ភ្នំពេញ ៖ បុរសជាអ្នកលក់មាន់ម្នាក់ដោយសារហេវហត់អស់កម្លាំងខ្លាំងពេកថ្ងៃបាក់រសៀលទៅហើយ ទើបឆ្លៀតពេលបានចូលហូបគុយទាវ១ចាន ខណៈកំពុងញាត់ចូលមាត់បានពីរបីម៉ាត់ដួលភីងតែម្ដងសន្លប់បាត់មាត់បាត់កមួយរំពេច បង្កឲ្យភ្ញាក់ផ្អើលកាលពីវេលាម៉ោង១និង៣០នាទីរសៀល ថ្ងៃទី២៤ ខែសីហា ឆ្នាំ២០១៨ ស្ថិតនៅហាងគុយទាវមួយកន្លែង តាមផ្លូវជាតិលេខ៣ ភូមិព្រៃព្រីងត្បូងសង្កាត់ចោមចៅ៣ខណ្ឌពោធិ៍សែនជ័យ។
ជនរងគ្រោះ ឈ្មោះ ស សម្បត្តិ ភេទប្រុស អាយុ៤៥ឆ្នាំ មុខរបរ លក់មាន់ មានប្រពន្ធឈ្មោះ កែវ គុណ អាយុ៤២ឆ្នាំ មុខរបរ លក់មាន់ជាមួយគ្នា មានទីលំនៅភូមិចុងអាងឃុំឧត្តមសូរិយាស្រុកត្រាំកក់ ខេត្តតាកែវ។
តាមសម្តីស្ត្រីជាប្រពន្ធបានឲ្យដឹងថា ពួកគាត់២នាក់ ប្តីបានដឹកមាន់មកលក់នៅតាមផ្សារក្នុងទីក្រុងភ្នំពេញ តាំងពីព្រឹកព្រលឹមមកម្ល៉េះដោយមិនទាន់ហូបអីនោះទេ លុះលក់មាន់អស់ជិះម៉ូតូវិលត្រឡប់ទៅផ្ទះវិញ តែដោយសារថ្ងៃបាក់រសៀលទៅហើយ ដោយហេវហត់អស់កម្លាំងពេកទាំង២នាក់ប្តី-ប្រពន្ធបាននាំគ្នាចូលហូបគុយទាវ១ចានម្នាក់សិន ហើយខណៈដែលកំពុងអង្គុយហូបសុខៗ ស្រាប់តែ ប្តី កើតមានអាការៈ ងងឹតវិលមុខដួលភីងសន្លប់បាត់មាត់ក បង្កឲ្យភ្ញាក់ផ្អើលភ្លាមៗនៅក្នុងហាងគុយទាវគេស្មានថាពុលគុយទាវតាមពិតខ្យល់គសោះ។
ជនរងគ្រោះ ក្រោយកើតហេតុ ត្រូវបានរថយន្តសង្គ្រោះរបស់អង្គភាព៧១១ដឹកបញ្ជូនទៅមន្ទីរពេទ្យបង្អែកពោធិ៍ចិនតុងដើម្បីជួយសង្គ្រោះ៕
Source: Kampuchea Thmey Daily
0 Comments