិត្យ​ជាប្រចាំ​ចំពោះ​ម៉ាស៊ីន ទូទាត់​ប្រាក់​ជៀសវាង​ការ​ខូច បង្ក​ការលំបាក​ដល់​ប្រជាពលរដ្ឋ​៕
​

Source: Kampuchea Thmey Daily