ភ្នំពេញ ៖ យោងតាមរបាយការណ៍ប្រចាំត្រីមាសទី២ របស់ក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា បានឲ្យដឹងថា នៅក្នុងរយៈពេល៦ខែឆ្នាំ២០១៨នេះជនបរទេសដែលបានប្រព្រឹត្តបទល្មើសមានចំនួន៨៨ករណី ឃាត់ខ្លួន៣៧៨នាក់ មាន២៥សញ្ជាតិ។
ក្នុងចំណោមបទល្មើសដែលជនបរទេសបានប្រព្រឹត្តិបទល្មើស ភាគច្រើនជាបទល្មើសប្រើប្រាស់ជួញដូរគ្រឿងញៀនមាន ចំនួន១៧ករណី ស្មើនឹង ១៩,៣១% នៃចំនួនសរុប៨៨ករណី ក្នុងនោះជនជាតិចិនបានប្រព្រឹត្តបទល្មើសច្រើនជាងគេ គឺចំនួន២៥៧នាក់, នីហ្ស៊េរីយ៉ា៣៧នាក់, វៀតណាម១៤នាក់, ថៃ១២នាក់, កូរ៉ខាងត្បូង០៨នាក់ ហើយភូមិសាស្ត្រដែលកើតមានច្រើនជាងគេ នៅរាជធានីភ្នំពេញ។
តាមរបាយការណ៍ដដែលបានឲ្យដឹងបន្តថា ចំណែក វិនិយោគិន និងអ្នកទេសចរណ៍បរទេស ដែលមកប្រទេសកម្ពុជា បានទទួលរងគ្រោះមានចំនួន១៧៨ករណី ភាគច្រើនដោយអំពើចោរកម្មលួច-ឆក់មានចំនួន៧៧ករណី ស្មើនឹង៤៣,២៥% មាន៣៧សញ្ជាតិ ក្នុងនោះសញ្ជាតិច្រើនជាងគេគឺ ចិន៦១នាក់, វៀតណាម២២នាក់, បារាំង១៤នាក់, អង់គ្លេស១៣នាក់, អូស្ត្រាលី១១នាក់ ហើយភូមិសាស្ត្រដែលកើតមានច្រើនជាងគេ នៅរាជធានីភ្នំពេញ។
ថ្លែងនៅក្នុងកិច្ចប្រជុំត្រួតពិនិត្យ បូកសរុបលទ្ធផលការងារប្រចាំត្រីមាសទី២ ឆ្នាំ២០១៨កាលពីព្រឹកថ្ងៃទី១៥ ខែសីហា ឆ្នាំ២០១៨ ដែលមានការចូលរួមពីតំណាងស្ថានទួតនានា នាយឧត្ដមសេនីយ៍ ថោង លីម អគ្គស្នងការរងនគរបាលជាតិ និងជាប្រធានក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា តំណាងនាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិបាន បានថ្លែងអំណរគុណដល់ អគ្គស្នងការដ្ឋាននគរបាលជាតិ ជាពិសេសក្រុមព័ត៌មានទាន់ហេតុការណ៍ (HOTLINE) ជាមួយជនបរទេសប្រចាំនៅកម្ពុជា ដែលបានយកចិត្តទុកដាក់ការពារ និងដោះស្រាយបញ្ហាជូនប្រជាពលរដ្ឋខ្លួន និងការការពារសន្តិសុខ សុវត្ថិភាព ជូនវិនិយោគិន ភ្ញៀវទេសចរណ៍បរទេស មន្ត្រីការទូត ទីតាំងស្ថានទូត និងនិវេសនដ្ឋានឯកអគ្គរាជទូត-រដ្ឋទូត ដែលមានវត្តមាននៅកម្ពុជា។
ជាមួយគ្នានេះ នាយឧត្ដមសេនីយ៍ ថោង លីម បានណែនាំដល់នាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្ត ជាសមាជិក ត្រូវអនុវត្តតាមផែនការ របស់ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ ឲ្យមានប្រសិទ្ធភាពខ្ពស់ ក្នុងការការពារសន្តិសុខជូនវិនិយោគិន និងអ្នកទេសចរបរទេស ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជា ក្នុងការទាក់ទាញ និងលើកទឹកចិត្តវិស័យវិនិយោគ និងទេសចរណ៍នៅកម្ពុជា។
គួរបញ្ជាក់ថា ក្រុមព័ត៌មានទាន់ហេតុការណ៍ (HOTLINE) មានទំនាក់ទំនង និងកិច្ចសហប្រតិបត្តិការយ៉ាងល្អ ជាមួយបណ្តាស្ថានទូត និងស្ថានតំណាងទាំងជំនួបទ្វេភាគី និងពហុភាគី ដើម្បីពិភាក្សាគ្នាដោះស្រាយ បញ្ហានានា ឲ្យបានទាន់ពេលវេលាទាំងនៅថ្នាក់ជាតិ និងតាមរាជធានី-ខេត្ត រួមទាំងបានការពារគណៈប្រតិភូបរទេស និងមន្ត្រីការទូតបរទេស ក្នុងដំណើរទស្សនកិច្ច និងការចុះបំពេញបេសកកម្មនានា៕
Source: Kampuchea Thmey Daily
0 Comments