គ្រូ​ក្រុម​បឹង​កេត​អែ​ហ្វ​ស៊ី នៅតែ​សរសើរ​កូនក្រុម​ដែល​រក្សា​កៅអី​កំពូល​តារាង ខណៈ​ខ្លួន​ជាប់​ពិន័យ​នៅក្រៅ​ទីលាន

ក្រុមបាល់ទាត់​ម្ចាស់​ជើងឯក​៣​សម័យកាល​បឹងកេត បន្ត​ឡើងឈរ​កំពូល​តារាង​បណ្តោះអាសន្ន​ប្រចាំ​ពានរង្វាន់​លី​គ​កំពូល​កម្ពុជា (Metfone Cambodian League 2018) ត្រឹម​សប្ដាហ៍​ទី១៧ ដែល​រៀបចំ​ពី​សំណាក់​គណៈកម្មការ​ប្រកួត​បាល់ទាត់​ជាតិ (CNCC) សេនាធិការ​របស់​សហ​ព័ន្ធ​កីឡាបាល់ទាត់​កម្ពុជា ខណៈ​ក្រុម​នេះ​នៅតែ​មិន​ហ៊ាន​ធ្វើ​ប្រហែស​ចំពោះ​ប្រកួត​ដែល​នៅសល់​នោះទេ​។



​លោក ហៅ សុជាតិ បាន​លើកឡើង​ថា «​ឈរ​កំពូល​តារាង​គឺជា​ចំ​ណុច​ល្អ​របស់​យើង​ដែរ ប៉ុន្តែ​ទន្ទឹម​នឹង​នេះ យើង​ត្រូវ​ខិតខំ​ប្រឹងប្រែង​បន្ថែមទៀត ព្រោះថា​ជើង​ទី​២​នេះ​ ក្រុម​ដទៃទៀត​គេ​បាន​រៀប​ចំ​ក្រុម​បាន​ល្អ​ច្រើន​ទាំង​កីឡាករ​និង​ទម្រង់​លេង ម្យ៉ាងទៀត​ផ្លូវ​ដើរ​គឺ​នៅសល់​វែងឆ្ងាយ​ទៀត​។



ដូច្នេះហើយ​យើង​ត្រូវតែ​ប្រឹងប្រែង​បន្ថែម​»​។ លោក​បាន​សរសើរ​ដល់​កូនក្រុម​ដែល​បន្ត​ធ្វើ​បាន​ល្អ​រហូត​ដល់​យកឈ្នះ​លើ​ក្រុម​គូប្រជែង​វិសាខា ដោយ​លទ្ធផល​១​ទល់​០ កាល​ពី​ពេល​ថ្មីៗ​។

ក្រុម​បឹងកេត តាមរយៈ​១៧​ប្រកួត​មកនេះ​ទើបតែ​ស្គាល់​បរាជ័យ​តែ​១​លើក​ប៉ុណ្ណោះ ពោល​គឺ​ធ្លាប់​បាន​យកឈ្នះ​ក្រុម​អាស៊ី​អឺរ៉ុប ៤​ទល់​៣ ហើយ​ឈ្នះ​វេ​ស្ទើ​ន​ភ្នំពេញ ៣​ទល់​១ បន្ត​ឈ្នះ​អគ្គស្នងការដ្ឋាន​នគរ​បាល​ជាតិ ៥​ទល់​១ តែ​ស្មើ​សូល​ទី​ឡូ​អង្គរ ១​ទល់​១ ហើយ​យកឈ្នះ​ក្រសួងការពារជាតិ ២​ទល់​០ ឈ្នះ​ព្រះខ័ន​រាជ​ស្វាយរៀង ៣​ទល់​១ ស្មើ​ជាមួយ​អគ្គីសនី​កម្ពុជា ១​ទល់​១ ឈ្នះ​អង្គ​រថា​យ​ហ្គឺ​រ ៤​ទល់​០ ឈ្នះ​ភ្នំពេញ​ក្រោ​ន ៣​ទល់​២ ស្មើ​វិសាខា ១​ទល់​១ និង​ឈ្នះ​ណាហ្គា​វើល ៣​ទល់​២ នៅ​ជើង​ទី​១ ហើយ​ឈ្នះ​អាស៊ី​អឺរ៉ុប ៤​ទល់​០ ឈ្នះ​វេ​ស្ទើ​ន​ភ្នំពេញ ៥​ទល់​១ ឈ្នះ​អគ្គស្នងការដ្ឋាន​នគរ​បាល​ជាតិ ១​ទល់​០ និង​ឈ្នះ​សូល​ទី​ឡូ​អង្គរ ២​ទល់​១ ចាញ់​ក្រសួងការពារជាតិ ២​ទល់​០ និង​ឈ្នះ​វិសាខា ១​ទល់​០​ក្នុង​ជើង​ទី​២​។



​ជារួម​ក្រុម​បឹងកេត ប្រកួត​ឈ្នះ​១៣​លើក ស្មើគ្នា​៣​លើក និង​ចាញ់​១​លើក មាន​៤២​ពិន្ទុ​ក្នុង​ដៃ ទាត់​ចូល​ទី​គេ​ចំនួន​៤៣​គ្រាប់ ហើយ​របូត​១៧​គ្រាប់​។ លោក ហៅ សុជាតិ ត្រូវ​ក្លិប​តែងតាំង​ឲ្យ​ឈរឈ្មោះ​ជា​គ្រូបង្វឹក​ស្តីទី​កាលពី​រដូវ​កាល​ឆ្នាំ​២០១៦ កន្លងទៅ​ក្រោយ​ការចាកចេញ​របស់​លោក ប្រាក់ សុវណ្ណារ៉ា ខណៈ​លោក​បាន​ចាប់ដៃ​ជាមួយ​លោក កែវ កុសល ដឹកនាំ​ក្រុម​កាលពី​ដើមរដូវ​កាល​ក៏ដូចជា​ក្នុង​យុទ្ធនា​ការប្រកួត​វគ្គ​ជម្រុះ​ពានរង្វាន់ AFC Cup 2018​។ កាលពី​ឆ្នាំ​ចាស់​លោក​ឈ្នះ​បាន​រង្វាន់​គ្រូបង្វឹក​ឆ្នើម​ប្រចាំ​រដូវ​កាលពី CNCC ផងដែរ​។ គិត​ពី​ថ្ងៃទី​១ ខែសីហា ឆ្នាំ​២០១៨ មក​លោក ហៅ សុជាតិ មិនអាច​ដឹកនាំ​ក្រុម​លើ​ទីលាន​ក្នុង​ប្រកួត​នេះ​បាន​នោះ​ទេ ដោយសារ​ជាប់​ពិន័យ​រយៈពេល​១​ខែ ខណៈ​លោក លី រ៉ាវី ដែលជា​ជំនួយការ​ត្រូវ​ដឹកនាំ​ក្រុម​ជំនួស​បណ្តោះ​អាសន្ន​សិន​។

សម្រាប់​ប្រកួត​បន្ទាប់​សប្ដាហ៍​ទី​១៨ នៃ​ពានរង្វាន់​លី​គ​កំពូល​កម្ពុជា​ឆ្នាំ​២០១៨ នេះ​ក្រុម​បឹងកេត ត្រូវ​ប៉ះ​ក្រុម​ណាហ្គា​វើ​ល នៅ​វេលា​ម៉ោង​៣​រសៀល ថ្ងៃ​សៅរ៍ ទី​១៨ ខែសីហា ឆ្នាំ​២០១៨ ចុង​សប្តាហ៍​នេះ​លើ​ទីលាន​កីឡដ្ឋាន​ស្តា​ត​ចាស់ ក្នុង​រាជធានី​ភ្នំពេញ​៕

  

Source: Kampuchea Thmey Daily