ភ្នំពេញ ៖ ក្រុមហ៊ុនខេស៊ី អ៊ិនធើណេសិនណល អ៊ែរឡាញនឹងចាប់ផ្តើមការហោះហើរជាលើកដំបូងនៅថ្ងៃទី២៧ ខែសីហា ឆ្នាំ២០១៨ខាងមុខនេះ បន្ទាប់ពីទទួលបានវិញ្ញាបនបត្រប្រតិបត្តិការផ្លូវអាកាស ពីរដ្ឋលេខាធិការដ្ឋានអាកាសចរណ៍ស៊ីវិលរួចមក។
ថ្លែងនៅក្នុងពិធីទទួលវិញ្ញាបនបត្រប្រតិបត្តិការផ្លូវអាកាសពីកាលពីព្រឹកថ្ងៃទី២៤ ខែសីហា នៅរដ្ឋលេខាធិការដ្ឋានអាកាសចរណ៍ស៊ីវិលលោក YUHAI ZHENG អគ្គនាយក ក្រុមហ៊ុនខេស៊ី អ៊ិនធើណេសិនណល អ៊ែរឡាញ បានមានប្រសាសន៍ថា ចាប់ពីថ្ងៃទី២៧ ដល់ថ្ងៃទី៣០ ខែសីហា ឆ្នាំ២០១៨នេះ ក្រុមហ៊ុនខេស៊ីដែលបានបង្កើតឡើង កាលពីថ្ងៃទី១៩ ខែកក្កដា ឆ្នាំ២០១៧ នឹងចាប់ផ្តើមហោះហើរសាកល្បងពីភ្នំពេញទៅខេត្តសៀមរាប និង ពីភ្នំពេញទៅខេត្តព្រះសីហនុ។
លោកបានបន្តថា បន្ទាប់មកនៅថ្ងៃទី៣១ ខែសីហា នឹងចាប់ផ្តើមហោះទៅក្រៅប្រទេសដោយចេញពីខេត្តព្រះសីហនុទៅកាន់ម៉ាកាវ និងពីម៉ាកាវទៅញ៉ាចាងនិងពីញ៉ាចាងទៅដាងណាងប្រទេសវៀតណាម ដោយប្រើប្រាស់យន្តហោះចំនួន៣គ្រឿងប្រភេទអ៊ែរប៊ើស ៣២០និង៣២១ដែល១គ្រឿងបានមកដល់ហើយនិង២គ្រឿងទៀតនឹងមកដល់នៅខែតុលានិងចុងខែវិច្ឆិកាឆ្នាំ២០១៨ខាងមុខនេះ។
លោកអគ្គនាយកបានបន្តថា ទោះបីជានៅកម្ពុជាមានក្រុមហ៊ុនអាកាសចរណ៍ប្រមាណ៧ក៏ដោយតែលោក មានជំនឿថា នឹងធ្វើបានល្អជាងបណ្តាក្រុមហ៊ុនផ្សេងៗទៀតដែរដោយសារតែក្រុមហ៊ុនមានអ្នកបច្ចេកទេសខ្ពស់និងអ្នកទីផ្សារប្រកបដោយស្ទាត់ជំនាញផងដែរ។
លោកសង្ឃឹមថា ក្រុមហ៊ុននឹងចូលរួមជាមួយបណ្តាក្រុមហ៊ុនអាកាសចរណ៍ផ្សេងៗទៀតនឹងធ្វើឲ្យវិស័យអាកាសចរណ៍ស៊ីវិលនៅកម្ពុជាកាន់តែរីកលូតលាស់ថែមទៀត។
លោកអគ្គនាយកបានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជាពិសេសរដ្ឋលេខាធិការដ្ឋានអាកាសចរណ៍ស៊ីវិលដែលមានទំនុកចិត្តផ្តល់វិញ្ញាបនបត្រប្រតិបត្តិការផ្លូវអាកាសដល់ក្រុមហ៊ុនក្រុមហ៊ុនខេស៊ី អ៊ិនធើណេសិនណល អ៊ែរឡាញ។
នៅក្នុងពិធីប្រគល់វិញ្ញាបនបត្រនាឱកាសនោះ លោក ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ថា ការប្រគល់វិញ្ញាបនបត្រប្រតិបត្តិការផ្លូវអាកាសដល់ក្រុមហ៊ុនខេស៊ី អ៊ិនធើណេសិនណល អ៊ែរឡាញនេះបន្ទាប់ពីក្រុមហ៊ុននេះបានបំពេញបែបបទបច្ចេកទេសបានត្រឹមត្រូវស្របតាមគោលការណ៍របស់អាកាសចរណ៍ស៊ីវិល។
លោកបានមានប្រសាសន៍បន្តថា «ខ្ញុំសូមស្វាគមន៍ចំពោះក្រុមហ៊ុនខេស៊ីដែលបានសម្រេចមកវិនិយោគផ្នែកវិស័យអាកាសចរណ៍ស៊ីវិលនៅកម្ពុជាដែលបានចូលរួមចំណែកក្នុងការលើកកម្ពស់វិស័យអាកាសចរណ៍ស៊ីវិលនិងលើកស្ទួយដល់សេដ្ឋកិច្ចនៅកម្ពុជាឲ្យកាន់តែល្អប្រសើរផងដែរ»។
លោកបានណែនាំដល់ក្រុមហ៊ុនខិតខំបណ្តុះបណ្តាលធនធានមនុស្សទាំងអ្នកបើកបរនិងអ្នកបម្រើការនៅលើយន្តហោះដើម្បីធានាបាននូវសុខសុវត្ថិភាពក្នុងការដឹកអ្នកដំណើរ៕
Source: Kampuchea Thmey Daily
0 Comments