សហព័ន្ធកីឡាប្រដាល់គុនខ្មែរ បានប្រកាសត្រៀមរៀបចំការប្រកួតជើងឯកជាតិឆ្នាំ២០១៨ នៅអំឡុងខែវិច្ឆិកាខាងមុខនេះ ដែលនឹងរៀបចំនៅចន្លោះបុណ្យអុំទូក និងបុណ្យសមុទ្រ។
លោកឧត្តមសេនីយ៍ឯកតែម ម៉ឺន ប្រធានសហព័ន្ធកីឡាប្រដាល់គុនខ្មែរ បានប្រកាសបែបនេះ ក្នុងកិច្ចប្រជុំបូកសរុបលទ្ធផលឆមាសទី១ និងលើកទិសដៅឆមាសទី២ប្រចាំឆ្នាំ២០១៨ នៅសាលប្រជុំនាយកដ្ឋានអប់រំកាយនិងកីឡា។ លោកប្រធានសហព័ន្ធប្រដាល់គុនខ្មែរ បានមានប្រសាសន៍ថា កិច្ចការសំខាន់របស់សហព័ន្ធនៅចុងឆ្នាំ២០១៨នេះ គឺការត្រៀមរៀបចំការប្រកួតជើងឯកថ្នាក់ជាតិ ការប្រកួតប្រដាល់ក្នុងបុណ្យអុំទូក និង ការប្រកួតនៅបុណ្យសមុទ្រខាងមុខនេះ។ ក្នុងនោះ ការត្រៀមប្រកួតជើងឯកថ្នាក់ជាតិ គឺជារឿងសំខាន់ជាងគេ ដែលមន្ត្រីសហព័ន្ធ សមាគម ក្លិប ទាំងអស់ត្រូវយកចិត្តទុកដាក់ចូលរួមរៀបចំអោយបានល្អនិងជោគជ័យ ប្រកបដោយគុណភាពខ្ពស់ផងដែរ។
ព្រឹត្តិការណ៍ប្រដាល់ជើងឯកថ្នាក់ជាតិនេះ ជាកម្មវិធីប្រចាំឆ្នាំរបស់ក្រសួងអប់រំយុវជន និង កីឡា ដែលរ៉ាប់រងរៀបចំ និង ចំណាយទាំងស្រុងរបស់ក្រសួង ហើយសហព័ន្ធជាអ្នកទទួលបន្ទុកផ្នែកបច្ចេកទេស។
លោកឧត្តមសេនីយ៍ឯកតែម ម៉ឺន បានមានប្រសាសន៍ថា ការប្រកួតជើងឯកថ្នាក់ជាតិទូទាំងប្រទេស ជាព្រឹត្តិការណ៍សំខាន់ ដែលធ្វើឡើងដើម្បីចម្រាញ់រកកីឡាករប្រដាល់គុនខ្មែរល្អៗ សម្រាប់ជាប់ជាកីឡាករជម្រើសជាតិ ទាំងប្រដាល់សកល និងគុនខ្មែរ ក៏ដូចជាសម្រាប់ចូលរួមការប្រកួតនានាលើឆាកអន្តរជាតិ។ ហេតុនេះ សមាគម ក្លិបនីមួយៗ ត្រូវតែសម្រាំងយកកីឡាករកម្រិត ក មកធ្វើ ការប្រកួតក្នុងថ្នាក់ជាតិនេះ ព្រោះថាឆ្នាំនេះសហព័ន្ធមានផែនការដំណើរការរៀបចំតាមលក្ខណៈស្តង់ដារSea Games។ លោកបញ្ជាក់ថា ដោយសារកម្ពុជាយើងត្រូវធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមនាឆ្នាំ២០២៣ខាងមុខ ដូច្នេះសហព័ន្ធប្រដាល់ក៏មានការកែទម្រង់ និងតម្រង់ទិសទៅរកស្តង់ដារស៊ីហ្គេមដែរ រាល់ហេដ្ឋារចនាសម្ព័ន្ធ ទាំងការគ្រប់គ្រង ដឹកនាំ បច្ចេកទេសក្នុងការរៀបចំប្រកួត។
ប្រធានសហព័ន្ធប្រដាល់បញ្ជាក់ថា និយាយជារួម ចាប់ពីឥឡូវនេះទៅ ស្នងការប្រកួត គណៈវិនិច្ឆ័យ គ្រូពេទ្យ នៅតាមកន្លែងប្រកួតពិសេសនៅតាមស្ថានីយទូរទស្សន៍ ត្រូវតែយកចិត្តទុកដាក់គ្រប់គ្រង ដឹកនាំ និងដោះស្រាយបញ្ហាឲ្យបានល្អ ពិសេសនោះគឺត្រូវគោរពច្បាប់ការងារ បទបញ្ជាប្រកួត វិន័យ ព្រមទាំងដោះស្រាយផ្ទៃក្នុងអោយបានល្អ សំខាន់បំផុតការសាមគ្គីសហការស្អិតរមួតជាមួយគ្នា ដើម្បីការងាររួម ធ្វើយ៉ាងណាអោយមានការរីកចម្រើននិងអភិវឌ្ឍវិស័យកីឡាប្រដាល់នៅកម្ពុជា៕
Source: Kampuchea Thmey Daily
0 Comments