ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ លោក គី ប្ញទ្ធី កាលពីថ្ងៃទី២២ ខែសីហា ឆ្នាំ២០១៨ បានចេញដីកាមួយកោះហៅលោក ផែង ហេង មេធាវីការពារក្តីឲ្យលោក កឹម សុខា ចូលរួមនីតិវិធីស្តីពីការពន្យារពេលឃុំខ្លួនបណ្តោះអាសន្នរបស់លោក កឹម សុខា នៅវេលាម៉ោង៩ ព្រឹកថ្ងៃទី៣០ ខែសីហា ឆ្នាំ២០១៨ ខាងមុខ។
លោក កឹម សុខា ត្រូវបានសមត្ថកិច្ចចាប់ខ្លួនពីក្នុងផ្ទះទាំងកណ្ដាលយប់ កាលពីដើមខែកញ្ញា ឆ្នាំ២០១៧ ដោយចោទពីបទ “ក្បត់ជាតិ” និងបញ្ជូនទៅឃុំក្នុងពន្ធនាគារត្រពាំងផ្លុង នៅខេត្តត្បូងឃ្មុំ។ លោក កឹម សុខា ត្រូវបានចោទប្រកាន់ពីបទ សន្ទិដ្ឋិភាពជាមួយបរទេស តាមមាត្រា ៤៤៣នៃក្រមព្រហ្មទណ្ឌ។ បើតាមក្រមព្រហ្មទណ្ឌកម្ពុជា សន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ។
ទាក់ទងបញ្ហានេះ កាលពីព្រឹកថ្ងៃទី២២ ខែសីហា ឆ្នាំ២០១៨ តុលាការកំពូល បានបើកសវនការលើសំណើរឿងសុំនៅក្រៅឃុំរបស់ជនជាប់ចោទ កឹម សុខា អតីតប្រធានគណបក្សសង្គ្រោះជាតិ ដែលសវនាការនេះធ្វើឡើងតាមបណ្តឹងរបស់មេធាវីរបស់លោក កឹម សុខា ដែលមិនសុខចិត្តនឹងសេចក្តីសម្រេចរបស់តុលាការកំពូល កាលថ្ងៃទី០៩ ខែមីនា ឆ្នាំ២០១៨ ដែលបានសម្រេចតម្កល់សាលដីកាសាលាឧទ្ធរណ៍ទុកជាបានការ គឺត្រូវបន្តឃុំខ្លួនលោក កឹម សុខា បន្តទៀត ដើម្បីសាកសួរ និងការពារកុំឲ្យមានបទល្មើសថ្មីកើតឡើង។
ក្រោយពីដំណើរការពេញមួយព្រឹក តុលាការកំពូល បានប្រកាសសាលដីកាសម្រេចបន្ដឃុំខ្លួន លោក កឹម សុខា ដាក់ពន្ធនាគារដដែល ដោយតម្កល់សាលដីការបស់សាលាឧទ្ធរណ៍ទុកជាបានការ ដោយសំអាងថា ករណីលោក កឹម សុខា ជាបទល្មើសឧក្រិដ្ឋ ដែលចាំបាច់ត្រូវឃុំខ្លួនដើម្បីស៊ើបសួរ ឲ្យបានហ្មត់ចត់ត្រឹមត្រូវ៕
Source: Kampuchea Thmey Daily
0 Comments