ភ្នំពេញ ៖ តារាសិល្បៈដែលជួបការខ្វះខាត និងបាត់បង់សមត្ថភាពសម្តែងចំនួន៥រូប ទទួលបានការជួយឧបត្ថម្ភពីសំណាក់មូលនិធិសិល្បករចាស់ជរានៃសមាគមសិល្បករខ្មែរតាមរយៈតារាកំប្លែងជើងចាស់នាយ កុយ។ ពិធីប្រគល់អំណោយនេះ បានធ្វើឡើងកាលពីថ្ងៃទី២១ ខែសីហា ឆ្នាំ២០១៨ស្ថិតនៅទីស្នាក់ការរបស់សមាគម។
ចំពោះសិល្បកររៀមច្បងទាំង៥រូប ដែលត្រូវបានមកទទួលអំណោយពីមូលនិធិចាស់ជរានោះ រួមមាន ៖ ១.លោក សីម សារ៉េម (មានអ្នកមកយកជំនួស) អ្នកចម្រៀងពីឆ្នាំ១៩៨០-២០១៨ ,២.លោក ប៉ែន សំអុន សិល្បៈភ្លេងបុរាណពីឆ្នាំ១៩៦៣-២០១៨, ៣. លោក ឈិត សុវណ្ណ សិល្បៈបុរាណពីឆ្នាំ១៩៧២-២០១៨, ៤.លោក ណាវ សុខ សិល្បៈបុរាណពីឆ្នាំ១៩៥៣ -២០១៨ និងលោក មាស សាឯម សិល្បៈភ្លេងបុរាណពីឆ្នាំ១៩៧៥-២០១៨។
អំណោយដែលប្រគល់ជូនសិល្បករចំនួន៥រូបខាងលើនេះមានដូចជា ៖ អង្ករ ,មី ,ត្រីខ និងថវិកាមួយចំនួនទៀត។ ការប្រគល់ជូនធ្វើឡើងពីសំណាក់តារាកំប្លែងល្បីឈ្មោះគឺនាយ កុយ ដែលជាអ្នកតំណាងឲ្យមូលនិធិសិល្បករចាស់ជរានៃសមាគមសិល្បករខ្មែរ។
នាឱកាសនេះ បើតាមប្រភពពីសមាគមបានលើកឡើងថា សមាគមសូមគោរពថ្លែងអំណរគុណដល់សប្បុរសជនទាំងអស់ ដែលបានជួយឧបត្ថម្ភដល់"មូលនិធិសិល្បករចាស់ជរា" ជាពិសេសសូមគោរពថ្លែងអំណរគុណដល់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានឧបត្ថម្ភថវិកាដើម្បីទ្រទ្រង់ដល់សិល្បករចាស់ជរាក្នុងរយៈពេល៥ឆ្នាំ។
ជាមួយគ្នានេះសមាគមសិល្បករខ្មែរក៏សូមគោរពជូនពរសម្តេចទាំងពីរ និងសប្បុរសជនទាំងអស់ឲ្យមានសុខភាពល្អបរិបូណ៌ កម្លាំងខ្លាំងក្លា ប្រាជ្ញាវាងវៃ អាយុយឺនយូរ ដើម្បីដឹកនាំកសាង និងអភិវឌ្ឍន៍ប្រទេសជាតិឲ្យកាន់តែរីកចម្រើនថ្កុំថ្កើងរុងរឿងតទៅមុខទៀត។
សូមបញ្ជាក់ថា នេះពុំមែនជាលើកទីនោះទេ ដែលមូលនិធិសិល្បករចាស់ជរានៃសមាគមសិល្បករខ្មែររៀបចំការផ្តល់ជូនអំណោយដល់សិល្បករ-សិល្បការិនីជួបការខ្វះខាតនិងមានវ័យកាន់តែចាស់ជរា៕
Source: Kampuchea Thmey Daily
0 Comments