លោក Donald Trump បានអះអាងកាលពីថ្ងៃពុធថា លោកមិនបានធ្វើអ្វីខុសទេបន្ទាប់ពីមេធាវីយូរអង្វែងរបស់គាត់បានចោទគាត់ថាជាប់ពាក់ព័ន្ធក្នុងការទូទាត់ប្រាក់បំបិទមាត់ខុសច្បាប់ដែលធ្វើឡើងមុនការបោះឆ្នោតឆ្នាំ២០១៦ ខណៈដែលអ្នកជំនាញបានព្រមានថាបញ្ហានៅជុំវិញមេដឹកនាំគណបក្សសាធារណរដ្ឋរូបនេះអាចគំរាមកំហែងដល់តំណែងប្រធានាធិបតីរបស់គាត់។
ប្រហែលជាថ្ងៃអាក្រក់បំផុតនៃពេលវេលាដ៏ច្របូកច្របល់របស់លោក Trump ក្នុងការកាន់តំណែង, អតីតអ្នកសម្របសម្រួលលោក Michael Cohen បានប្រាប់ចៅក្រមសហព័ន្ធកាលពីថ្ងៃអង្គារថា គាត់បានធ្វើការរួមចំណែកយុទ្ធនាការខុសច្បាប់ក្នុងទម្រង់ជាការបង់ប្រាក់ដើម្បីបំបិទមាត់ស្ត្រីដែលគេចោទប្រកាន់មានរឿងរ៉ាវជាមួយលោក Trump តាមសំណើមេរបស់គាត់។
ការថ្លែងរបស់លោក Cohen បានកើតឡើងនៅថ្ងៃមួយនៃរឿងនយោបាយដ៏ឈឺក្បាលរបស់លោក Trump ។ អតីតប្រធានយុទ្ធនាការមួយរូបទៀតគឺលោក Paul Manafort ត្រូវបានរកឃើញថាមានទោសក្នុងអំឡុងពេលតែមួយពាក់ព័ន្ធនឹងពន្ធសហព័ន្ធនិងការក្លែងបន្លំធនាគារ។
ខណៈពេលដែលផលប៉ះពាល់ទាំងស្រុងចំពោះលោក Trump នៅតែមិនទាន់ច្បាស់លាស់នោះ សេចក្តីថ្លែងរបស់លោក Cohen និងការរំពឹងទុកនៃការលាតត្រដាងបន្ថែមទៀតគឺបានធ្វើឲ្យលោក Trump មានគ្រោះថ្នាក់ផ្នែកច្បាប់។ ប៉ុន្តែមេដឹកនាំអាមេរិករូបនេះបានបង្ហាញការតាំងចិត្តខ្ពស់ដើម្បីចេញផុតពីរឿងរ៉ាវចុងក្រោយនេះ។
បន្ទាប់ពីបានចោទប្រកាន់លោក Cohen ថាបានបង្កើតរឿងរ៉ាវ, គាត់បានបង្ហោះ Twitter ថា សកម្មភាពរបស់មេធាវីរូបនេះមិនមែនជាបទល្មើសទេហើយលោកបាននិយាយនៅក្នុងបទសម្ភាសន៍មួយជាមួយកម្មវិធី “Fox and Friends” ដោយអះអាងថា ពួកគេក៏មិនបានរំលោភបំពានយុទ្ធនាការដែរ។
នៅក្នុងបទសម្ភាសនោះ លោក Trump បាននិយាយថា ការទូទាត់ប្រាក់បំបិទមាត់នេះត្រូវបានផ្តល់ហិរញ្ញប្បទានដោយប្រាក់ផ្ទាល់ខ្លួនរបស់លោកហើយថា លោក Cohen មិនបានដឹងពីរឿងនេះទេនៅពេលនោះ។
គួរបញ្ជាក់ថា លោក Cohen បានសារភាពទោសកំហុសចំនួនពីរករណីនៃការរំលោភបំពានច្បាប់ហិរញ្ញវត្ថុយុទ្ធនាការឃោសនារួមជាមួយការក្លែងបន្លំចំនួនប្រាំមួយករណីទៀត។ លោកបានកំណត់លោក Trump ថាជាអ្នករួមគំនិតនៅពេលដែលធ្វើការទូទាត់ប្រាក់បំបិទមាត់៕ AFP
Source: Kampuchea Thmey Daily
0 Comments