ភ្នំពេញ ៖ វិទ្យាស្ថានខេមអេដប៊ីហ្សនេសស្គូល (CamEd) កាលពីព្រឹកថ្ងៃទី២៥ ខែសីហា ឆ្នាំ២០១៨ បានរៀបចំវេទិកាពិភាក្សាស្តីពី “អាជីពការងារផ្នែកសវនកម្ម និងគណនេយ្យ” ក្រោមអធិបតីភាពនាយកវិទ្យាស្ថានខេមអេដប៊ីហ្សនេសស្គូល និងមានការអញ្ជើញចូលរួមពីសំណាក់ សាស្ត្រាចារ្យ វាគ្មិនកិត្តិយស និងនិស្សិតប្រមាណជិត៣០០នាក់ ហើយពិធីនេះ រៀបចំឡើងនៅសណ្ឋាគារ ដឹហ្ក្រេតឌ្យូកភ្នំពេញ (អិនធឺកង់ទីណង់តាល់)។
ដោយមើលឃើញពីតម្រូវការទីផ្សារនូវធនធានមនុស្សផ្នែកវិស័យសវនកម្ម និងគណនេយ្យ វិទ្យាស្ថានខេមអេដប៊ីហ្សនេសស្គូល បានរៀបចំកម្មវិធីនេះឡើងក្នុងគោលបំណងជួយសិស្សនិស្សិតឲ្យបានជួបផ្ទាល់ជាមួយក្រុមហ៊ុនសវនកម្មជាតិ និងអន្តរជាតិធំៗដូចជា ក្រុមហ៊ុន KPMG, BDO, DFDL, Ernst & Young, Grant Thornton, ACCA និងបណ្តាក្រុមហ៊ុនធំៗមួយចំនួនទៀតដូចជា Asianerial Advisory INT, Lochan & Co, Morison Kak & Associes, SM Global, និងក្រុមហ៊ុន Makro ។
ថ្លែងទៅកាន់អ្នកចូលរួម លោក ខេស៊ី បាណេត នាយកវិទ្យាស្ថានខេមអេដប៊ីហ្សនេសស្គូល បានមានប្រសាសន៍ថា ចាប់តាំងពីឆ្នាំ២០០៣ មក វិទ្យាស្ថានខេមអេដប៊ីហ្សនេសស្គូល បានខិតខំយ៉ាងខ្លាំង ដើម្បីបង្កើតកាលានុវត្តភាព ដល់សាធារណៈជនទូទៅដែលសិក្សានៅវិទ្យាស្ថាននេះ ដោយយកគុណភាពជាចំបង ជាពិសេសចំពោះគុណភាពគ្រូបង្រៀន និងកម្មវិធីសិក្សា ដើម្បីឲ្យស្របទៅនឹងមាត្រដ្ឋានជាតិ និងអន្តរជាតិ។ ជាលទ្ធផលវិទ្យាស្ថានខេមអេដប៊ីហ្សនេសស្គូល ត្រូវបានទទួលស្គាល់ពីសាធារណៈជនទាំងក្នុង និងក្រៅប្រទេស តួយ៉ាងដូចជា សមាគមគណនេយ្យករជំនាញ ACCA របស់ចក្រភពអង់គ្លេសជាដើម។
វិទ្យាស្ថានខេមអេដប៊ីហ្សនេសស្គូល ជាវិទ្យាស្ថានតែមួយគត់ដែលទទួលបានចំណាត់ថ្នាក់ផ្លាទីនីម ពីសមាគមគណនេយ្យករជំនាញ ACCA ដែលមានទីតាំងនៅក្នុងចក្រភពអង់គ្លេស លើផ្នែកគុណភាពនៃការអប់រំផ្នែក គណនេយ្យករជំនាញ។ និស្សិត ដែលរៀននៅវិទ្យាស្ថានខេមអេដប៊ីហ្សនេសស្គូល តែងទទួលបានចំណាត់ថ្នាក់ល្អ បើធៀបទៅនឹងប្រទេសផ្សេងៗនៅលើសាកលលោក ហើយគិតមកដល់បច្ចុប្បន្ននេះ វិទ្យាស្ថានមាននិស្សិតចំនួន១០ នាក់ ដែលទទួលបានចំណាត់ថ្នាក់លេខ១ និងជាច្រើននាក់ទៀត ដែលទទួលបានចំណាត់ថ្នាក់លេខ ២ និងលេខ៣ ទូទាំងពិភពលោកផងដែរ។
បន្ទាប់ពីស្តាប់របាយការណ៏របស់លោក ខេស៊ី បាណេត រួចហើយ វិទ្យាស្ថានបានអញ្ជើញវាគ្មិន ដែលអញ្ជើញមកពីបណា្តក្រុមហ៊ុនសវនកម្មអន្តរជាតិធំៗទាំង៥ មកធើ្វការចែករំលែកនូវបទពិសោធន៏ក្នុងការងារក្នុងអាជីពផ្នែក គណនេយ្យ ពន្ធដារ និងសវនកម្ម ជូនដល់ប្អូនៗសិស្សនិស្សិតផងដែរ។ មិនត្រឹមតែប៉ុណ្ណោះ សិស្សនិស្សិត ក៏អាចចោទជាសំណួរទៅកាន់វាគ្មិន ដើម្បីជាការបំភ្លឺផ្លូវ ព្រមទាំងទទួលបាននូវដំបូន្មានល្អៗនៅក្នុងវិស័យនេះផងដែរ។
ជាកិច្ចបញ្ចប់កម្មវិធីសិស្សនិស្សិត បានធ្វើការស្វែងយល់ពីក្រុមហ៊ុននីមួយៗកាន់តែច្បាស់ តាមរយៈការសាកសួរព័ត៌មានបន្ថែម តាមស្តង់របស់ក្រុមហ៊ុនទាំងនោះថែមទៀតផង៕
Source: Kampuchea Thmey Daily
0 Comments