ប្រធានាធិបតីសហរដ្ឋអាមេរិកលោក Donald Trump កាលពីថ្ងៃសុក្របានលុបចោលដំណើរទស្សនកិច្ចនាពេលខាងមុខរបស់មន្ត្រីការទូតរបស់លោកទៅកាន់ប្រទេសកូរ៉េខាងជើងហើយបានបន្ទោសប្រទេសចិនសម្រាប់ការធ្វើឲ្យជាប់គាំងកិច្ចខិតខំប្រឹងប្រែងដើម្បីដកហូតអាវុធនៃរបបរបស់លោកគីមជុងអ៊ុន។
លោក Trump បានបង្ហោះ Twitter ថា “ខ្ញុំបានស្នើរដល់រដ្ឋមន្ត្រីការបរទេសលោក Mike Pompeo កុំធ្វើដំណើរទៅប្រទេសកូរ៉េខាងជើងនៅពេលនេះព្រោះខ្ញុំមានអារម្មណ៍ថា យើងមិនបានធ្វើឲ្យមានវឌ្ឍនភាពគ្រប់គ្រាន់ទាក់ទងនឹងការរំសាយអាវុធនុយក្លេអ៊ែរនៅឧបទ្វីបកូរ៉េទេ”។
លោក Pompeo នឹងវិលត្រឡប់ទៅទីក្រុងព្យុងយ៉ាងជាថ្មីនៅសប្តាហ៍ក្រោយសម្រាប់អ្វីដែលលោកពណ៌នាថា ជាដំណាក់កាលបន្ទាប់ក្នុងការធានាការផ្ទៀងផ្ទាត់ចុងបញ្ចប់និងពេញលេញនៃការលុបបំបាត់អាវុធនុយក្លេអ៊ែររបស់កូរ៉េខាងជើង។
ប៉ុន្តែលោក Trump បានបដិសេធផែនការនេះស្របពេលលោកប្រឈមនឹងបញ្ហាក្នុងស្រុកនិងរបាយការណ៍ឯករាជ្យដែលថា កូរ៉េខាងជើងបានធ្វើតិចតួចឬគ្មានធ្វើអ្វីសោះក្នុងការរំសាយកម្មវិធីនុយក្លេអ៊ែររបស់ខ្លួន។
អ្នកនាំពាក្យសេតវិមានលោកស្រី Sarah Sanders បាននិយាយថា លោក Pompeo និងលោក Trump បានជួបគ្នាកាលពីថ្ងៃសុក្រ។
លោក Trump ក៏បានបង្កើនវោហាសាស្ត្ររបស់លោកប្រឆាំងនឹងប្រទេសចិនផងដែរខណៈប្រទេសសេដ្ឋកិច្ចកំពូលរបស់ពិភពលោកទាំងពីរនេះកំពុងជាប់ក្នុងសង្គ្រាមពាណិជ្ជកម្ម។
លោក Trump បាននិយាយថា “លើសពីនេះ ដោយសារតែជំហរពាណិជ្ជកម្មកាន់តែតឹងរ៉ឹងរបស់យើងជាមួយប្រទេសចិន ខ្ញុំមិនជឿថាពួកគេកំពុងជួយដល់ដំណើរការនៃការលុបបំបាត់អាវុធនុយក្លេអ៊ែរដូចកាលពីមុននោះទេ”។
នៅក្នុងការបង្ហោះ Twitter មួយទៀត ប្រធានាធិបតីរូបនេះបានបន្ថែមថា លោក Pompeo នឹងនៅតែធ្វើដំណើរទៅកាន់កូរ៉េខាងជើងក្នុងពេលអនាគតដ៏ខ្លីខាងមុខ។ លោកបាននិយាយថា រឿងនេះទំនងជានឹងកើតឡើងនៅពេលទំនាក់ទំនងពាណិជ្ជកម្មរវាងសហរដ្ឋអាមេរិកនិងចិនត្រូវបានដោះស្រាយ។
គួរបញ្ជាក់ថា ប្រទេសកូរ៉េខាងជើងត្រូវបានគេជឿថា ជិតអភិវឌ្ឍបាននូវឧបករណ៍នុយក្លេអ៊ែរដែលមានខ្នាតតូចមួយនិងមីស៊ីលផ្លោងដែលមានសមត្ថភាពបំពាក់ជាមួយវាដើម្បីវាយប្រហារគ្រប់ទីកន្លែងនៅទ្វីបអាមេរិក៕ AFP
Source: Kampuchea Thmey Daily
0 Comments