បាត់ដំបង ៖ មុខសញ្ញាចែកចាយថ្នាំញៀនចំនួន៣នាក់ រួមនឹងថ្នាំញៀនជិត ៤ ក្រាមត្រូវបានកម្លាំងមូលដ្ឋានកងរាជអាវុធហត្ថស្រុក សំពៅលូន ធ្វើការឃាត់ខ្លួន ទៅតាមវិធានញុះញង់ របស់កងកម្លាំង ខណៈដែលពួកគេបានភ្លេចខ្លួន ហើយកំពុងប្រព្រឹត្តនូវសកម្មភាពជាក់ស្តែង។
ការឃាត់ខ្លួនមុខសញ្ញាសង្ស័យបានទាំងសំបុកនេះ បានធ្វើឡើង កាលពី វេលាម៉ោង ២និង៣០ នាទីរសៀល ថ្ងៃទី២៤ ខែសីហា ឆ្នាំ២០១៨ នៅត្រង់ចំណុចភូមិទទួលជ្រៃ ឃុំសំពៅលូន ស្រុកសំពៅលូន ខេត្តបាត់ដំបង នៅពេលដែលពួកគេបានធ្លាក់ចូលក្នុងអន្ទាក់នៃវិធានរបស់សមត្ថកិច្ច។
ជនទាំង៣នាក់នោះ មានឈ្មោះ ១. ឆាំ រំដួល ភេទស្រី អាយុ២១ឆ្នាំ មុខរបរ មិនពិតប្រាកដ រស់នៅត្រង់ចំណុចខាងលើ ២. ឈ្មោះ ផូន សុគន្ធ ភេទប្រុស អាយុ២៤ឆ្នាំ មុខរបរធ្វើចំការ ទីលំនៅភូមិ កូនភ្នំខាងជើង ឃុំតាស្តា ស្រុកសំពៅលូន ខេត្តបាត់ដំបង និង ៣. ឈ្មោះ រ៉េត ឆៃវុធ ភេទ ប្រុស អាយុ១៥ឆ្នាំ មុខរបរធ្វើចំការ ទីលំនៅភូមិ អូរចំណិប ឃុំតាស្តា ស្រុកសំពៅលូន ខេត្តបាត់ដំបង។
នៅក្នុងកិច្ចប្រតិបត្តិការនេះដែរ សមត្ថកិច្ចកងរាជអាវុធហត្ថ បានធ្វើការដកហូត នូវ គ្រឿងញៀន ប្រភេទយ៉ាម៉ា ចំនួន ១ គ្រាប់ គ្រឿងញៀន ប្រភេទម៉ាទឹកកក ចំនួន ២ កញ្ចប់ធំនិង ១២ កញ្ចប់តូច ទម្ងន់សរុប ៣,៩៤ ក្រាម ជញ្ជីងអេឡិចត្រូនិច សម្រាប់ថ្លឹងថ្នាំញៀន ១ គ្រឿង ដោយបច្ចុប្បន្នជនសង្ស័យ និងវត្ថុតាង ត្រូវបានកម្លាំងរៀបចំបញ្ជូនទៅកាន់បញ្ជាការដ្ឋាន កងរាជអាវុធហត្ថខេត្ត ដើម្បីចាត់វិធានការតាមផ្លូវច្បាប់៕
Source: Kampuchea Thmey Daily
0 Comments