ឈួន សុវណ្ណឆៃ ៖ ខ្ញុំមានថ្ងៃនេះគឺបានគុណរបស់លោកគ្រូ អ៊ុំ តារា

ភ្នំពេញ ៖ បន្ទាប់ពីទទួលបានដំណឹងនៃការធ្លាក់ខ្លួនឈឺសម្រាកនៅតែលើកន្ទេលពីសំណាក់ស្ដេចវីយូឡុង និងជាអ្នកនិពន្ធបទចម្រៀងល្បីឈ្មោះគឺលោកគ្រូអ៊ុំ តារា នោះ តារាចម្រៀងស្រីអ្នកនាង ឈួន សុវណ្ណឆៃ ដោយមិនបង្អង់យូរ បានធ្វើដំណើរស្កាត់ទៅជួបសួរសុខទុក្ខ និងទិញនូវសម្ភារៈមួយចំនួនទៅជូនដល់លោកគ្រូ អ៊ុំ តារា ដែលត្រូវបាននាងចាត់ទុកថា ជាអ្នកមានគុណមិនអាចបំភ្លេចបានអស់មួយជីវិត។

តាមរយៈសំណេរសរសេរភ្ជាប់ជាមួយរូបភាពនៃដំណើរចុះទៅសួរសុខទុក្ខលោកលោកគ្រូ អ៊ុំ តារា អ្នកនាង ឈួន សុវណ្ណឆៃ បានរៀបរាប់ថា សូមជូនពរលោកគ្រូ អ៊ុំ តារា មានសុខភាពល្អ និងឆាប់ជាពីជំងឺផង។ គាត់ជាលោកគ្រូខ្ញុំកាលខ្ញុំមកដល់ទីក្រុងភ្នំពេញ កាលពីដំបូង បានលោកគ្រូជួយបង្ហាត់បង្រៀនកូនធ្វើអោយកូនមានថ្ងៃនេះ និងលោកគ្រូ អ៊ុំ អ៊ួន ផង។

តារាចម្រៀងអ្នកនាង ឈួន សុវណ្ណឆៃ បានបន្តថា ទឹកចិត្តបន្តិចបន្តួចរបស់កូនមិនស្មើនឹងទឹកចិត្តរបស់លោកគ្រូកាលពីឆ្នាំ១៩៩៩ ដែលលោកគ្រូបានអោយកូន១០ម៉ឺនរៀល ពេលដែលកូនកំពុងតែពិបាកខ្លាំង កូនមិនដែលភ្លេចអតីតកាលរបស់កូនទេ នៅតែចងចាំអំពើល្អ និងទឹកចិត្តរបស់លោកគ្រូជានិច្ច។

អ្នកនាងបញ្ជាក់ថា លោកគ្រូ អ៊ុំ តារា កន្លងមកធ្លាប់និពន្ធបទថ្មីឲ្យច្រៀងចំនួន៣បទ ប៉ុន្តែដោយគ្រាន់តែក្រោយពេលថតចប់បទចម្រៀងទាំងនោះមិនត្រូវបានចេញលក់ ហើយមិនដឹងថាតើលោកគ្រូ អ៊ុំ តារា រក្សាទុកឬបាត់បង់នោះទេ ខណៈពេលបច្ចុប្បន្នលោកគ្រូបានធ្លាក់ខ្លួនឈឺធ្ងន់និងវង្វេងស្មារតីច្រើន។

អ្នកនាង ឈួន សុវណ្ណឆៃ បានលើកឡើងទៀតថា នាងមិនដែលភ្លេចគុណរបស់លោកគ្រូ អ៊ុំ តារា នោះទេ ខណៈគ្រាដែលនាងមកដល់ទីក្រុងភ្នំពេញលើកដំបូងគឺបានការជួយជ្រោមជ្រែងពីសំណាក់លោកគ្រូ អ៊ុំ តារា ទើបធ្វើឲ្យជីវិតរបស់នាងដើរលើវិថីសិល្បៈ និងមានរហូតដល់សព្វថ្ងៃ។ ដូច្នេះចំពោះគុណបំណាច់ស្ដេចវីយូឡុងលោកគ្រូ អ៊ុំ តារា គឺពិតជាមិនអាចធ្វើឲ្យនាងបំភ្លេចបាននោះឡើយ។

សូមបញ្ជាក់ថា គ្រា ដែលធ្វើដំណើរទៅសួរសុខទុក្ខស្ដេចវីយូឡុងលោកគ្រូ អ៊ុំ តារា កាលពីថ្ងៃទី០២ ខែសីហា ឆ្នាំ២០១៨នេះដែរ អ្នកនាង ឈួន សុវណ្ណឆៃ ក៏បានជូនថវិកាផ្ទាល់ខ្លួនចំនួន២០០ដុល្លាររួមនឹងទឹកផ្លែឈើដល់អ្នកមានគុណដែលធ្លាប់ជួយខ្លួនផងដែរ។លោកគ្រូ អ៊ុំ តារា បច្ចុប្បន្នបានធ្លាក់ខ្លួនឈឺដោយសារជំងឺឆ្អឹងមានរយៈពេលយូរឆ្នាំមកហើយ។ នេះបើតាមការបញ្ជាក់ឲ្យដឹងពីសំណាក់ក្រុមគ្រួសាររបស់លោកគ្រូ៕