បាត់ដំបង ៖ បុរសម្នាក់ ដែលជាអ្នកកាន់ចង្កូតរថយន្តច្នៃ បានទទួលរងនូវគ្រោះថ្នាក់ស្លាប់ភ្លាមៗនៅនឹងកន្លែងកើតហេតុតែម្តង ខណៈដែលជនរងគ្រោះរូបនេះ បានបើកបររថយន្តច្នៃនៅពេលយប់ ហើយបានធ្លាក់ចូលជង្ហុកក្រឡាប់តែម្តង ដោយសារតែភ្លើងបំភ្លឺមិនសូវភ្លឺ ធ្វើអោយមើលផ្លូវមិនច្បាស់។
ករណីគ្រោះថ្នាក់ចរាចរណ៍ដោយឯកឯងនេះ បានកើតឡើងនៅម៉ោងប្រមាណជាង ៧ យប់នាទីថ្ងៃ ២២ ខែសីហា ឆ្នាំ២០១៨ លើកំណាត់ផ្លូវលំក្រាលក្រួសក្រហម ១ ខ្សែ ស្ថិតក្នុង ភូមិព្រះធាតុ ឃុំរបស់មង្គល ស្រុកមោងឫស្សី ខេត្តបាត់ដំបង ។
បើតាមសាក្សីនៅកន្លែងកើតហេតុបាននិយាយថា នៅមុនពេលកើតហេតុ គឺមានរថយន្ត ច្នៃ ១ គ្រឿង ពណ៌ខៀវ បើកបរដោយឈ្មោះ ទូច ចេវ ភេទប្រុស អាយុ៣៦ឆ្នាំ រស់នៅ ភូមិកកោះ ឃុំកកោះ ស្រុកមោងឫស្សី ដោយនៅលើរថយន្តច្នៃនោះ មានដឹកសសរគ្រាក់កកោះជាច្រើនដើមផងដែរ។
ប្រភពដដែលបានបន្តថា លុះពេលដែលរថយន្តច្នៃបានបើកមកដល់ត្រង់ចំណុចកើតហេតុខាងលើ ដោយសារតែភ្លើងមិនសូវភ្លឺផងនោះ ធ្វើអោយរថយន្តធ្លាក់កង់ម្ខាងទៅក្នុងជង្ហុកបណ្តាលអោយតួរថយន្តទាំងមូលក្រឡាប់ទៅខាងស្តាំ ព្រមទាំងបានសង្កត់ទៅលើអ្នកបើកបរស្លាប់ភ្លាមៗតែម្តង។
បច្ចុប្បន្នសព ត្រូវបានក្រុមគ្រួសារនាំយកទៅធ្វើបុណ្យតាមប្រពៃណីហើយ បន្ទាប់ពីមានការចុះពិនិត្យពីកម្លាំងសមត្ថកិច្ច រួចមក៕
Source: Kampuchea Thmey Daily
0 Comments