វុត្ថា លាន់​លិញ និង ឡុង រ៉ា​មី ឆ្លងទៅ​ដំណាក់កាល​ទី​៣

ការប្រកួត​ជម្រុះ​ប្រដាល់​ដណ្តើម​ខ្សែក្រវាត់​ជើងឯក​ពានរង្វាន់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម វុត្ថា លាន់​លិញ អ្នក​ប្រដាល់​ក្លិប​អង្គរ​ធំគុន​ខ្មែរ និង ឡុង រ៉ា​មី អ្នក​ប្រដាល់​ក្លិប​ខ្លារខិន​មាន​រិ​ទ្ធ ត្រូវបាន​ឆ្លងទៅ​ដំណាក់កាល​ទី​៣​បន្តទៀត ក្រោយពី​ពួកគេ​ទាំងពីរ​វាយ​ឈ្នះ​ដៃគូ​ក្នុងដំណាក់កាល​ទី​២ កាលពី​យប់​ថ្ងៃទី​១៨​សីហា​ឆ្នាំ​២០១៨ លើស​ង្វៀន​TV5 ព្រែកកំពឹស​នោះ.

​វុត្ថា លាន់​លិញ គេ​បាន​យកឈ្នះ​តាំង តាក់ អ្នក​ប្រដាល់​ក្លិប​រស្មី​ភូមិ​គាប​ខេត្ត​បន្ទាយ មានជ័យ​ដោយ​ពិន្ទុ បន្ទាប់ពី​ប្រកួត​គ្នា​យ៉ាង​ស្វិតស្វាញ​ពេញ​ប្រាំ​ទឹក​នោះ ។ ការ​ឈ្នះ​របស់​វុត្ថា លាន់​លិញ រាង​ពិបាក​ដែរ ដោយ​តាំង តាក់ ដែលជា​ជើង​ខ្លាំង​ម្នាក់​នោះ គេ​វាយ​បុក​មកលើ​ខ្លាំងពេក ។ ប៉ុន្តែ​យ៉ាងណា តាំង តាក់​ធ្វើ​អ្វី​លាន់​លិញ​មិនបាន​នោះឡើយ ដែល​ធ្វើអោយ​ចប់​ការប្រកួត វុត្ថា លាន់​លិញ​ឈ្នះ​តាំង តាក់ ដោយ​ពិន្ទុ ។​
​
និយាយ​រួម ស្ថានភាព​ប្រកួត​ពេលនោះ អាច​ចាត់ទុកជា​សំណាង​របស់​វុត្ថា លាន់​លិញ​ហើយ ដោយសារ​ពេលនោះ​តាំង តាក់ គេ​ហាក់ដូច​ជាមាន​កម្លាំង​ស៊ុ​ហ្វ​មិន​រឹងមាំ ដែលនាំអោយ​ការ​វាយ​ចេញ​របស់គេ​មិនសូវ​ខ្លាំង​និង​ចំ​គោលដៅ​ល្អ ពិសេស​ស្នៀត​ទាត់​ដែល​ធ្លាប់តែ​ខ្លាំង​និង​ធ្ងន់​របស់​តាំង​តាក់ លែងមាន​ប្រសិទ្ធភាព ។ វុត្ថា លាន់​លិញ បើ​ពុំ​ជួប​សភាព​បែបនេះ​ទេនោះ ក៏​ប្រហែលជា​យ៉ាប់​ឈ្នះ​តាំង តាក់​ដែរ ។​
​
តែ​យ៉ាងណា តាំង តាក់ គេ​ត្រូវ​ជ្រុះ​ធ្លាក់​ចេញពី​ការប្រកួត​ដណ្តើម​ខ្សែក្រវាត់​ជើងឯក​TV5 Knock Out Series by K.Cement ទម្ងន់​៦០​គីឡូក្រាម​ត្រឹមនេះ​។ ឯ វុត្ថា លាន់​លិញ​គេ​នឹងត្រូវ​នៅ​បន្ត​ការប្រកួត​ក្នុងដំណាក់កាល​ទី​៣​ទៀត ។
​
ចំណែក​ឡុង រ៉ា​មី គេ​បាន​ប្រកួត​ឈ្នះ​ឈាន​រស្មី អ្នក​ប្រដាល់​ក្លិប​រាជសីហ៍​ខេត្តរតនគិរី ដោយ​ពិន្ទុ​ដាច់​តែម្តង ក្នុងការ​ប្រកួត​ជម្រុះ​ដំណាក់កាល​ទី​២​នេះ ។ ឈាន រស្មី ដែលជា​អ្នក​ប្រដាល់​ជើងចាស់​យូរ​ឆ្នាំ​ណាស់​មកហើយ​នោះ ត្រូវ​ឡុង រ៉ា​មី ដេញ​សម្រុក​វាយ​ដៃ ទាត់​និង​ជង្គង់ និង​ប្រើ​ទាំង​កែង ក្នុង​បំណង​ផ្តួល​មួយ​ទឹក​ពីរ​ទឹក​ដំបូង​តែម្តង ។
​
តែ​យ៉ាងណា ឈាន រស្មី គេ​នៅតែ​អាច​ទប់​បាន​និង​វាយ​សង​វិញ​ត្រូវ​រ៉ា​មី​ជាច្រើន​ដៃ​ឡើង​ចង់​វង្វេង​ទៅហើយ ប៉ុន្តែ​ឈាន រស្មី នៅតែ​ចាញ់​ឡុង រ៉ា​មី ដាច់​ដដែល ។ ដូច្នេះ ឡុង រ៉ា​មី គេ​ត្រូវ​នៅ​បន្ត​ការប្រកួត​ទៀត នៅក្នុង​ដំណាក់កាល​ទី​៣ ឯ ឈាន រស្មី​ត្រូវ​ជ្រុះ​ធ្លាក់​ត្រឹមនេះ ។​
​
គួរ​បញ្ជាក់ថា នៅក្នុង​ការប្រកួត​ដំណាក់កាល​ទី​២​នេះ ក៏​ជាការ​ប្រកួត​ចាញ់​ធ្លាក់​ដែរ ។ អ្នក​ប្រដាល់​ទាំង​១៦​នាក់ ដែល​ចំ​រ៉ា​ញ់​បាន​ក្នុងដំណាក់កាល​ទី​១​នោះ នឹងត្រូវ​ជួប​ប្រកួត​គ្នា​ជម្រុះ​ចោល​៨​នាក់ ទុក​៨​នាក់ ដែលជា​អ្នកឈ្នះ​សម្រាប់​បន្ត​ការប្រកួត​ក្នុងដំណាក់កាល​ទី​៣ ដែលជា​ការប្រកួត​វគ្គ​ពាក់កណ្តាល​ផ្តាច់ព្រ័ត្រ និង ផ្តាច់ព្រ័ត្រ ដើម្បី​ដណ្តើម​ពានរង្វាន់​ជើងឯក​TV5 Knock Out Series by K.Cement ទម្ងន់​៥៧​គីឡូក្រាម ។ ការប្រកួត​ជម្រុះ​ក្នុង​ដំណាក់​ទី​២​នេះ ក៏​ប្រកួត​បី​ទឹក​ដូច​ក្នុងដំណាក់កាល​ទី​១​ដែរ ។​
​
ដោយឡែក ចំពោះ​ការប្រកួត​ជា​លក្ខណៈ​មិត្តភាព​អន្តរជាតិ​មួយគូ​នោះ ពុទ្ធ ឆាយ​រិទ្ធី អ្នក​ប្រដាល់​ក្លិប​ពុទ្ធ​សេរី​វង្ស​កីឡា បាន​ផ្តួល​អ្នក​ប្រដាល់​មកពី​ប្រទេស​ថៃ​Thav Oularn អោយ​សន្លប់​លើ​រេញ ដោយ​ការប្រើ​កែង​និង​កណ្តាប់ដៃ ។​
​
ពុទ្ធ ឆាយ​រិទ្ធី បានឈ្នះ​Thav Oularn​នេះ ចាត់ទុកថា​គេ​ខ្លាំង​ហើយ ព្រោះ​អ្នក​ប្រដាល់​ថៃ​Thav Oularn​នេះ គេ​ជា​ជើង​ខ្លាំង​និង​ជា​ម្ចាស់​ខ្សែក្រវាត់ ហើយ​រិទ្ធី​សឹងតែ​ទប់​ជាមួយ​ជង្គង់​និង​ជើង​ទាត់​របស់​Thav Oularn​មិនបាន​នោះទេ ។​
​
ចំណែក ឡាញ់ ផល្លា អ្នក​ប្រដាល់​ក្លិប​អេ​ភូ​ថង​កីឡា បាន​វាយ​ឈ្នះ​ផាន រះ អ្នក​ប្រដាល់​ក្លិប​តា​ព្រហ្ម​មានជ័យ​ក្នុង​ទឹក​ទី​៣ ។ ផាន រះ ត្រូវ​អាជ្ញាកណ្តាល​រាប់​៨​ពីរដង​និង​ដួល​ម្តងទៀត ក៏ត្រូវ​អាជ្ញាកណ្តាល​បញ្ឈប់​លែង​ឲ្យ​ប្រកួត​បន្តទៀត​តែម្តង៕



Source: Kampuchea Thmey Daily