ភ្នំពេញ ៖ តារាសម្តែងស្រី ដែលកំពុងលេចធ្លោលើសកម្មភាពមនុស្សធម៌ជួយសង្គមកញ្ញា ពេជ្រ ចរណី ជាការកត់សម្គាល់អំឡុងពេលប៉ុន្មានខែនេះ ក្រៅតែពីមមាញឹកលើអាជីពសម្តែងសិល្បៈនាងក៏ចាប់ផ្តើមលេចវត្តមានកាន់តែខ្លាំងលើការងារសង្គមតាមរយៈការស្វែងរកជំនួយជួយដល់លោកយាយលោកតាចាស់ជរា កុមារនៅតាមសហគមន៍ និងប្រជាពលរដ្ឋជួបការខ្វះខាតជាដើម។
សកម្មភាពការងារមនុស្សធម៌ជួយសង្គមរបស់តារាសម្តែងស្រស់ស្អាត កញ្ញា ពេជ្រ ចរណៃ បច្ចុប្បន្នកំពុងទទួលបានការគាំទ្រ និងលើកសរសើរពីសំណាក់មហាជនគ្រប់មជ្ឈដ្ឋាន។មិនតែប៉ុណ្ណោះ នាងក៏ត្រូវបានការលើកសរសើរទៀតថា ជាអ្នកសិល្បៈគំរូល្អសម្រាប់សង្គមដែលអាចយកពេលវេលាទំនេរផ្ទាល់ខ្លួនចែករំលែកក្តីស្រឡាញ់ដល់មនុស្សជុំវិញខ្លួនជួបការលំបាក។
ជាក់ស្តែងមុននេះបន្តិចតារាស្រីកញ្ញា ពេជ្រ ចរណៃ បានចាប់ផ្ដើមធ្វើការបង្ហោះសារអំពាវនាវដល់សប្បុរសជនដើម្បីស្វែងរកថវិកា និងសម្ភារៈជួយដល់លោកយាយកម្សត់ម្នាក់ ដែលមានវ័យជាង៧០ឆ្នាំ ហើយបច្ចុប្បន្ន កំពុងជួបការលំបាកមានជំងឺប្រចាំកាយ និងប្រកបរបរដើររើសសំបកកំប៉ុងចិញ្ចឹមជីវិត។
កញ្ញា ពេជ្រ ចរណៃ បានពោលពាក្យទាំងទឹកភ្នែកថា ទឹកភ្នែកខ្ញុំហូរមិនមែនជាការសម្តែងទេ តែជាទឹកភ្នែកដែលហូរមកដោយការឈឺចាប់ និងអាណិតលោកយាយជាខ្លាំង….។ ខ្ញុំមិនអាចរៀបរាប់ពីអារម្មណ៍ ដែលនៅក្នុងចិត្តខ្ញុំពេលនេះបានទេ សូមពុកម៉ែបងប្អូនទាំងអស់គ្នាមើលវីដេអូនេះពីដើមដល់ចប់ទើបយល់ពីអារម្មណ៍របស់ខ្ញុំ។
តារាស្រីកញ្ញា ពេជ្រ ចរណៃ បានបន្តថា ពេលដែលដឹងពីជីវិតពិតរបស់លោកយាយឈ្មោះ យេន ដែលមានអាយុ៧២ឆ្នាំធ្វើអោយខ្ញុំហូរទឹកភ្នែកដោយមិនដឹងខ្លួន សព្វថ្ងៃលោកយាយគ្មានកូនចៅគ្មានទីពឹងអ្វីទាំងអស់ដើររើសសំបកកំប៉ុងដើម្បីចិញ្ចឹមជីវិត ក៏ត្រូវម៉ូតូបុកបណ្តាលឲ្យបាក់ដៃខាងឆ្វេង និងប្រះឆ្អឹងត្រគាក ដោយលោកយាយគ្មានប្រាក់មួយរៀលនៅក្នុងខ្លួនសោះ ក៏សុខចិត្តដេកទ្រាំជាមួយនឹងការឈឺចាប់អស់រយៈពេលជិតមួយខែហើយដោយមិនបានទទួលការព្យាបាលអ្វីទាំងអស់។
តារាសម្តែងកញ្ញា ពេជ្រ ចរណៃបានបន្ថែមទៀតថា សព្វថ្ងៃលោកយាយស្នាក់នៅសំយាបផ្ទះគេក្បែរផ្សារ ព្រៃទា(ជិតពោធិ៍ចិនតុង)។ ដូច្នេះប្រសិនបើបងប្អូនពុកម៉ែទាំងនៅក្នុង និងក្រៅស្រុកមានការអាណិតអាសូរ ឬចង់ចូលរួមបរិច្ចាគថវិកា និងសម្ភារៈជូនដល់គាត់ អាចអញ្ជើញទៅដោយផ្ទាល់ឬអាចទាក់ទងមកនាងខ្ញុំតាមរយៈលេខទូរស័ព្ទ៖០៩៦ ៩២៦ ៧៧ ៧៧, ០៩៦ ៥៥៥ ១៨ ៥៩៕
Source: Kampuchea Thmey Daily
0 Comments