មន្ត្រីអាកាសធាតុ និងការពារស៊ីវិលបាននិយាយថា ព្យុះសង្ឃរា Lane បានចូលកាន់តែជិតទៅកណ្តាលកោះហាវ៉ៃកាលពីថ្ងៃសុក្រ ខណៈដែលវាបានចុះខ្សោយទៅជាព្យុះប្រភេទ១ ហើយបានបង្កការជន់លិចនៅកោះធំមួយជាមួយនឹងភ្លៀងធ្លាក់ខ្លាំង និងធ្ងន់ធ្ងរ និងទឹកជំនន់រីករាលដាល។
ខ្យល់ព្យុះដែលនាំមកជាមួយខ្យល់បក់ខ្លាំងរហូតដល់៨៥ម៉ាយល៍ក្នុងមួយម៉ោងត្រូវបានគេព្យាករណ៍ថានឹងមកដល់ជិតដីគោកបំផុតនៅភាគខាងលិចកោះនេះនៅចុងសប្តាហ៍ហើយវានាំមកនូវលក្ខខណ្ឌខ្យល់ព្យុះទៅកាន់កោះ Maui និងកោះមានប្រជាជនច្រើនបំផុតរបស់រដ្ឋគឺ Oahu។
លោក Brock Long ប្រធានភ្នាក់ងារគ្រប់គ្រងគ្រោះមហន្តរាយសហព័ន្ធ (FEMA) បានបង្ហោះ Twitter ថា “ប្រសិនបើអ្នកនៅកោះហាវ៉ៃ វាជារឿងសំខាន់ណាស់ដែលអ្នកត្រូវធ្វើតាមការព្រមានរបស់មន្ដ្រីក្នុងតំបន់ហើយត្រូវដឹងអំពីទីកន្លែងរបស់អ្នក”។
ប៉ុន្តែការព្យាករណ៍នាពេលថ្ងៃត្រង់បានបញ្ជាក់យ៉ាងច្បាស់ថា កោះហាវ៉ៃបានគេចផុតពីការគំរាមកំហែងនៃការវាយប្រហារដោយផ្ទាល់ជាលើកដំបូងដោយព្យុះសង្ឃរាដ៏ធំមួយនេះ។
ព្យុះសង្ឃរា Lane ត្រូវបានគេបន្ទាបទៅប្រភេទ២កាលពីថ្ងៃសុក្របន្ទាប់មកទៅប្រភេទ១ដែលជាចំណាត់ថ្នាក់ទាបបំផុតក្នុងចំណោមប្រភេទចំនួន៥។
ព្យុះនេះត្រូវបានគេរំពឹងថានឹងបន្តដំណើរយឺតៗទៅភាគខាងជើងនិងចុះខ្សោយក្នុងរយៈពេល១២ម៉ោងទៀត។
ទោះបីជាយ៉ាងណាក៏ដោយ ព្យុះនេះបានបង្កឲ្យមានគ្រោះថ្នាក់អាកាសធាតុដល់រដ្ឋមួយចំនួនខណៈដែលកោះធំត្រូវជួបប្រទះនឹងការធ្លាក់ភ្លៀងខ្លាំងក្លាដោយសារតែព្យុះ Lane នេះ។
អ្នកនាំពាក្យភ្នាក់ងារការពារជនស៊ីវិលលោកស្រី Kelly Wooten បាននិយាយថា បុគ្គលិកនាយកដ្ឋានពន្លត់អគ្គិភ័យបានធ្វើការសង្គ្រោះជាច្រើននៅលើកោះនេះចាប់តាំងពីថ្ងៃព្រហស្បតិ៍មក។
គិតមកដល់ពេលនេះ មិនមានរបាយការណ៍ពីអ្នករងរបួសឬអ្នកស្លាប់នៅឡើយទេ៕ AFP
Source: Kampuchea Thmey Daily
0 Comments