ភ្នំពេញ ៖ កុមារអាយុ៥ឆ្នាំម្នាក់ ត្រូវបានឪពុកចុងចិត្តអប្រិយ យកដំបងទីបជ័រវាយធ្វើបាបបណ្ដាលឲ្យរងរបួសមានស្លាកស្នាមពេញខ្លួន ហើយត្រូវនគរបាលប៉ុស្តិ៍ចោមចៅ២ ចាប់វាយខ្នោះយកមកប៉ុស្តិ៍ដើម្បីចាត់ការតាមផ្លូវច្បាប់កាលពីវេលាម៉ោង៩ព្រឹក ថ្ងៃទី២៤ ខែសីហា ឆ្នាំ២០១៨នេះ ស្ថិតនៅភូមិថ្មគោល២សង្កាត់ចោមចៅ២ ខណ្ឌពោធិ៍សែនជ័យ។
លោក សាន ប៉ែត នាយប៉ុស្តិ៍ចោមចៅ២ បានឲ្យដឹងថា ឪពុកចុងនោះឈ្មោះ យឹម សំណាង អាយុ២៦ឆ្នាំមុខរបរកម្មករសំណង់ ស្នាក់នៅភូមិថ្មគោល២ សង្កាត់ចោមចៅ២ ស្រុកកំណើតនៅស្រុកស្វាយប៉ោ ខេត្តបាត់ដំបង។ កុមាររងគ្រោះ ឈ្មោះ អាន សុខជា ភេទប្រុសអាយុ៥ឆ្នាំ ម្តាយឈ្មោះ អ៊ឹម សុរិយា អាយុ២៤ឆ្នាំ មានទីកន្លែងកំណើតនៅកន្លែងកើតហេតុនិងមានកូនជាមួយប្តីចុងចំនួន២នាក់ទៀតស្រីមួយប្រុសមួយដោយរស់នៅជាមួយគ្នាអស់រយៈពេល៥ឆ្នាំមកហើយ។
បើតាមសំដីម្ដាយកុមាររងគ្រោះបានឲ្យដឹងថា អំពើហិង្សាដែលឪពុកចុងវាយទៅលើកុមាររងគ្រោះខាងលើនេះ គឺមិនមែនតែមួយលើកនេះទេ គឺមានចំនួន ៣លើករួចមកហើយ រួមទាំងលើកនេះ ដែលប្ដីចុងរបស់នាងបានវាយដំទៅលើកូនរបស់ខ្លួន ដោយប្រើប្រាស់បំពង់ទីបជ័រ វាយម្ដងៗធ្វើឲ្យកូនរបស់ខ្លួនរបួសពេញខ្លួនរាប់ខែ ទើបធ្វើឲ្យនាងទប់អារម្មណ៍មិនបាននិង ដាច់ចិត្តប្ដឹងសមត្ថកិច្ចឲ្យជួយអន្តរាគមន៍ចាប់ខ្លួនតែម្តង ដើម្បីឲ្យនគរបាលចាត់ការតាមផ្លូវច្បាប់ សមត្ថកិច្ចកំពុងចាត់ការបន្ដតាមនីតិវិធី៕
Source: Kampuchea Thmey Daily
0 Comments