ពលករខ្មែរម្នាក់ និងថៃម្នាក់ ស្លាប់ក្នុងករណីគ្រោះថ្នាក់ចរាចរណ៍

Cambodia News August 06, 2018

ប្រទេសថៃ ៖ ជនជាតិថៃម្នាក់ បានស្លាប់យ៉ាងវេទនាជាទីបំផុត ដោយសារតែដាច់ កជើងស្តាំម្ខាង ឯពលករខ្មែរម្នាក់ ក៏ត្រូវបានស្លាប់ដែរ នៅក្នុងហេតុការណ៍ នៃគ្រោះថ្នាក់ចរាចរណ៍មួយ នៅក្នុងប្រទេសថៃ ខណៈដែលភាគីម៉ូតូដែលជាជនជាតិថៃ បានបើកបរក្នុងល្បឿនលឿនទៅបុកយ៉ាងពេញទំហឹង ជាមួយនឹងពលករខ្មែរ ដែលកំពុងជិះកង់មិនដឹងខ្លួន។

យោងតាមរបាយការណ៍ដែលយើងទទួលបានពីភាគីថៃបានអោយដឹងថា ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោង ១១ និង ៤៥ នាទី យប់ ថ្ងៃទី៤ ខែសីហា ឆ្នាំ២០១៨ លើកំណាត់ផ្លូវ សុខសុវត្ថិ ទល់មុខមន្ទីរពេទ្យ ប៉ៅឡូ ព្រះប្រាក់ដែង ក្នុងឃុំប៉ាកខ្លង បាងប្លាកុត ស្រុកព្រះសមុទ្រចេតីយ៍ ខេត្តសមុទ្រប្រាកាន ប្រទេសថៃ។

របាយការណ៍មិនបានបញ្ជាក់ថា ការធ្វើដំណើររបស់ភាគីទាំងពីរ ក្នុងទិសដៅពីណាទៅណានោះឡើយ ដោយគ្រាន់តែបញ្ជាក់ថា នៅកន្លែងកើតហេតុគែមានពលករខ្មែរម្នាក់ ដែលជិះកង់ បានដេកស្លាប់នៅកណ្តាលទ្រូងផ្លូវ ដែលគេនោះមានឈ្មោះ ពេជ្រ ស៊ីណា ភេទប្រុស អាយុ៣៩ឆ្នាំ។

នៅចម្ងាយប្រមាណជា ១០០ ម៉ែត្រ គេសង្កេតឃើញមានម៉ូតូមួយគ្រឿងម៉ាក យ៉ាម៉ាហា R3 រមូរជាប់ជាមួយនឹងកង់មួយគ្រឿង ដោយនៅក្បែរនោះមានជនជាតិថៃម្នាក់ឈ្មោះ វ៉ន វុធ ភេទប្រុស អាយុ១៩ឆ្នាំ រងរបួសធ្ងន់ ដោយដាច់ ក ជើងស្តាំម្ខាង ដោយភ្លាមៗនោះដែរ សមត្ថកិច្ចបានបញ្ជូនចូលទៅក្នុងមន្ទីរពេទ្យដែលនៅក្បែរ ប៉ុន្តែគេក៏បានស្លាប់នៅពេលនោះដែរ ដែលគេបានសន្និដ្ឋានថា អាចបណ្តាលមកពីការបើកបរលឿនហួសកំណត់។

បច្ចុប្បន្នសពពលករខ្មែរ ត្រូវបានសមត្ថកិច្ចធ្វើការស្រាវជ្រាវរកសាច់ញាតិ ដើម្បីបញ្ជូនទៅកាន់ស្រុកកំណើតវិញ៕