ភ្នំពេញ ៖ ដើម្បីដោះស្រាយលើបញ្ហាលិចលង់នៅក្នុងរាជធានីភ្នំពេញអោយបានប្រសើរឡើង រដ្ឋបាលរាជធានីភ្នំពេញ បានខិតខំប្រឹងប្រែងណាស់ ក្នុងការស្ថាបនាលូ ប្រឡាយ ការស្ថាបនាស្ថានីយបូមទឹកជាច្រើនកន្លែង រួមទាំងការស្តារលូ ស្តារប្រឡាយផងដែរ។
ជាក់ស្តែងនៅពេលនេះ រដ្ឋបាលរាជធានីភ្នំពេញបាននិងកំពុងសាងសង់លូប្រអប់ទំហំជាង៧ម៉ែត្រកម្ពស់ជាង២ម៉ែត្រនៅចំណុចប្រសព្វមុំ៣ រវាងប្រឡាយលូ ៥ ប្រឡាយបឹងហារ និងប្រឡាយភូមិម័ល ក្នុងខណ្ឌដង្កោ ដើម្បីរំដោះទឹកជូនប្រជាពលរដ្ឋនៅតំបន់ជុំវិញនេះ។
មន្ត្រីរដ្ឋបាលរាជធានីភ្នំពេញបានអោយដឹងថា គម្រោងសាងសង់លូប្រអប់ខាងលើនេះ ទំហំ ៧.២ម៉ែត្រ មានកម្ពស់២.៤ម៉ែត្រ នៅចំណុចប្រសព្វមុំ៣ រវាងប្រឡាយលូ ៥ ប្រឡាយបឹងហារ និងប្រឡាយភូមិម័ល នឹងដាក់អោយដំណើរការបង្ហូរទឹកនៅចុងខែសីហានេះ។
មន្ត្រីដដែលបានបញ្ជាក់ថា គម្រោងលូប្រអប់ថ្មីនេះ មានសមត្ថភាពបង្ហូរទឹកបាន ១៥ម៉ែត្រគូបក្នុង១វិនាទី ជំនួស លូមូលបច្ចុប្បន្នទំហំ ១.៥ម៉ែត្រ គឺកើនចំនួន ១០ដងនៃការបង្ហូរទឹកចាស់ ដែលនឹងកាត់បន្ថយការលិចលង់នៅក្នុងតំបន់ភូមិសាស្ត្រខណ្ឌដង្កោ និងខណ្ឌពោធិ៍សែនជ័យ។
គួរបញ្ជាក់ថា ក្នុងគម្រោងរបស់រដ្ឋបាលរាជធានីភ្នំពេញ គឺបានដាក់ចេញជាផែនការ ដោយឱ្យមន្ទីរសាធារណការនិងដឹកជញ្ជូនរាជធានីភ្នំពេញធ្វើការសិក្សាបច្ចេកទេស លើបញ្ហាដោះស្រាយទឹកលិចចំនួន ៥គម្រោង លើចំនួន ៥តំបន់ក្នុងរាជធានីភ្នំពេញនៅឆ្នាំ២០១៨នេះ។
តំបន់លិចទឹកទាំង៥កន្លែង ដែលត្រូវដោះស្រាយនេះរួមមានទី១-តំបន់ផ្លូវជាតិលេខ ៤ មុខសាលាក្តីខ្មែរក្រហម ដោយកំពុងជីកភ្ជាប់ប្រឡាយស្របផ្លូវរថភ្លើង ប្រឡាយជើងឯក និងប្រឡាយទួលពង្រ។ទី២-តំបន់មហាវិថីសហព័ន្ធរុស្ស៊ី ខាងជើងព្រលានយន្តហោះ។ គម្រោងដាក់លូប្រអប់ក្នុងសាច់ផ្លូវតាំងកសាង ចាប់ពីមហាវិថីសហព័ន្ធរុស្ស៊ីទៅភ្ជាប់ប្រឡាយទួលសំពៅនិង១ខ្សែទៀតទៅភ្ជាប់ប្រឡាយចំការឳឡឹក។ ទី៣-តំបន់ខាងត្បូងនិងខាងកើតព្រលានយន្តហោះ។គម្រោងនឹងដាក់លូប្រអប់ទំហំ ៦.៨ម៉ែត្រ និង ៤.៨ម៉ែត្រ ដើម្បីដោះទឹកលិចនៅផ្លូវ ស ឡា ផ្លូវ ណ័រប្រ៊ីត ផ្លូវដួង ងៀប ភូមិថ្មគោល ប្រឡាយលូ៥ បុរី អូរបែកក្អម បុរី ស ឡា។ទី៤-គម្រោងស្ថាបនាប្រឡាយបេតុងស្ទឹងមានជ័យ និងផ្លូវអបប្រឡាយនិងទី៥-គម្រោងស្តារលូ នៅក្នុងខណ្ឌចំការមន ដូនពេញ ៧មករា និងទួលគោក។
ដើម្បីដោះស្រាយបាននូវការលិចលង់នេះដែរ រដ្ឋបាលរាជធានីភ្នំពេញក៏បានដាក់ចេញជា គម្រោងសាងសង់ស្ថានីយបូមទឹកថ្មីចំនួន៤កន្លែងទៀតផងដែរ ដូចជា នៅគឺទី១ស្ថានីយបុរី១០០ខ្នង ទី២ស្ថានីយលូ ៥ ទី៣ស្ថានីយបឹងទំពុន និងទី៤ស្ថានីយទួលសំពៅ ដែលបង្កើនសមត្ថភាពបូមទឹកបាន៣ដង៕
Source: Kampuchea Thmey Daily
0 Comments