ភ្នំពេញ ៖ មន្ត្រីជាន់ខ្ពស់ក្រសួងអប់រំយុវជន និង កីឡា បានជំរុញឲ្យនិស្សិតត្រូវខិតខំសិក្សាជំនាញទន់បន្ថែមទៀត ដើម្បីឆ្លើយតបទៅនឹងតម្រូវការទីផ្សារការងារបច្ចុប្បន្ន ខណៈមានយុវជនមួយចំនួននៅមិនទាន់មានជំនាញនេះច្បាស់លាស់នៅឡើយ។
ថ្លែងនៅក្នុងការប្រគល់ជ័យលាភីកម្មវិធីប្រកួតប្រជែងសំណេរអនាគតកម្ពុជាឆ្នាំ២០១៨កាលពីយប់ថ្ងៃទី២៣សីហានៅសណ្ឋាគារកាំបូឌូឌីយ៉ាណាលោក យក់ ង៉ុយ រដ្ឋលេខាធិការក្រសួងអប់រំយុវជននិងកីឡាបានណែនាំឲ្យនិស្សិតទាំងអស់ប្រឹងប្រែងសិក្សាជំ នាញទន់នេះបន្ថែមទៀតដើម្បីឲ្យមានចំណេះជំនាញច្បាស់លាស់ងាយស្រួលក្នុងការស្វែងរកការងារធ្វើនៅក្នុងសង្គម។
លោករដ្ឋលេខាធិការបានមានប្រសាសន៍ថា ការសិក្សាជំនាញទន់នេះនឹងជួយឲ្យនិស្សិតចេះពីការងារស្រាវជ្រាវ ការច្នៃប្រឌិតក្នុងការបង្កើតនូវអ្វីដែលថ្មី ចេះកិច្ចសហការធ្វើការងារជាក្រុម ភាពម្ចាស់ការលើខ្លួនឯង ការគិតពិចារណា និងចេះការគ្រប់គ្រងខ្លួនឯងជាដើម។
ជាមួយគ្នានេះដែរ លោក យក់ ង៉ុយបានអំពាវនាវឲ្យវិស័យឯកជនគួរតែបង្កើតកម្មវិធីប្រកួតប្រជែងផ្សេងៗឲ្យបានច្រើនពិសេសកម្មវិធីការប្រកួតប្រជែងសំណេរអនាគតនេះជាបន្តទៀតដើម្បីឲ្យនិស្សិតបានចូលរួមបង្ហាញសមត្ថភាពទេពកោសល្យនិងទទួលបានបទពិសោធ ន៍បន្ថែមក្រៅពីការរៀននៅតាមសាលាព្រោះថាការសិក្សាតែនៅក្នុងសាលាមួយមុខមិនអាចទៅរួចទេទាមទារឲ្យសិស្សនិស្សិតត្រូវសិក្សាពីអ្វីដែលនៅក្រៅសាលានិងចូលរួមការងារសង្គមដើម្បីទទួលបានបទពិសោធន៍ទៅលើមុខជំនាញទន់នេះ។
លោក យក់ ង៉ុយបានបន្តទៀតថា ចំណែកក្រសួងអប់រំយុវជននិងកីឡាបាននឹងកំពុងជំរុញការបណ្តុះបណ្តាលដល់និស្សិតដើម្បីធ្វើយ៉ាងណាឲ្យពួកគេមានគុណភាពអប់រំគ្រប់ជ្រុងជ្រោយមានទេពកោសល្យផ្នែកបំណិន ចំណេះវិជ្ជា មានចរិយាធម៌និងមានសុខភាពល្អ។
ក្រសួងអប់រំយុវជននិងកីឡានឹងពង្រីកការបណ្តុះបណ្តាលជំនាញធុរកិច្ចដល់សិស្សកំរិតវិទ្យាល័យនៅទូទាំងប្រទេស ដើម្បីឲ្យសិស្សចេះបង្កើតមុខរបរឬអាជីវកម្មដោយខ្លួនឯងបាន។
លោក រស់ ធារៈ មន្ត្រីអគ្គនាយដ្ឋានយុវជននៃក្រសួងអប់រំយុវជននិងកីឡាបានឲ្យដឹងថា ក្រសួងអប់រំនឹងដាក់ជំនាញសហគ្រិនភាពបញ្ចូលទៅក្នុងកម្មវិធីសិក្សាខាងមុខនេះគឺដើម្បីបង្ហាត់បង្រៀនសិស្សនៅកំរិតវិទ្យាល័យនូវជំនាញទាក់ទិននឹងការបង្កើតគំនិតធ្វើអាជីវកម្ម ភាពជាអ្នកដឹកនាំនិងផ្តល់ឱកាសឲ្យសិស្សបានអនុវត្តជាក់ស្តែងបានច្រើននៅក្នុងថ្នាក់រៀនផងដែរ។
លោកបានបន្តថា កម្មវិធីសិក្សាជំនាញសហគ្រិនភាពនេះបង្កលទ្ធភាពឲ្យសិស្សអាចរកការងារធ្វើនៅតាមបណ្តាក្រុមហ៊ុននិងសហគ្រាសនានា ឬ អាចទៅបង្កើតមុខរបរដោយខ្លួនឯងព្រមទាំងអាចបង្កើតការងារជួនដល់ប្រជាពលរដ្ឋឲ្យមានការងារធ្វើបង្កើនប្រាក់ចំណូលដល់ក្រុមគ្រួសារផងដែរ។
លោកបានបន្ថែមថា មុននឹងដាក់បញ្ចូលទៅក្នុងកម្មវិធីសិក្សាបច្ចុប្បន្ននេះក្រសួងនឹងពង្រីកការបណ្តុះបណ្តាលសហគ្រិនភាពនេះនៅទូទាំងប្រទេសតែម្តងដោយក្នុងមួយខេត្តៗយកតែមួយសាលាទេដោយជ្រើសរើសគ្រូក្នុងមួយខេត្ត២នាក់ដើម្បីយកមកបណ្តុះបណ្តាលលើជំនាញសហគ្រិនភាពនេះ។
លោកបានបន្ថែមថា ក្នុងកំឡុងពេលសាកល្បងនេះការរៀនជំនាញនេះមិនមានការប៉ះពាល់ដល់ម៉ោងសិក្សារបស់សិស្សឡើយពោលគឺអាស្រ័យលើគ្រូជ្រើសរើសម៉ោងដែលទំនេរឬថ្ងៃឈប់សំរាករបស់សិស្សឡើយ។
លោក ទុន សុភ័ណ អ្នកសម្របសម្រួលអង្គការអន្តរជាតិខាងការងារបានស្នើឲ្យក្រសួងអប់រំពង្រីកកម្មវិធីនេះទៅតាមសាលារៀនឲ្យបានច្រើនបន្ថែមទៀត ដើម្បីបញ្ជ្រាបចំណេះដឹងស្តីពីធុរកិច្ចនិងសហគ្រិនភាពដល់សិស្សនៅកំរិតមធ្យមសិក្សាឲ្យបានកាន់តែច្រើន។
ចំណែកលោកឡេង វីរៈ នាយកអង្គការទស្សនពិភពលោកអន្តរជាតិប្រចាំកម្ពុជាបានគាំទ្រឲ្យនិស្សិតរៀនជំ នាញទន់នេះដើម្បីបណ្តុះភាពដឹកនាំក៏ដូចជាសហគ្រិនភាពដល់យុវជននិងនិស្សិតព្រោះថា ប្រទេសមួយរីកចម្រើនទៅបានអាស្រ័យលើប្រទេសនោះសំបូរទៅដោយអ្នកដែលមានគំនិតជាសហគ្រិនភាព។
លោកបានបន្តថា នៅប្រទេសជឿនលឿនគឺមានប្រជាជនរបស់គេគិតគូសហគ្រិនភាពដែលចេះច្នៃប្រឌិតនិងបង្កើតមុខរបរថ្មីៗដើម្បីចូលរួមលើកស្ទួយដល់សេដ្ឋកិច្ចជាតិ។
គួរបញ្ជាក់ថា ក្រសួងអប់រំយុវជននិងកីឡា បានបណ្តុះបណ្តាលគ្រូស្តីពីធុរកិច្ចនេះបានជាង១០០នាក់រួចមកហើយដោយបានបណ្តុះបណ្តាលដល់សិស្សសាលាចំនួន១២៥នាក់ហើយនៅឆ្នាំ២០១៨នេះក្រសួងនឹងបណ្តុះបណ្តាលដល់សិស្ស៥០០នាក់បន្ថែមទៀតនៅតាមវិទ្យាល័យចំនួន២៥សាលា៕
Source: Kampuchea Thmey Daily
0 Comments