សហព័ន្ធកីឡាបាល់ទាត់កម្ពុជា បានតែងតាំងកីឡាករ Keisuke Honda អតីតសមាជិកក្រុមជម្រើសជាតិជប៉ុន ឲ្យធ្វើជាអ្នកចាត់ការទូទៅក្រុមជម្រើសជាតិកម្ពុជា នៅព្រឹកថ្ងៃអាទិត្យ ទី១២ ខែសីហា ឆ្នាំ២០១៨ ថ្មីៗនេះ ដើម្បីត្រៀមដឹកនាំក្រុមក្នុងយុទ្ធនាការសំខាន់នៅចុងឆ្នាំ២០១៨ ខាងមុខជាពិសេសគឺប្រកួតក្នុងពានរង្វាន់បាល់ទាត់ជើងឯកប្រចាំតំបន់អាស៊ាន AFF Suzuki Cup 2018។
ជុំវិញនឹងការមកដឹកនាំក្រុមជម្រើសជាតិគោព្រៃកម្ពុជារបស់កីឡាករ Honda ប្រធានក្រុមរបស់ក្រុមភ្នំពេញក្រោន កីឡាករ អ៊ុក សុធី លើកឡើងថា «ខ្ញុំសប្បាយចិត្តនៅពេលដែលដឹងថា Honda មកដឹកនាំក្រុមជម្រើសជាតិកម្ពុជា ព្រោះយើងបានដឹងហើយថា បាល់ទាត់នៅប្រទេសជប៉ុន មានការរីកចម្រើនខ្លាំង។ ដូច្នេះវាជាឱកាសល្អសម្រាប់យើងក្នុងការរៀនសូត្រពីគាត់។ ជាធម្មតានៅពេលដែលគ្រូដែលទើបតែចូលមកកាន់ថ្មីគឺតែងតែនាំមកនៅបច្ចេកទេសថ្មីៗមកជាមួយ ទាំងរបៀបប្រយុទ្ធ និងការការពារ។ ខ្ញុំសង្ឃឹមថា វត្តមានរបស់គាត់នឹងអាចកែប្រែបាល់ទាត់នៅកម្ពុជា ឲ្យរីកចម្រើនទៅមុខតទៅទៀត»។
ចំណែកលោក Sean Sainbury ដែលជាគ្រូបង្គោលរបស់ក្រុមភ្នំពេញក្រោន វិញបានយល់ឃើញថា «ខ្ញុំគិតថាវាជារឿងដែលល្អក្នុងការប្រកាស Honda មកដឹកនាំក្រុមជម្រើសជាតិ ដោយសារតែគាត់ជាបុគ្គលល្បី ហើយគាត់បានធ្វើការងារច្រើននៅកម្ពុជាទាក់ទងនឹងវិស័យបាល់ទាត់ដូចជាមានក្លិបផ្ទាល់ខ្លួននៅទីនេះ។ ខ្ញុំគិតថា វាគឺជារឿងវិជ្ជមានមួយសម្រាប់កម្ពុជា។ ប៉ុន្តែខ្ញុំមានក្តីកង្វល់មួយ គឺបច្ចុប្បន្ននេះគាត់គឺជាកីឡាករនៅឡើយ។ ដូច្នេះតើគាត់អាចនៅជាមួយក្រុមធ្វើការយ៉ាងដូចម្តេច? ជារួមខ្ញុំដូចជាចម្លែកចិត្តដែរ ព្រោះគាត់នៅជាកីឡាករ ហើយមកធ្វើការដឹកនាំក្រុមជម្រើសជាតិទៀត»។
សូមរំលឹកថា វត្តមានរបស់ Keisuke Honda មកដឹកនាំក្រុមជម្រើសជាតិកម្ពុជា ក្នុងកិច្ចសន្យារយៈពេល២ឆ្នាំនេះ ដោយស្ម័គ្រចិត្តពុំមានការយកប្រាក់ខែអ្វីនោះទេ។ កីឡាករ Keisuke Honda ចូលកាន់តួនាទីនេះ ដែលទំនេរចាប់តាំងពីគ្រូបង្គោលជនជាតិប្រេស៊ីល Leonardo Vitorino ចាកចេញពីតំណែងអំឡុងខែតុលា ឆ្នាំ២០១៧ និង បានកាន់ការងារបណ្ដោះអាសន្នដោយលោក ប្រាក់ សុវណ្ណារ៉ា នាពេលកន្លងមក៕
Source: Kampuchea Thmey Daily
0 Comments