ពិធី​សម្ពោធ​ចូលកាន់​តំណែង​របស់​ប្រធានាធិបតី​ហ្ស៊ី​ម​បា​វ៉េ​ ត្រូវ​ពន្យារពេល ​បន្ទាប់ពី​មានការ​ជំទាស់​លទ្ធផល

ការសម្ពោធ​ចូលកាន់​តំណែង​ជា​ផ្លូវការ​នៅ​ថ្ងៃអាទិត្យ​របស់​ប្រធានាធិបតី​ហ្ស៊ី​ម​បា​វ៉េ​លោក Emmerson Mnangagwa ត្រូវបាន​ផ្អាក ​បន្ទាប់ពី​មានការ​ជំទាស់​ផ្នែក​ច្បាប់​ពី​សំណាក់​គណបក្សប្រឆាំង​អំពី​លទ្ធផល​នៃ​ការបោះឆ្នោត។

មេដឹកនាំ​គណបក្ស MDC លោក Nelson Chamisa បាន​និយាយថា លោក​មាន​ភស្តុតាង​បង្ហាញថា លោក​ត្រូវបាន​គេ​បោកប្រាស់​ក្នុងការ​បោះឆ្នោត​ប្រធានាធិបតី​ថ្ងៃទី​៣០​ខែកក្កដា​។​

គណបក្ស​របស់លោក​បាន​និយាយថា ការបោះឆ្នោត​នេះ​ត្រូវបាន​បំផ្លាញ​ដោយ “​ការលួចបន្លំ​និង​ការ​ក្លែងបន្លំ​” ប៉ុន្តែ​គណកម្មាធិការ​បោះឆ្នោត​បា​ន​ទទូចថា មិនមាន “​ការប្រើ​ល្បិច​ទេ​”​។​

លោក Mnangagwa ទទួលបាន​សំឡេងឆ្នោត​៥០,៨​ភាគរយ​បើ​ប្រៀបធៀប​ជាមួយ​លោក Chamisa ដែល​ទទួលបាន​៤៤,៣​ភាគរយ។

រដ្ឋមន្ត្រី​ក្រសួងយុត្តិធម៌​លោក Ziyambi Ziyambi បាន​ថ្លែងថា “​ការសម្ពោធ​ចូលកាន់​តំណែង​មិនអាច​បន្ត​ធ្វើឡើង​ដូចដែល​បានគ្រោង​ទុក​នោះទេ​បន្ទាប់ពី​គណបក្សប្រឆាំង​បានដាក់​ការ​ប្រជែង​កាលពី​ថ្ងៃ​សុក្រ​”​។​

រដ្ឋធម្មនុញ្ញ​ហ្ស៊ី​ម​បា​វ៉េ​អនុញ្ញាត​ឲ្យ​បេក្ខជន​ប្រធានាធិបតី​អាចធ្វើ​ការជំទាស់​ចំពោះ​លទ្ធផល​នៃ​ការបោះឆ្នោត​ដោយ​ស្របច្បាប់​ក្នុង​រយៈពេល​ប្រាំពីរ​ថ្ងៃ​ដែល​អ្នកឈ្នះ​ត្រូវបាន​ប្រកាស​។​

តុលាការ​ធម្មនុញ្ញ​បច្ចុប្បន្ន​មាន​រយៈពេល​១៤​ថ្ងៃ​ដើម្បី​សម្រេច​លើ​បញ្ហា​ប្រឈម​ផ្នែក​ច្បាប់​របស់​គណបក្ស​ចលនា​ដើម្បី​ការផ្លាស់ប្តូរ​ប្រជាធិបតេយ្យ (MDC)។​

គណបក្ស​នេះ​ត្រូវតែ​បង្ហាញ​អំពី​ភាពមិនប្រក្រតី​ណាមួយ​ដែល​គ្រប់គ្រាន់​ដើម្បី​ផ្លាស់ប្តូរ​លទ្ធផល​នៃ​ការបោះឆ្នោត​។ ប្រសិនបើ​រឿងនេះ​កើតឡើង​ដោយ​ជោគជ័យ​មែន​នោះ តុលាការ​អាច​បញ្ជា​ឲ្យ​រាប់​សន្លឹកឆ្នោត​ឡើងវិញ​ឬ​បដិសេធ​លទ្ធផល។

លោក Chamisa ចង់​ឲ្យ​តុលាការ​ប្រកាស​គាត់​ថា​ជា​អ្នកឈ្នះ​ឬ​រៀបចំ​ការបោះឆ្នោត​ថ្មី​។ នេះ​បើតាម​ការលើកឡើង​រប​ស់​មេធាវី​គាត់​ប្រាប់​ទីភ្នាក់ងារ​ព័ត៌មាន​រ៉​យ​ទ័​រ​។​
គាត់​បាន​បង្ហោះ Twitter ក្នុង​រយៈពេល​ខ្លី​បន្ទាប់ពី​ដាក់ពាក្យ​ប្តឹង​ថា “​យើង​មាន​ករណី​ដ៏​ល្អ​មួយ​”​។​

គួរ​បញ្ជាក់ថា រយៈពេល​ពីរ​ថ្ងៃ​បន្ទាប់ពី​ការបោះឆ្នោត មនុស្ស​យ៉ាងតិច​៦​នាក់​ត្រូវបាន​សម្លាប់​នៅក្នុង​ការប៉ះទង្គិចរ​វា​ង​កងកម្លាំង​សន្តិសុខ​និង​អ្នកគាំទ្រ​គណបក្ស MDC ដែល​បាន​ចោទប្រកាន់ថា លោក Chamisa ត្រូវបាន​គេ​ប្លន់​ជ័យជម្នះ៕

​

Source: Kampuchea Thmey Daily