ចំនួន​អ្នក​ស្លាប់ ​ទាក់ទង​នឹង​ភ្លៀង​ធ្លាក់​កើន​ដល់​២៦​នាក់​នៅ​ភាគ​ខាង​ត្បូង​ប្រទេស​ឥណ្ឌា

ក្រុម​មន្ត្រី​បាន​និយាយ​កាលពី​ថ្ងៃ​សុក្រ​ថា ចំនួន​អ្នក​ស្លាប់​ ដោយសារ​ការ​បាក់​ដី​ និង​ទឹកជំនន់​ ដែល​បង្ក​ដោយ​ភ្លៀង​ធ្លាក់​ខ្លាំង​នៅ​រដ្ឋ Kerala ភាគ​ខាង​ត្បូង​ប្រទេស​ឥណ្ឌា​បាន​កើនឡើង​ដល់​២៦​នាក់​ហើយ។

ការ​ស្លាប់​នេះ ​ត្រូវ​បាន​គេ​រាយការណ៍​ពី​ស្រុក ​Idukki, Malappuram, Kozhikode, Wayanad និង Ernakulam។

មន្ត្រី​គ្រប់គ្រង​គ្រោះមហន្តរាយ​បាន​និយាយថា “​ខណៈ​មាន​អ្នកស្លាប់​បួន​នាក់​ទៀត​នៅ​ល្ងាច​ថ្ងៃ​ព្រហស្បតិ៍​នោះ ចំនួន​អ្នកស្លាប់​សរុប​គឺ​២៦​នាក់​។ មនុស្ស​ជាច្រើន​នៅតែ​បាត់​ខ្លួន​នៅក្នុង​ស្រុក​ទាំងនេះ​”​។​

លោក​បាន​បន្ថែមថា ក្រៅពី​កងកម្លាំង​ជំនួយ​គ្រោះមហន្តរាយ​ជាតិ (NDRF), កងទ័ព​ឥណ្ឌា​កំពុង​ត្រូវបាន​ដាក់ពង្រាយ​នៅក្នុង​រដ្ឋ​នេះ​។​

អាជ្ញាធរ​មូលដ្ឋាន​បាន​និយាយថា សាលារៀន​និង​មហាវិទ្យាល័យ​ត្រូវ​បិទទ្វារ​នៅតាម​ផ្នែក​ជាច្រើន​នៃ​រដ្ឋ​នេះ​ហើយ​ការ​ប្រណាំងទូក​ប្រចាំឆ្នាំ Nehru នៅ​ស្រុក Alappuzha ត្រូវបាន​ផ្អាក​ដោយសារតែ​ភ្លៀង​ធ្លាក់​ខ្លាំង​បាន​វាយប្រហារ​លើ​រដ្ឋ Kerala​។​

រដ្ឋមន្ដ្រី​ប្រចាំ​រដ្ឋ​នេះ​គឺ​លោក Pinarayi Vijayan បាន​បញ្ជា​ឲ្យ​បើក​ទំនប់ទឹក​ចំនួន​២២​នៅ​ទូទាំង​រដ្ឋ Kerala ដោយសារតែ​ការកើនឡើង​នៃ​កម្ពស់​ទឹក​នៅក្នុង​អាង​ស្តុក​ទឹកធំៗ​។​

គួរ​បញ្ជាក់ថា កាលពី​ខែ​មុន មនុស្ស​ជាង​៤០​នាក់​បាន​បាត់​បង់ជីវិត​នៅក្នុង​ឧប្បត្តិ​ហេតុដែល​ទាក់ទង​នឹង​ទឹកភ្លៀង​នៅ Kerala នេះ​៕

​

Source: Kampuchea Thmey Daily