Ad Code

លី​គ​កំពូល​កម្ពុជា ​៖ ​សូល​ទី​ឡូ​អង្គរ​ប៉ះ​ណាហ្គា​វើ​ល ខណៈ​ប៉ូលីស ជួប​ភ្នំពេញ​ក្រោ​ន និង​ទ័ព​ប៉ះ​វិសាខា



ក្រុមបាល់ទាត់​សូល​ទី​ឡូ​អង្គរ​ប៉ះ​ក្រុម​ណាហ្គា​វើ​ល ខណៈ​ក្រុម​អគ្គស្នងការដ្ឋាន​នគរ​បាល​ជាតិ (​ប៉ូលីស​) ជួប​ក្រុម​ភ្នំពេញ​ក្រោ​ន និង​ក្រុម​ក្រសួងការពារជាតិ (​ទ័ព​) ប៉ះ​ក្រុម​វិសាខា ក្នុង​សប្ដាហ៍​ទី​១៩ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) នៅ​ល្ងាច​ថ្ងៃ​សៅរ៍ ទី​២៥ ខែសីហា ឆ្នាំ​២០១៨ លើ​៣​ទីលាន​ផ្សេងគ្នា​។



*​សូល​ទី​ឡូ​អង្គរ ប៉ះ​ណាហ្គា​វើ​ល
ក្រុម​សូល​ទី​ឡូ​អង្គរ ទទួល​ក្រុម​ណាហ្គា​វើ​ល នៅវេលា​ម៉ោង​៣:៣០​នាទី​រសៀល​លើ​ទីលាន​កីឡដ្ឋាន​ខេត្តសៀមរាប ព្រមទាំង​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ករ​ស្មី​កម្ពុជា​។ ក្រុម​សូល​ទី​ឡូ​អង្គរ ក្រោម​ការដឹកនាំ​របស់​គ្រូបង្វឹក​ជនជាតិ​ជប៉ុន Yuki Matsuda កំពុងតែ​ត្រូវការ​ពិន្ទុ​គេច​ឱ្យ​ផុតពី​តំបន់​គ្រោះថ្នាក់​។ គ្រូបង្វឹក​រូបនេះ​ទើបតែ​បញ្ចប់​វគ្គ​សិក្សា​គ្រូបង្វឹក​បាល់ទាត់​កម្រិត AFC A License នៅ​ប្រទេស​សិង្ហ​បុរី កាលពីដើមឆ្នាំ​។ ១៨​ប្រកួត​កន្លងមក​ក្រុម​សូល​ទី​ឡូ​អង្គរ ឈ្នះ​បាន​៤​លើក ស្មើគ្នា​៤​លើក​និង​ចាញ់​ដល់​ទៅ​១០​លើក​។



​ក្រុម​ណាហ្គា​វើ​ល វិញ​កំពុង​ឈរ​លេខ​១ ក្នុង​តារាង​រួម ក្រោយ​ប្រកួត​ឈ្នះ​បាន​១៤​លើក ស្មើគ្នា​២​លើក និង​ចាញ់​២​លើក មាន​៤៤​ពិន្ទុ​ក្នុង​ដៃ​។ លោក មាស ចាន់ណា គ្រូបង្វឹក​កាន់​អាជ្ញា​ប័​ណ្ណ AFC A License បាន​អះអាង​ថា ​លោក នឹង​ព្យាយាម​ប្រមូលផ្ដុំ​អារម្មណ៍​កីឡាករ​ឲ្យ​បានល្អ និង កែប្រែ​ចំណុច​ខ្វះខាត​ដើម្បី​រក្សា​កៅអី​កំពូល​តារាង​រហូតដល់​ចប់​រដូវ​កាល​។



*​អគ្គស្នងការដ្ឋាន​នគ​របាល​ជាតិ ប៉ះ​ភ្នំពេញ​ក្រោ​ន
​ក្រុម​អគ្គស្នងការដ្ឋាន​នគរ​បាល​ជាតិ ប៉ះ​ក្រុម​ភ្នំពេញ​ក្រោ​ន នៅវេលា​ម៉ោង​៦​ល្ងាច​លើ​ទីលាន​ពហុ​កីឡដ្ឋាន​ជាតិ ព្រមទាំង​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ក CNCC​។ ក្រុម​ប៉ូលីស កំពុង​ឈរ​លេខ​៦ ក្នុងចំណោម​ក្លិប​ទាំង​១២ បន្ទាប់ពី​ឈ្នះ​បាន​៧​លើក ស្មើគ្នា​៣​លើក​និង​ចាញ់​៨​លើក​។ លោក នុត សូ​នី គ្រូបង្វឹក​ក្រុម​នេះ​រំពឹងថា​កូនក្រុម​នឹងធ្វើ​បានល្អ​បន្ថែមទៀត​ក្នុង​ប្រកួត​នៅពេល​ខាងមុខៗ ស្របពេល​មាន​កីឡាករ​ស្ទើរតែ​ពាក់កណ្ដាល​ក្រុម ទើបតែ​បញ្ចប់​បំពេញ​កាតព្វកិច្ច​នៅ​សាលា​បណ្ឌិតសភា​នគរបាល​ជាតិ​។ ម្យ៉ាងទៀត​ក្លិប​មាន​កីឡាករ​សំខាន់​ម្នាក់​បាន​ផ្ទេរចេញ​គឺ ទិ​ត្យ ឌី​ណា ទៅ​ចូលរួម​ក្រុម​វិសាខា ខណៈ​ក្លិប​បាន​បន្ថែម​កម្លាំង​ចំនួន​២​នាក់​វិញ​គឺ សុះ ប្រុស ហ៊ីម និង​កីឡាករ​កូរ៉េខាងត្បូង No Dae-ho​។



ចំណែក​ក្រុម​ភ្នំពេញ​ក្រោ​ន ក្រោម​ការដឹកនាំ​របស់​លោក Sean Sainsbury ជា​គ្រូបង្វឹក​ជនជាតិ​អង់គ្លេស សំបូរ​ទៅ​ដោយ​កីឡាករ​វ័យក្មេង​ច្រើន​អមដោយ​កីឡាករ​បរទេស​ដែលមាន​សមត្ថភាព​។ ក្រុម​នេះ​អស់​ឱកាស​ក្នុងការ​ប្រជែង​យកពាន​នៅ​រដូវ​កាល​នេះហើយ​។ ប្រកួត​បាន​១៨​លើក​មកនេះ​ភ្នំពេញ​ក្រោ​ន ឈរ​ចំណាត់ថ្នាក់​លេខ​៥ មាន​២៧​ពិន្ទុ​ក្រោយ​ឈ្នះ​បាន​៨​លើក ស្មើ​៣​លើក និង​ចាញ់​៧​លើក​។

*​ក្រសួងការពារជាតិ ជួប​ក្រុម​វិសាខា​
ក្រុម​ក្រសួងការពារជាតិ ជួប​ក្រុម​វិសាខា នៅវេលា​ម៉ោង​៦​ល្ងាច លើ​ទីលាន​កីឡដ្ឋាន​ស្តា​ត​ចាស់ មាន​ផ្សាយ​ផ្ទាល់​តាម​ប៉ុស្តិ៍ BTV News​។ កីឡាករ​របួស​និង​កីឡាករ​មួយចំនួន​ចាកចេញ​ជា​បញ្ហា​ប្រឈម​របស់​ក្រុម​ក្រសួងការពារជាតិ នាពេល​បច្ចុប្បន្ន​។ ក្នុង​ជើង​ទី​២​នេះ​ក្លិប​បាន​បន្ថែម​កីឡាករ​សំខាន់ៗ​មួយចំនួន​ដើម្បី​ទប់ស្កាត់​ការ​របូត​ពិន្ទុ​ពី​ដៃ ខណៈ​ក្រុម​នេះ​នៅសល់​ឱកាស​ប្រជែង​កំពូល​តារាង​នៅឡើយ​។ ងាក​ទៅ​មើល​១៨​ប្រកួត​មកនេះ​ក្រុម​ក្រសួងការពារជាតិ ឈ្នះ​បាន​១២​លើក ស្មើ​២​លើក​និង​ចាញ់​៤​លើក ឈរ​លេខ​៤ បណ្តោះអាសន្ន​។



ងាក​មក​ក្រុម​វិសាខា​វិញ កំពុងតែ​ត្រូវការ​ពិន្ទុ​ជាខ្លាំង​ដើម្បី​ប្រជែង​នៅ​តំបន់​កំពូល​តារាង​ក្រោយ​ប្រកួត​បាន​១៧​លើក​ឈ្នះ​បាន​១៣​លើក ស្មើគ្នា​បាន​២​លើក​និង​ចាញ់​៣​លើក​មាន​៤១​ពិន្ទុ និង​កំពុងតែ​ឈរ​ចំណាត់ថ្នាក់​លេខ​៣​បណ្តោះអាសន្ន​ក្នុងចំណោម​ក្លិប​ទាំង​១២​។ លោក ហុក សុ​ជី​វ័​ន្ត គ្រូបង្វឹក​របស់​វិសាខា បាន​រំពឹងថា​កូនក្រុម​អាច​បន្ត​ជ័យជម្នះ​ថែមទៀត​ដើម្បី​ដណ្តើម​កៅអី​កំពូល​តារាង​។

ចំណែក​៣​ប្រកួត​ផ្សេងទៀត​ប្រចាំ​សប្ដាហ៍​ទី​១៩​នេះ នឹង​បន្ត​ប្រកួត​នៅ​ថ្ងៃអាទិត្យ ទី​២៦ ខែសីហា ឆ្នាំ​២០១៨ ដោយ​ក្រុម​អង្គ​រថា​យ​ហ្គឺ​រ ប៉ះ​ក្រុម​អាស៊ី​អឺរ៉ុប នៅវេលា​ម៉ោង​៣និង៣០​នាទី​រសៀល​លើ​ទីលាន​កីឡដ្ឋាន​ខេត្តសៀមរាប ហើយ​មាន​ផ្សាយ​ផ្ទាល់​តាម​ទំព័រ​ហ្វេ​ស​ប៊ុ​ក​របស់​រស្មី​កម្ពុជា ខណៈ​ក្រុម​អគ្គីសនី​កម្ពុជា ប៉ះ​ក្រុម​វេ​ស្ទើ​ន​ភ្នំពេញ នៅ​ម៉ោង​៣​រសៀល លើ​ទីលាន​កីឡដ្ឋាន​អគ្គីសនី​កម្ពុជា ព្រមទាំង​មាន​ផ្សាយ​ផ្ទាល់​តាម​ហ្វេ​ស​ប៊ុ​ក CNCC និង​ក្រុម​ព្រះខ័ន​រាជ​ស្វាយរៀង ជួប​ក្រុម​បឹងកេត នៅ​ម៉ោង​៦​ល្ងាច​លើ​ទីលាន​កីឡដ្ឋាន​ខេត្តស្វាយរៀង ដែលមាន​ផ្សាយ​ផ្ទាល់​តាម​ប៉ុស្តិ៍ BTV News៕

     



Source: Kampuchea Thmey Daily

Post a Comment

0 Comments

Close Menu