សហរដ្ឋអាមេរិក​កាត់​ជំនួយ​ជាង​២០០​លាន​ដុល្លារ​ដល់​ប៉ា​ឡេ​ស្ទី​ន

សហរដ្ឋអាមេរិក​ បាន​និយាយ​កាលពី​ថ្ងៃ​សុក្រ​ថា ខ្លួន​បាន​លុបចោល​ជំនួយ​ជា​ទឹកប្រាក់​ជាង ២០០​លាន​ដុល្លារ​ដល់​ប៉ា​ឡេ​ស្ទី​ន​នៅក្នុង​តំបន់ Gaza Strip និង West Bank ដែលជា​ហេតុ​នាំ​ឲ្យ​ឯកអគ្គរដ្ឋទូត​របស់​ខ្លួន​ចោទប្រកាន់​រដ្ឋបាល​របស់​លោក​ប្រធានាធិបតី Donald Trump ថា “​ប្រឆាំង​សន្តិភាព​”​។​

មន្ដ្រី​ក្រសួងការបរទេស​ជាន់ខ្ពស់​ម្នាក់​បាន​និយាយថា ការសម្រេចចិត្ត​នេះ​ដែល​បាន​ធ្វើតាម​ការដឹកនាំរ​បស់​លោក​ប្រធានាធិបតី​គឺ​បាន​ធ្វើឡើង​បន្ទាប់ពី​មានការ​ត្រួតពិនិត្យ​ឡើងវិញ​នៃ​កម្មវិធី​ជំនួយ​ទៅ​ទឹកដី​ប៉ា​ឡេ​ស្ទី​ន​។​

មន្ត្រី​ដដែល​បាន​និយាយថា ថវិកា​ដែល​បម្រុង​ទុក​កាលពីមុន​សម្រាប់​កម្មវិធី​នៅ​តំបន់ West Bank និង Gaza នាពេលនេះ​នឹងត្រូវ “​ដោះស្រាយ​គម្រោង​អាទិភាព​ខ្ពស់​នៅ​កន្លែង​ផ្សេង​”​។​
​
លោក​បាន​និយាយថា “​បញ្ហា​នេះ​ត្រូវបាន​យកមក​ពិចារណា​អំពី​បញ្ហា​ប្រឈម​ដែល​សហគមន៍​អន្តរជាតិ​ត្រូវ​ប្រឈមមុខ​ក្នុងការ​ផ្តល់ជំនួយ​នៅ​តំបន់ Gaza ដែលជា​កន្លែង​ការគ្រប់គ្រង​របស់​ក្រុម Hamas បានធ្វើ​ឲ្យ​ប៉ះពាល់​ដល់​ជីវភាព​រស់នៅ​របស់​ប្រជាពលរដ្ឋ Gaza ហើយ​បំផ្លាញ​ស្ថានការណ៍​មនុស្សធម៌​និង​សេដ្ឋកិច្ច​ធ្ងន់ធ្ងរ​”​។​
​
នៅក្នុង​ខែមករា សហរដ្ឋអាមេរិក​បាន​កាត់បន្ថយ​យ៉ាងខ្លាំង​រួចទៅហើយ​នូវ​ការចូលរួមចំណែក​រប​ស់​ខ្លួន​ទៅកាន់​ភ្នាក់ងារ​អង្គការសហប្រជាជាតិ​សម្រាប់​ជនភៀសខ្លួន​ប៉ា​ឡេ​ស្ទី​ន (UNRWA)​។​
​
ទំនាក់ទំនង​រវាងរ​ដ្ឋ​អំណាច​អាមេរិក​និង​អាជ្ញាធរ​ប៉ា​ឡេ​ស្ទី​ន​បាន​ធ្លាក់ចុះ​យ៉ាងខ្លាំង​បន្ទាប់ពី​លោក Trump ប្រកាស​ពី​ការសម្រេចចិត្ត​របស់​ស​ហ​រដ្ឋ​អាមេរិក​ក្នុងការ​ទទួលស្គាល់​ក្រុង​យេ​រូ​សា​ឡឹម​ថា​ជា​រដ្ឋធានី​របស់​ប្រទេស​អ៊ីស្រាអែល​។​
​
ប្រជាជន​ប៉ា​ឡេ​ស្ទី​ន​បាន​ផ្អាក​ការទាក់ទង​ជាមួយ​រដ្ឋបាល​នេះហើយ​ចាត់ទុកថា អាមេរិក​មិនអាច​ដើរតួនាទី​ជា​អ្នក​សម្រុះសម្រួល​នៅក្នុង​ដំណើរការ​សន្តិភាព​មជ្ឈិមបូព៌ា​បានទេ​។​

ការសម្រេចចិត្ត​កាត់បន្ថយ​មូលនិធិ​ដល់​ប៉ា​ឡេ​ស្ទី​ន​បាន​កើតឡើង​ចំពេល​មាន​វិបត្តិ​មនុស្សធម៌​នៅ​តំបន់ Gaza ដែលមាន​ការកើនឡើង​នៃ​អំពើហិង្សា​ចាប់តាំងពី​ការតវ៉ា​របស់​ប៉ា​ឡេ​ស្ទី​ន​បានចាប់ផ្តើម​នៅក្នុង​ខែមីនា​។​

ជនជាតិ​ប៉ា​ឡេ​ស្ទី​ន​យ៉ាងតិច​១៧១​នាក់​ត្រូវបាន​សម្លាប់​ដោយ​ការបាញ់ប្រហារ​របស់​អ៊ីស្រាអែល​ក្នុងអំឡុង​បាតុកម្ម​ជិត​ព្រំដែន​អ៊ីស្រាអែល​៕ AFP

​

Source: Kampuchea Thmey Daily