កម្លាំងចម្រុះចុះប្រតិបត្តិការទាំងយប់ ខណៈទឹកដងស្ទឹងសង្កែ មានសន្ទុះកើនឡើងខ្លាំង ជិតដល់ភាពប្រកាសអាសន្ន

Cambodia News August 15, 2018

បាត់ដំបង ៖ នៅល្ងាចថ្ងៃទី១៥ ខែសីហា ឆ្នាំ២០១៨ រហូតដល់ម៉ោង៩និង៣០នាទីយប់ កម្លាំងអាជ្ញាធរខេត្ត ដោយមានការចុះត្រួតពិនិត្យផ្ទាល់ពីលោកងួន រតៈ អភិបាលខេត្តបាត់ដំបង និងលោកផេង សិទ្ធធី អភិបាលក្រុងបាត់ដំបង និងក្រសួងសាធារណការខេត្ត ជាពិសេសកម្លាំង យុគភូមិភាគទី៥ ចំនួន១០០នាក់ បានចុះមកត្រៀមលក្ខណៈ ច្រកដី ដើម្បីទប់ជ្រាំង ស្ទឹងសង្កែ ខណៈដែលទឹកកំពុងតែមានសន្ទុះឡើងខ្លាំង ជិតដល់ភាពប្រកាសអាសន្ន។

ប្រតិបត្តិការចុះនេះ បានធ្វើឡើងបន្ទាប់ពីទទួលបានដំណឹងពីមន្ទីរធនធានទឹកខេត្ត គឺលោក ឡុង ផលគុណ បានអះអាងថា សន្ទុះទឹក គឺ១ម៉ោងមានកម្ពស់ឡើង១តឹក ដែលជាការព្រួយបារម្ភរបស់អាជ្ញាធរ ក៏ដូចជាសមត្ថកិច្ចជំនាញ ទើបចុះមកជួយ ដើម្បីទប់ស្កាត់ជ្រាំងស្ទឹងសង្កែ ដែលមានប្រវែងជាង១០០ម៉ែត្រ ស្ថិតនៅក្នុងភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ដែលកន្លងមក ជាពិសេសកាលពីឆ្នាំ២០១៣ នៅចំណុចនេះ គឺទឹកបុកខ្លាំង ហើយហូរកាត់ រហូតលិចលោកតាដំបងក្រញូង ប៉ែកខាងកើតក្រុងបាត់ដំបង។ ដូច្នេះ ជាការត្រៀមលក្ខណៈរបស់អាជ្ញាធរ ដោយសារសន្ទុះទឹកខ្លាំងពេក ក៏បានដាក់កម្លាំងត្រៀមលក្ខណៈច្រកការុងទប់។

ចំណែកក្រសួងធនធានទឹកបានដាក់កម្លាំង២៤ម៉ោង នៅចំណុចទំនប់ពហុបំណង សេកសក និងទំនប់បង្ហត់ ដើម្បីឃ្លាំមើលសន្ទុះទឹក បើទឹកមានការថមថយគេនឹងទម្លាក់ទ្វារទឹកចុះជាបណ្តើរៗ ដើម្បីឲ្យសន្ទុះទឹកមិនបុកខ្លាំងមកក្រុងបាត់ដំបង ដងស្ទឹងសង្កែ ឲ្យទឹកហូរបែកទៅតាមអូរ តាមប្រឡាយនានាវិញ ជៀសវាងលិចក្រុងបាត់ដំបង៕