កោះកុង ៖ កម្មករទូកនេសាទវ័យចំណាស់ម្នាក់ បានស្លាប់ ដោយសារលង់ទឹក ត្រង់ចំណុចសមុទ្រក្រៅ (អាវឡាតាន់) ដែលមានទីតាំងស្ថិតក្នុងភូមិ ជ្រោយប្រោះ ឃុំជ្រោយប្រស់ ស្រុកកោះកុង ខេត្តកោះកុង។ ហេតុការណ៍នេះ បានកើតឡើងនាវេលាម៉ោង៨និង១០នាទីព្រឹក នាថ្ងៃទី២២ ខែសីហា ឆ្នាំ២០១៨។
បើតាមការអោយដឹងពីសមត្ថកិច្ចជំនាញជនរងគ្រោះខាងលើពុំត្រូវបានគេស្គាល់អត្តសញ្ញាណច្បាស់នោះទេ ដោយគ្រាន់តែដឹងថា ជនរងគ្រោះមានឈ្មោះក្រៅហៅតាបាត់ដំបង ភេទប្រុស អាយុជាង៤០ឆ្នាំ។
បើតាមការសាកសួរពីកម្មករទូកនេសាទបានអោយដឹងថា មុនពេលកើតហេតុជនរងគ្រោះ បានផឹកស្រា ហើយនៅពេលដែលទូកនេសាទចតនៅកណ្តាលសមុទ្រ អែបនឹងទូក១គ្រឿង ទៀត ដើម្បីទិញនុយ ស្របពេលនោះក៏មានរលកសមុទ្រខ្លាំង បណ្តាលឲ្យទូកឃ្លីងឃ្លោង ក៏ធ្វើអោយជនរងគ្រោះរអឹកជើងធ្លាក់ទឹកតែម្តង។ ពេលនោះកម្មករនេសាទ ក៏បាននាំគ្នាស្រង់ជនរងគ្រោះឡើងមកលើទូកវិញ ប៉ុន្តែជាអកុសលគាត់បានស្លាប់បាត់ទៅហើយ។
ក្រោយពីការពិនិត្យយ៉ាងល្អិតល្អន់ និងធ្វើកោសល្យវិច័យរួច សមត្ថកិច្ចជំនាញបានធ្វើកំណត់ហេតុប្រគល់សាកសពជនរងគ្រោះទៅឲ្យថៅកែទូកឈ្មោះ កែ កែវ ភេទស្រី អាយុ៤៨ឆ្នាំ ដែលមានទីលំនៅត្រង់ចំណុចកើតហេតុខាងលើ ដើម្បីយកសពជនរងគ្រោះទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments