ឆក់​ខ្សែក​ប្លាទីន​ បាន​សម្រេច​ជិះ​ម៉ូតូ​​​គេច​ទៅ​បុក​ម៉ូតូ​អ្នកដំណើរ ប៉ូលិស​ឃាត់ខ្លួន​ជនសង្ស័យ​បាន​ម្នាក់

ភ្នំពេញ ​៖​ ជន​សង្ស័យ​ម្នាក់ ​ត្រូវ​បាន​កម្លាំង​នគរបាល​ប៉ុស្តិ៍​រដ្ឋបាល​ទឹកល្អក់​ទី​១ នៃ​អធិការដ្ឋាន​នគរបាល​ខណ្ឌទួលគោក​ធ្វើការ​ឃាត់ខ្លួន​បាន​ជាក់ស្តែង ខណៈ​ដែល​ជនសង្ស័យ​ម្នាក់​នេះ ​ធ្វើ​សកម្មភាព​ឆក់​ខ្សែក​ប្លាទីន បាន​​សម្រេច​ តែ​នៅពេល​ជិះ​ម៉ូតូ​គេច​ទៅ​បុក​ម៉ូតូ​អ្នកដំណើរ ទើប​ជនរងគ្រោះ​ និង​ប៉ូលិស​ឃាត់ខ្លួន​បានតែ​ម្តង។

អំពើ​ឆក់​ខ្សែក​ខាងលើនេះ ​បាន​កើតឡើង​កាលពី​រាត្រី​ថ្ងៃ​ពុធ ១១​កើត ខែ​ស្រាពណ៍ ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី ២២ ខែសីហា ឆ្នាំ​២០១៨ វេលា​ម៉ោង​ប្រហែល ១៩​និង​៥៥​នាទី​នៅ​ចំណុច​ផ្លូវ​ចុះ​ពី​ស្ពាន​៧​មករា​លើ​ដងផ្លូវ​កម្ពុជា​ក្រោម ក្រុម ទី​២៥ ភូមិ​៧ សង្កាត់​ទឹកល្អក់​ទី​១ ខណ្ឌទួលគោក រាជធានី​ភ្នំពេញ។

ជនសង្ស័យ​ឈ្មោះ សឿន ស៊ី​ណេង ហៅ ណេង ភេទ​ប្រុស អាយុ​១៧​ឆ្នាំ ជនជាតិ​ខ្មែរ មុខរបរ ពុំ​ពិតប្រាកដ ស្នាក់នៅ​ផ្ទះជួល​ពុំ​ស្គាល់​លេខ ផ្លូវ​បេតុង ភូមិ​ស្លែង​រលើង សង្កាត់​អូ​បែកក្អម ខណ្ឌ​សែន​សុខ រាជធានី​ភ្នំពេញ។

វត្ថុតាង​ចាប់​យក​មាន ខ្សែក​លោហធាតុ​ពណ៌​លឿង​ស្លេក​មួយ​ខ្សែ​មាន​ប្រវែង​ប្រហែល ៤​តឹក កន្លះ ដាច់ពីគ្នា (​ជា​របស់​ជនរងគ្រោះ​ដែល​ជនសង្ស័យ​ឆក់​) , ម៉ូតូ​មួយ​គ្រឿង​ម៉ាក Honda C110 (​សង់​ប៊ិច​) ស៊េរី 2012 ពណ៌​ខ្មៅ ពាក់​ស្លាក​លេខ កណ្ដាល 1R-3103 ដែល មាន​លេខ​តួ និង​លេខ​ម៉ាស៊ីន​: 8012577 (​ជា​របស់​ជនសង្ស័យ​ជិះ​ធ្វើ​សកម្មភាព​ឆក់)។

ចំណែក​ជនរងគ្រោះ ឈ្មោះ យក់ ច​ន្ធូ ភេទ​ស្រី​អាយុ​២៨​ឆ្នាំ ជនជាតិ​ខ្មែរ មុខរបរ កម្ម​ការិនី រោងចក្រ​កាត់ដេរ ស្នាក់នៅ​ផ្ទះ​ជួល ផ្លូវលំ សង្កាត់ ទឹកថ្លា ខណ្ឌ​សែន​សុខ រាជធានី​ភ្នំពេញ។

មន្ត្រី​ប៉ូលិស​ផ្នែក​ព្រហ្មទណ្ឌ​ខណ្ឌទួលគោក​បាន​អោយ​ដឹង​ថា នៅ​ថ្ងៃទី​២២ ខែសីហា ឆ្នាំ​២០១៨ វេលា​ម៉ោង​ប្រហែល ១៩​និង​៤០​នាទី ជនរងគ្រោះ​ឈ្មោះ យក់ ច​ន្ធូ ភេទ​ស្រី អាយុ​២៨​ឆ្នាំ ជនជាតិ​ខ្មែរ និង​ប្ដី​ឈ្មោះ ស្រី សុ​ខែម ភេទ​ប្រុស អាយុ​៣២​ឆ្នាំ ជនជាតិ​ខ្មែរ បាន​ជិះ​ម៉ូតូ​មួយ​គ្រឿង​ម៉ាក Honda C125​ស៊េរី 2014 ពណ៌​ខ្មៅ ពាក់​ស្លាក​លេខ ភ្នំពេញ 1FE-2442 ចេញពីផ្ទះ​ក្នុង​គោលបំណង​ទៅ​ញុំា​អាហារ និង​ដើរលេង នៅ​មាត់ទន្លេ ដោយ​ឈ្មោះ ស្រី សុ​ខែម ជា​ប្តី​របស់​ជនរងគ្រោះ​ជា​អ្នក​ឌុប ចំណែក​ជនរងគ្រោះ​ជា​អ្នកជិះ​ពី​ខាងក្រោយ លុះ​ពេល​ជនរងគ្រោះ​ជិះ​មកដល់​ចំណុច​ផ្លូវ​ចុះ​ពីលើ​ស្ពាន​៧​មករា លើ​ដងផ្លូវ​លេខ​១២៨ ក្រុម​២៥ ភូមិ​៧ សង្កាត់​ទឹកល្អក់​ទី​១ ខណ្ឌទួលគោក រាជធានី​ភ្នំពេញ ស្រាប់​តែមាន​ជនសង្ស័យ​ឈ្មោះ សឿន ស៊ី​ណេង ហៅ ណេង ភេទ​ប្រុស អាយុ​១៧​ឆ្នាំ ជនជាតិខ្មែរ បាន​ជិះ​ម៉ូតូ​មួយគ្រឿង​ម៉ាក Honda C110 (​សង់​ប៊ិច ) ស៊េរី 2012 ពណ៌​ខ្មៅ ពាក់​ស្លាក​លេខ កណ្ដាល 1R-3103 ជិះ​មកពី​ខាងក្រោយ ខាងស្ដាំ​ដៃ​របស់​ជនរងគ្រោះ រួច​ជនសង្ស័យ​បាន​ធ្វើ​សកម្មភាព​ឆក់​យក​ខ្សែក​ពី​ជនរងគ្រោះ​បាន​សម្រេច ហើយ​ជនសង្ស័យ​ព្យាយាម​ជិះ​គេចខ្លួន ភ្លាម​នោះ​ជនរងគ្រោះ​បាន​ស្រែក​ថា​ចោរៗ ហើយ​ជិះ​ដេញ​តាម​ពី​ខាងក្រោយ ភ្លាម​នោះ​ជនសង្ស័យ​ឈ្មោះ សឿន ស៊ី​ណេង បាន​ជិះ​ម៉ូតូ​ទៅ​បុក​នឹង​ម៉ូតូ​របស់​អ្នកដំណើរ​តាមផ្លូវ បណ្ដាល​ឲ្យ​ដួល​ម៉ូតូ​របស់​ជនសង្ស័យ។ ភ្លាម​នោះ​ជនរងគ្រោះ និង​សមត្ថកិច្ច​នគរបាល​ប៉ុស្តិ៍​រដ្ឋបាល​ទឹកល្អក់​ទី​១ ក៏​អន្តរាគមន៍ ឃាត់ខ្លួន​ជនសង្ស័យ​រូបនេះ​ និង​វត្ថុតាង (​ខ្សែក​លោហធាតុ​ពណ៌​លឿង​ស្លេក ) ដាច់ពីគ្នា រួច​បញ្ជូន​យកមក​កាន់​អធិការដ្ឋាន​នគរបាល​ខណ្ឌទួលគោក ចាត់ការ​តាម​នីតិវិធី​ច្បាប់​តែម្ដង។

បន្ទាប់ពី​ឃាត់ខ្លួន​ជនសង្ស័យ​ឈ្មោះ សឿន ស៊ី​ណេង ហៅ ណេង សមត្ថកិច្ច​យើង​បាន​យក​ទឹកនោម​ជនសង្ស័យ​រូបនេះ​មក​ធ្វើ​តេ​ស្ដ​ស្វែងរក​សារធាតុ​ញៀន​ក្នុង​ទឹកនោម ជា​លទ្ធផល មាន​ភាព អវិជ្ជមាន។​

បច្ចុប្បន្ន ខ្សែក​លោហធាតុ​ពណ៌​លឿង​ស្លេក មួយ​ខ្សែ​មាន​ប្រវែង​ប្រហែល ៤​តឹក កន្លះ ដាច់ពីគ្នា សមត្ថកិច្ច​យើង​បានធ្វើការ​ប្រគល់ជូន​ជនរងគ្រោះ​វិញ តាម​ការស្នើសុំ ដោយមាន​ការឯកភាព​ពី​លោក តុ​ប ឈុន​ឡុង ព្រះរាជអាជ្ញារង នៃ​អយ្យការ​អម​សាលាដំបូង​រាជធានី​ភ្នំពេញ។​

បច្ចុប្បន្ន ​៖ ​ជនសង្ស័យ​ខាងលើ​កំពុង​ឃាត់ខ្លួន​ជា​បណ្ដោះអាសន្ន នៅ​អធិការដ្ឋាន នគរបាល​ខណ្ឌទួលគោក ដើម្បី​ធ្វើការ សាកសួរ កសាង​សំណុំរឿង និង​បញ្ជូន​ជនសង្ស័យ​ទៅ​សាលាដំបូង រាជធានី​ភ្នំពេញ ចាត់ការ​តាម​នីតិវិធី​ច្បាប់៕

​

Source: Kampuchea Thmey Daily