ក្រុមជម្រើសជាតិកម្ពុជា ក្រោយការដឹកនាំពីសំណាក់កីឡាករ Keisuke Honda និងក្រុមការងាររបស់លោកនឹងត្រៀមប្រមូលផ្តុំនៅដើមខែកញ្ញា ខាងមុខដើម្បីត្រៀមប្រកួតមិត្តភាពអន្តរជាតិ ជាមួយក្រុមម៉ាឡេស៊ី ពោលគឺក្រោយលីគកំពូលកម្ពុជា (Metfone Cambodian League 2018) ត្រឹមសប្ដាហ៍ទី១៩ ខាងមុខនេះ។
លោក Felix Agustin Gonzalez Dalmas មនុស្សជំនិតរបស់លោក Keisuke Honda និងជាគ្រូបង្វឹកផ្ទាល់ក្នុងក្រុមជម្រើសជាតិកម្ពុជា កំពុងសម្លឹងមើលកីឡាករតាមបណ្ដាក្លឹបនានាក្នុងលីគកំពូលកម្ពុជានិងពានរង្វាន់សម្តេចតេជោ ហ៊ុន សែន យ៉ាងយកចិត្តទុកដាក់ ដើម្បីធ្វើការជ្រើសរើស និងកោះហៅមកប្រមូលផ្ដុំហ្វឹកហាត់ សម្រាប់ត្រៀមប្រកួតមិត្តភាពអន្ដរជាតិជាមួយក្រុមជម្រើសជាតិម៉ាឡេស៊ី នាថ្ងៃទី១០ ខែកញ្ញា ឆ្នាំ២០១៨។
ប្រភពស្និទ្ធពីសហព័ន្ធកីឡាបាល់ទាត់កម្ពុជា បានបញ្ជាក់ថា តាមគម្រោងលោក Felix នឹងបង្ហាញបញ្ជីឈ្មោះ ក៏ដូចជាធ្វើការប្រមូលផ្ដុំហ្វឹកហាត់តែម្ដង នៅថ្ងៃទី០៣ ខែកញ្ញា ប៉ុន្ដែខណៈពេលនេះ លោកមិនទាន់សម្រេចឡើយ ដោយរង់ចាំពិនិត្យមើលការប្រកួតលីគសប្ដាហ៍ទី១៩ និងការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់សម្ដេចតេជោ ហ៊ុន សែន ចន្លោះថ្ងៃទី០១-០២ ខែកញ្ញា ឆ្នាំ២០១៨ សិន។ បន្ទាប់មកទើបសម្រេច ធ្វើការហ្វឹកហាត់ គ្រាដែលការហ្វឹកហាត់តាមរយៈ Video Conference ជាមួយលោក Honda ក៏ស្ថិតក្នុងគម្រោង មុនការប្រកួតមិត្តភាពជាមួយម៉ាឡេស៊ី ចាប់ផ្ដើមផងដែរ។
បើតាមកាលវិភាគក្នុងកម្មវិធីប្រកួត Metfone Cambodian League នឹងបញ្ចប់នៅថ្ងៃទី៣០ ខែកញ្ញា ហើយពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ជាតិ វគ្គផ្ដាច់ព្រ័ត្រ នឹងប្រព្រឹត្តទៅនៅថ្ងៃទី០៦ ខែតុលា។ ចំណែកសកម្មភាពប្រកួតមិត្តភាពអន្តរជាតិរបស់របស់ក្រុមជម្រើសជាតិកម្ពុជា មានចំនួន៤លើកគឺនៅថ្ងៃទី ១០ ខែកញ្ញា ត្រូវប្រកួតជាមួយ ក្រុមជម្រើសជាតិម៉ាឡេស៊ី ហើយនៅថ្ងៃទី១២ ខែតុលា ត្រូវបន្តប្រកួតជាមួយក្រុមជម្រើសជាតិទីម័រខាងកើត និងនៅថ្ងៃទី១៦ ខែតុលា ប្រកួតជាមួយក្រុមជម្រើសជាតិសិង្ហបុរី។ ចុងក្រោយនៅថ្ងៃទី២ ខែវិច្ឆិកា កម្ពុជា ត្រូវបន្តប្រកួតជាមួយ ក្រុមបរទេស (មិនទាន់ប្រាកដថាក្រុមណា)។
ងាកមកមើលប្រកួតផ្លូវការរបស់ក្រុមជម្រើសជាតិកម្ពុជា វិញនឹងបន្តប្រកួតក្នុងពានរង្វាន់ AFF Suzuki Cup ដែលកម្ពុជា ស្ថិតនៅក្នុងពូល A ជាមួយក្រុមវៀតណាម ម៉ាឡេស៊ី មីយ៉ាន់ម៉ា និងឡាវ ខណៈពូល B មានថៃ ឥណ្ឌូណេស៊ី ហ្វីលីពីន សិង្ហបុរី និងក្រុមឈ្នះនៅវគ្គជម្រុះអាចជាប្រ៊ុយណេ ឬទីម័រខាងកើត។ តាមគម្រោងការវគ្គជម្រុះតាមពូលនេះនឹងធ្វើឡើចាប់ពីថ្ងៃទី៨ ខែវិច្ឆិកា ដល់ថ្ងៃទី១៥ខែធ្នូ ឆ្នាំ២០១៨៕
Source: Kampuchea Thmey Daily
0 Comments